Lucas 12:15-55

¹⁵Minikagi heman si Jesus diyà te otaw netipon, “Ikà niyo eg-ingà te kedònan te doma otaw. Pengkey ontò dakel se kedònan te otaw, meneng eked pegkelayat se omol din pineokit kenyan.”

¹⁶Penga niyan, mig-indan si Jesus te tegdeyanan, kagi din, “Doen otaw meyaman nekegani te ontò dakel.

¹⁷Penga niyan, mig-aneng-aneng sikandin, ‘Megmeno a? So wedad den keombaan te pol solanan te ginani ko.

¹⁸Na, seini se inangen ko. Gobalen ko se tapay pol, aw penga niyan inangen ko se pol labi pa dakel, aw yan se solanan ko te kedakel te ginani ko aw kededònan ko.

¹⁹Penga niyan, aneng-aneng ko, botong den se kepulukan ko te pengkey pila se omay. Mepakay den aw eked a pegterbaho. Olò a den komaen, aw minem a, aw gayed a meluba.’

²⁰Meneng minikagi se Timanem, ‘Wedad palos inenengen nikaw. Matay ka den te delem seini. Pengkey dakel den se kededònan no, meneng ibegay se kedakel niyan diyà te doma otaw.’

²¹Iling heman kenyan se meinang diyà te otaw egkeyaman, meneng wedad aneng-aneng din diyà te Timanem.”

²²Minikagi si Jesus diyà te menge tinoledaan din, “Yan se doun te mikagi a den diyà kenyo, ikà niyo egketetana tepad te keogpà niyo aw eden se kànen niyo. Ikà niyo heman egketetana tepad te lawa niyo aw eden se ekasan niyo.

²³So binegayan kaw den te Timanem te ontò meelagà, sìyan pedowan niyo aw lawa niyo, yan ikà niyo egketetana tepad te kànen aw ekasan niyo.

²⁴Eneng-enengi niyo tepad te menge owak. Kenà dan egpenanem. Kenà dan heman eglegani. Wedad heman pol egsolan dan te kànen. Meneng gayed dan egbegayan te Timanem te kànen. So eg-ipaten te Timanem se kedita te manok te kebenesan pengkey iling te wedad keelagà dan, ontò kaw din ipaten, so meelagà kaw pa diyà te kedita te manok te kebenesan.

²⁵Pengkey metetana kaw, meneng eked pegkelayat se omol niyo pineokit te ketetana niyo.

²⁶Aw eked kaw pekeinang te dedeitek, ikà niyo egketetana tepad te labi pa dakel.

²⁷Eneng-enengi niyo se bolak te kebenesan. Gayed dan egtilles pengkey kenà dan egterbaho, aw kenà dan heman egpengabel te penenaktun. Meneng eneng-enengi niyo se kagi ko seini. Pengkey mèpiya se bawa te penenaktun te selotan si Solomon gebii, meneng labi pa mèpiya se bawa te bolak te kebenesan.

²⁸So ininang te Timanem mèpiya se bawa te bolak te kebenesan pengkey sonogen iyan te eked kenamay, labi pa metoman se peg-ipat din kenyo. Meneng wedà pa kedì kelobos se pegsalig niyo kandin.

²⁹Ikà niyo egketetana tepad te kànen niyo aw inemen niyo. Ikà niyo heman egdowa-dowa.

³⁰Se kedita te otaw kenà egsalig te Timanem, gayed dan egketetana tepad te keogpà dan. Meneng netegahan den te Timanem se kepulukan niyo.

³¹Yan pelowani niyo se Timanem diyà te kenyo pegkeotawun, aw yan begayan kaw din heman te keilangan niyo.”

³²“Ikà niyo egkelemitan. Pengkey pilabok kaw, meneng pinemallì kaw te Timanem amon megpesakop kaw diyà te peglowan din.

³³Keilangan ibeligyà niyo se kededònan niyo, aw ipemegay niyo se kwarta diyà te otaw nelimahan. Aw yan se inangen niyo, metipon kidoen te langit se ontong niyo eked palos pegkedaet, so eked iyan ketakaw kidoen, aw eked iyan heman kebàti.

³⁴Aw kenan ketipon se ontong niyo, yan heman se keeneng-enengan niyo.”

