San Lucas 12:15-55

¹⁵Maimua ĩchab thum aig narr khʉʉnagpa magjim anʉm: —Khĩirjug paraa aajeet. Oob pãrau sĩi nem khĩir thum paarpaju appaita khĩirjumiet ajim anʉm. Pãrau nem thum wai naawia khãijã pãar ëu meebamgui ajim anʉm.

¹⁶Mag jaaupʉ̈pʉ̈igmamua ĩchab amag mʉg nem ĩgkhaadam jaaujim aajem: ’Woun ãb phatkhon paraam sĩerrau nem jĩirjim aajem. Mag ich nem jĩirtarr thum eeuwia deg paa auwia oowai chi ãkhaajem di dʉ̈rr khaba thʉnaajim anaabá.

¹⁷Magbaawai khĩirju oo sĩi awia ich wir aigpai, “¿Mua jãgata abarkhiina?” ajim anʉm, “ya mʉg mʉ nem ãkhaajem dijã phẽu thʉnʉm.”

¹⁸Mag khĩirju oo sĩi awiata, “Ãa” ajim anʉm ich appai. “Jãgan mua mʉch khöju nem ãkhaajem di jãg thʉnʉm thu wërppʉ̈iwia deeumta jũrr nem dapag ëukha aujugui” ajim anʉm, “khoojem nemjã thum dʉ̈rr awia juagam nempa thum ãba dʉ̈rr amkhĩir.

¹⁹Ya mag ëu aaipagkhanaa ãba paa thʉnʉisiewain chadau sĩi año khapan phithurg chukhu ag eempai au khö chirsijugui” ajim anʉm. Maimua, “¡Jöo! Magbaawain chad mʉg woun sĩi degpai jua ʉ̈inaa, mʉchdëu khöm aig thachjã khönaa, dödöjöjã biwaa döbaadee sĩi onee ajugui” ajim anʉm, ichdëupai ichig.

²⁰’Maimua chadcha mag ichdëu khĩirju sĩerrjö di dapag ëukhanaa ag ee thum ãba paa sĩsiewai jũrr Ẽwandamau irig magjim anʉm: “Khĩirjug chukdam, nau ĩsim edaar pʉ meejugui” ajim anʉm. “Mag pʉ meebaadeewai, pʉ nem jãg thʉnʉm paarpaag pʉ phithurg wautarr ¿jãga aagauma?” ajim anʉm. “Par pʉ phithur awia pua tag oobamgui” ajim anʉm Ẽwandamau.

²¹Mag nem ĩgkhaa ĩgkha öpʉ̈iwia jũrr aig narr khʉʉnagta, ’Ich jãgta aajemgui ajim anʉm ĩchab, ar sĩi mʉg jẽb gaaipai phatkhon pöm paarpawia, nem khĩir thum paraanaa, sĩi Ẽwandamag oobamjöo aajem khʉʉn.

²²Maimua mag ich dʉ̈icha ogdʉba wënʉrraajerr khʉʉnagta, ’Mua pãrag jaaukhimgui ajim anʉm: Oob pãrau “¿khani khöjuuta maach mʉg nʉma?” awia ökhĩirjuu amiet. Wa magbam khai, ya khajũajã chukhu nʉm, “¿khani jũajuuta mʉg nʉma?” a khãijã khĩirjumiet ajim anʉm.

²³Pãarta nem khoojem nem khãyaujã ajapchanaa khajũa khãyaujã ʉ̈rʉʉcha balee sĩsidʉmgui ajim anʉm, Ẽwandam dau na. Jãg ichdëu pãar ompaatarrjö, pãrau nem ig nʉmjã irua deebajup.

²⁴Pãadë khĩirjubat ajim anʉm, kuerrb jãga naajẽ. Am phidkhaba aajeewai amach thach khöju ãkhaagjã di chukhu naab mamʉ, am augchëba aajemgui ajim anʉm, ich Ẽwandamauta amag phathau deejeewai. Magʉm pãar chará nemchaain khãyaujã ajapcha naawai, ¿jãga irua pãrag ooba abarju?

²⁵Oob atcha pãachdëu nem ig nʉmta khĩirju nʉʉ amiet ajim anaabá. Mag pãrau pãachdëu khõsimta ig nʉʉ akhiinjã, ¿khaíuta mʉg nʉm aig mag ichdëu khĩirju sim gaaimuapai ich meeju arr ʉ̈r oradam ãbpai khãijã ich iiupiju aai sĩ? ajim anʉm.

²⁶Pãrau jãg phithur khabam nemdampaijã pödba nʉm, ¿khanthee warag pãachdëu nem ig nʉmjã pödba nʉmta warag ãba aata khĩirju nʉʉ aju aai nʉ? ajim anʉm.

²⁷Pãadë ar pamaardam ooihmʉ thʉnaajem khĩirjubat. Am ĩchab bʉ̈ʉrjã phidkhajã phidkhaba, ni amach khajũa jũaju khĩirjuwia kha ẽkha nʉʉjã aba aajem. Mag naab mamʉ iwiir ãbmuajã am dʉ̈i barba aajemgui ajim anʉm, ooimʉg athee. Warrgar rey Salomón khararraujã phatkhon pöm paraanaa nem ajaphampa paraa aajerraujã pamaardam ooimʉgjö chan pöd khajũa jũaba aajeejimgui ajim anʉm.

²⁸Pamaar jãg ooimʉ thʉnʉm edau wʉʉbaadëmuapai khiugphëbaadeewai sĩi khʉʉijemjã Ẽwandamau jãg ooimʉ wai sĩejemta, ¿jãgwia pãar pamaar khãyaujã ʉ̈rʉʉcha balee nʉmua nem jëeu nʉmta irua deeba abarju? ¿Wa pãachdëu jëeu nʉmjã pöd deebajupii aajẽwa? ajim anaabá.

²⁹Pãach thach khö nʉm dʉ̈i dödöjö döju chan oob pãrau atcha khĩirjumiet ajim anʉm. Wa jãga pãachdëu nem ig nʉm paarpajujã oob khĩirjumiet.

³⁰Pãrau khaphʉ nʉmgui ajim anʉm, õor thum Ẽwandam iek ʉ̈khabam khʉʉnta magʉm nem khĩirju phöbaadëmjã pʉaba sĩerrjëem. Mamʉ pãar Aai Ẽwandamau pãrau nem ig nʉmjã thum khaphʉ sĩewai pãar chan warm khʉʉnjö magju khaba nʉmgui ajim anʉm.

³¹Mag khãyau warag Ẽwandam ipierraa ajuuta khĩirjubat. Pãrau chadcha magmʉn, tagam nem pãachdëu igbarmjã irua deeb khaba deejugui ajim anʉm.

³²’Pãar chi mʉ bʉ̈ ogdʉba wënʉrrʉm khʉʉnan chadcha khapan khaba durrum. Mamʉ khapanag ee pãach appai khapan khaba nʉm awia oob nem ökhö wënʉrramiet ajim anʉm. Pãrau maach Aai ipierraa amʉn, irua ich durr pãar phë arr nʉm ora pãar dʉ̈i nem ajapha aju.

³³Pãach nem wai nʉm përkhʉʉimamua chi phatkhon aphʉʉm khʉʉn oomampierr jigpetat ajim anʉm. Magbaawai pãrau ʉ̈gtharm phatkhon jẽeuba aajemta paarpajugui ajim anʉm. Nem ajapham pãrau mag wai nʉisim chan bʉ̈ʉrjã öbam. Ma mʉg jẽb gayam phatkhon khĩir khaba aawai nem jĩgkhaag chi ajaphamʉu awiajã pöd aubam, ni comejenaujã ag ee dikhabamgui ajim anʉm.

³⁴Mʉig jẽb gaai nʉweta nem thum paraa aju khĩirjuju khãyau, ʉ̈gthar paawaita nem thum paarpaju khĩirju wënʉrrʉmʉn magan chadcha pãar khĩirjug ãba Ẽwandam gaaita simgui ajim anʉm.