³⁵“Keilangan megpeketagad kaw te pengkey eden se domateng. Mèpiya aw iling kaw te menge sineligan egtagad te pegdateng te amo dan lekat te pista. Pengkey delem, gayed dan egpelegdeg te solò aw egpenaol dan amon somongon dan kandin te pegdateng din.

³⁷Aw domateng se amo dan, ontò dan meluba aw wedà dan tedogi aw neketagad dan. Eneng-enengi niyo se kagi ko seini. Mèpiya se inangen din diyà kandan. Meg-ekas se amo dan, aw sikandin se megpepenenoo kandan kidoen te lemisa aw megpekaen kandan.

³⁸Pengkey domateng se amo dan te tengà te delem, aw pengkey mata-mata te iselem, ontò dan meluba aw meketagad dan te pegdateng din.

³⁹Meneng ikà niyo eg-iling te tig-apò te balay timedogi aw wedà peketagad te pegdateng te menenakaw, so aw ketegahan din aw kano dateng se menenakaw, yan meketagad sikandin, aw eked ketekawi se balay din.

⁴⁰Yan se doun te keilangan gayed kaw megpeketagad, so domateng a Timanem Migpekeotaw te eked niyo ketegahi aw kano.”

⁴¹Mig-insà si Pedro, kagi din, “Pengolo, sinu lay se inikegiyan no te tegdeyanan sìyan? Diyà olò kenami, aw diyà te kedita te otaw?”

⁴²Minikagi si Jesus, “Se otaw egkeseligan aw biyasa eg-inang te kedita, yan se inangen te amo din egpengibing te kedita te doma otaw doton te balay din, amon memegay kandan te kànen te kelikit te aldaw.

⁴³Aw domateng se amo din, ontò meluba se sineligan aw gayed egtolò te impunù te amo din.

⁴⁴Eneng-enengi niyo se kagi ko kenyo seini. Aw yan se inangen din, meinang sikandin egpengibing te kedita doton te balay te amo din.

⁴⁵Meneng aw meg-aneng-aneng se sineligan te menamay pa se pegdateng te amo din, aw egbedasen din se doma sineligan pengkey meama aw bayi, aw gayed sikandin egpengaen aw eg-inem aw egkelasing, medaet iyan,

⁴⁶so domateng se amo din te aldaw wedà din pelimani. Ipelumun sikandin te amo din, aw eked heman todà keseligi, so wedà tolò.

⁴⁷“Nayan, aw metaga-taga se sineligan aw eden se ibeg te amo din, meneng eked tolò kenyan, ontò sikandin ipelumun.

⁴⁸Meneng aw doen salà inangen te sineligan wedà ketaga-taga aw eden se ibeg te amo din, ipelumun heman sikandin, meneng kenà ontò. Se otaw binegayan te dakel, keilangan ontò mèpiya se pegpengibing din kenyan. Se otaw dakel se insalig te doma otaw kandin, keilangan ontò sikandin egkeseligan.”

⁴⁹“Dimini a amon ibingen ko se iling te apoy dini te tanà, aw ibeg ko peden mekelegeb iyan diyà kenyo seini.

⁵⁰Meneng keilangan onà a kelimahan. Ontò melima se pegtagad ko kenyan. Ibeg ko peden mepenga den.

⁵¹Ikà niyo eg-aneng-aneng te dimini a amon doen kelinaw te otaw dini lanto te tanà. Meneng penenalan kaw te kagi ko diyà kenyo. Labi pa megpedàtay se otaw te pedowan tandà te pegdateng ko,

⁵²so lekat seini, eked pegsebad se otaw eg-ogpà diyà te sebad balay. Aw lima dan, telo besi se megpelenged kanak, aw dowa se megpoon kanak.

⁵³Pengkey telebatà, eked dan pegsebad. Pengkey teleogangan, megpedàtay dan te pedowan tepad kanak.”

⁵⁴Minikagi heman si Jesus diyà te otaw netipon, “Aw kitaen niyo te domelem se egselepan te aldaw, ketegahan niyo te modan te eked kenamay, aw penga niyan metoman modan.

⁵⁵Aw mebandes se kelamag lekat te polò, ketegahan niyo te meinit kwani se aldaw, aw penga niyan metoman iyan.