³⁵Mag jajawagmamua ich bëeju igwia magjim aajem ĩchab: ’Õrau amach patrón õor jua pʉr nʉm aar matarr deeu bëeju nʉ nʉmua daukhana õtdau phuu nʉajemjö, pãarjã ĩchab ajapha khĩir khaug nʉisit ajim anʉm, mʉ bëeju nʉawai. Mag õrau amach patrón barbaicheewai weeu awaag nʉajemjö, mʉ bëejuuta nʉbat ajim anʉm.

³⁷Pãrau khaphʉ nʉmgui ajim anʉm, ar chi chognaan mag daukhana amach patrón nʉ nʉm khʉʉnan onee aju, i barbaicheewai. Mag amau daukhana ich nʉ nʉm oobaicheewai, ichta jũrr chi chogkha simjö am sĩi nʉmich, mes gaai thach thöikhawia am jãogjugui ajim anaabá, ich garmuata.

³⁸Chi chognaan amach patrón edacha pamjã bëeba ni ãspajuag pamjã bëeba sim ee warag daphökagjã igba nʉ nʉm khʉʉnan onee ajugui ajim anʉm, i da bëeba awiajã ich pierrwai amach dʉ̈i ajapha aju khap.

³⁹Pãrau khaphʉ nʉmgui ajim anʉm, ãbmua khãijã ich di aig nem jĩgkhaan bëeju ora khaphʉ akhiin, bʉ̈ʉrjã khãiba warag sĩi thʉa ëeju, ʉdʉʉr ich nem jĩgkhapiba.

⁴⁰Magua muan pãragjã “Ich agjöta ajapha khĩir khaug nʉisit” a chirʉmgui ajim anʉm. Pãrau mʉ bëeju ora chan ãbmuajã khaugbam. Pãrau mʉ da bëebajupii nʉm ee, mʉch chi Emkhooi Iewaan dëgölp barchëju a jaaumajim aajem.

⁴¹Magbaawai Pedroou Jesuug, —Señor, pua mag jaau sim, ¿maragpaita pua jaau chirʉ́, wa thumaam khʉʉnagwa? ajim anʉm.

⁴²—Pãragpai khabamgui ajim anʉm; mua mag chirʉmʉn pãach thum chi mʉ iek ʉ̈kha nʉm khʉʉnagau. Magnaa, Pãadë ũrbat ajim anʉm: khanim nemjö patrón ãb simua ich chaaug maagpaawai ich chog ãbamʉg warm khʉʉn pörkhapinaa ich magʉgpai ich nem thum jaau pʉabajëm.

⁴³Maimua mawi, mam sĩi awi deeu bëewi ichdëu jaau pʉarrjö phidkha sim oobaicheewai, ¿mag jöoi ich chog dʉ̈i onee sim dʉ̈i chi chogjã onee abaju khai?

⁴⁴Mag ajapha phidkha sim oobaicheewai jöoirau warag ich nem thum magʉgta thʉsĩepʉ̈ijugui ajim anʉm, ich dënjö khap amkhĩir.

⁴⁵Mamʉ magba mag ichig nem jaautarrjã ich ödegpai, “Mʉ patrón chan da bëebam” awi nem khaibag ich khapeen jũrr ich jua eegpaim khʉʉn dʉ̈i ichdëu ampierr anaa, nagjã ichdëu döm aig dönaa, thachjã ichdëu khöm aig khömʉn,

⁴⁶chi dikhʉ bʉ̈ʉrjã irua nʉba sim ee bëewi mamagkham oobaichee, jũrr ichdëu warm khʉʉn dʉ̈i aajerr khãaijã i gaai athuucha wʉnaa, phidag eemuajã barpʉ̈inaa, chi khaigbacharam khʉʉn dʉ̈i ãba sĩujugui ajim anʉm.

⁴⁷Magua pãadë mʉ iek ũrbat ajim anʉm: ãbmua khãijã ich patronau ichig nem jaau pʉatarr khaphʉ simta, dëgölp ich oochëjujã khĩirjuba, ni bʉ̈ʉrjã irua nem khõsim nemjã waubamʉn, mag patronau ich bëem ed i gaai mas deejugui ajim anʉm, bʉ̈ʉrjã dau aug khaugba. Ich agjöta ajugui ajim anʉm ĩchab Ẽwandamau, ar ajapha wënʉrraju khaphʉ nʉmta nem khaigba waaujem khʉʉn gaai.

⁴⁸Mamʉ ãbmuata khaugba aawai nem khaigba waumʉn, Ẽwandamau i gaai mas ab khaba mas ajup mamʉ, agpierrpai deejugui ajim anaabá. ¿Pãrau oowai ar nem dʉ̈rrcha deetarrag agjö ich deetarrpierr dʉ̈rrcha jëeuba aajẽ? ajim anʉm. Mua pãrag magkhimgui ajim anʉm: Thumaam khʉʉnau Ẽwandam athee nemdam bʉ̈rʉʉm awiajã wauju aai nʉm. Ar chi ʉ̈rʉʉcha wauju khaphʉ nʉm khʉʉnag irua ich agpierr dʉ̈rrcha jëeujem. Maimua ar ich athee nem dʉ̈rrcha wauju pödba nʉm khʉʉnag irua agjö ich agpierr bʉchkhunpai jëeujemgui a jaaumajim aajem.

⁴⁹’Mʉʉn mʉg jẽb gaai õor durrum khʉʉn ee mʉch iekta phũak phuu wëjöm ee õtdau dʉrbapʉ̈imjö apienta bëejimgui ajim anʉm, ich Jesuu. Ya mag õtdau pa sim, mamʉ mʉchdëu khõsi chirʉmjö warag uu pa jẽerdʉmaa akhiin ajapcha akhamgui ajim anʉm.

⁵⁰Mamʉ magaagan õor jua machgau agtha ajappha dau aug wauju waaur chirʉmgui ajim anʉm. Mʉch dʉ̈i õrau magju thumaa khĩirjubaadeewaita ökhĩirjug pöoma chiraajem; mamʉ ichiita ich mag ajugui ajim anʉm.

⁵¹¿Pãrau khĩirjuawai mʉ sĩi pãar khõinaa bibigag chukkhu naamkhĩirta bëejĩ? Pãar magamkhĩir khabajim. Mʉg mʉ bëetarran mʉg mʉchdëu Ẽwandam iek õrag jaau chitʉm gaaimua õor khĩirjug aaiphur warag chaaur khĩirju nʉrrjëe amkhĩirjöta bëejimgui ajim anʉm.

⁵²Mua mag chirʉmʉn, mʉg mua jaau chitʉm gaaimua ãbam deg khãijã cinco naajem khai, õor thãrjupam khʉʉnau jũrr numiim khʉʉnau mʉ iek ʉ̈kha durrum khʉʉn ichaaur iekhaju aawaita mag chirʉmgui ajim anʉm. Wa magbam khai, jũrr numpaim khʉʉnau khãijã thãrjupam khʉʉnau khĩirjug ajapham wai durrum khʉʉn igar khaba wënʉrrajugui a jaaumajim anaabá.

⁵³Magphöbaadeewai chi ayau mʉ iek ʉ̈kham khõsi ʉ̈kha sim ee, jũrr chi chaairau mʉ iek ʉ̈khamapha ajugui ajim anʉm. Ʉʉinjã agjö, chi ãdau mʉ iek ʉ̈kham khõsi ʉ̈kha sim ee, jũrr chi khaau bʉ̈ʉrjã mʉ iek ʉ̈khamapha ajugui ajim anʉm. Wa magbam khai, chi phaauhũanau mʉ iekdam ich ãigog jaau khitaawai, jũrr chi ãigou ich phaauhũan ichaaur ajugui ajim anʉm, mʉ iek ʉ̈khamaaugau.

⁵⁴Maimua õor khapan ĩchab aig narr aawai amagjã magjim anʉm: ’Edau duubjem garta edjã khĩbaadeewai, “Nosegan urum” aajem pãrau; chadcha ich maagjemgui ajim anʉm.

⁵⁵Maimua ar phũ khãijã dokhẽu garmua phua thʉnʉisiewai, “Edau pechag wʉʉju aawai” aajem pãar iek; magʉm ed chadcha ich mag pechag kheeujemgui ajim anʉm.