LUKA 12:15-55

¹⁵Ndipo iye adawawuza pomwe kuti: Khalani na cheru kuti muleke kucita m'tima loko-loko na cinthu, nakuti moyo wa munthu ulibe basa na kuwanda kwa bzinthu bzacebzo.

¹⁶Na tenepo iye adawatsikira pomwe matere aciti: “Pakhana munda wa munthu m'bodzi nyakudala omwe udakosa bzakudya bzizinji kwene-kwene.

¹⁷Ndipo iye adakumbuka mumtima mwace kuti: 'kodi ine-pano phoso limweri ndini likoya kuponi?

¹⁸Ndipo iye adalewa kuti: 'Ndin'dzapfudza magwangwa yanguya ndicidzamanga yanango makulu ndipo ndicidzakoya m'mwemo phosolo na bzinthu bzangu bzinango.

¹⁹Pamwepo ine ndin'dzalewa na mumtima kuti: 'Moyo wangu una bzinthu bzentse bzomwe un'funa bza magole mazinji, tsapano derekha, udye, umwe, udakondwa.'

²⁰Tsono Mulungu adamuwuza kuti: 'Nandi dzengawe! Usiku buno unifa iwepo. Kodi apa mbani an'sala na bzinthu bzomwe udakoyabzi?'

²¹Na tenepo, bzidakhala ninga munthu nyamingululi omwe ana cuma cizinji kwene-kwene, tsono alibe kupasa Mulungu cinthu.

²²Na tenepo Jezu adawacenjeza ateweri wace kuti: “Lekani kukhala na thupo mumtima kuti mun'dzadyanyi ayai kuti mun'dzabvalanyi nthupi mwanumu.

²³Nakuti moyo ngukulu kuposa cakudya, na thupimbo lina basa kuposa cakubvala.

²⁴Ndipo onani akhungubwe. Iwo ambalima lini, ambabvuna lini, alibe magota ayai magwangwa. Ndipoi Mulungu ambawadyesa basi. Tsono imwepo mun'funika kwene-kwene kuposa mbalamezo!

²⁵Kodi mbani angakhale nathupo na moyo wace ndipo angakwanise kubzithumizira pomwe ntsiku ibobzi?

²⁶Na tenepo penu imwe mun'kwanisa lini kucita bzinthu kang'onobzi, thangwe ranyi muna thupo na bzinthu bzinango?

²⁷Tsono onani maluwa momwe yambakulira! Ndipo iyo yambaphata lini basa ayai kusona bzakubvala. Napo Salomau na mbiri yentse yomwe akhanayo, akhalibe bzakubvala bzakugaka bwino kuposa maluwayo.

²⁸Ninga momwe Mulungu ambabvazikira mausuwa ya mthengo, yomwe yambamera ninga lero mangwana yacipsa na moto. Napo imwepombo ndimwe wanthu wakusaya cikhulupiropa, kodi iye angakwanise lini kukubvazikanimbo?

²⁹Na tenepo lekani kukhala na thupo kuti mun'dzadyanyi ayai kuti kun'dzamwanyi.

³⁰Thangwe wanthu wa mudziko, ndiwo ambafunisisa bzentsenebzi. Tsono Babanu an'dziwa kale kuti imwepo mun'bzifuna.

³¹Tomani mwanyang'ana umambo bwa Mulungu. Ndipo bzinthu bzinangobzo Iye an'dzakupasani.

³²Nandi tubzifuwo tuwangu, lekani mantha! Nakuti Babanu an'funa kukupasani umambo bwace.

³³Na tenepo gulisani bzinthu bzanu, mupase anyakusauka. Ndipo sonani mabudu yomwe yan'sakala lini. Nakuti cuma ca kudzulu cimbamala lini, komweko kulibe mbava, ayai manthedza kuti yangajete.

³⁴Nakuti pale pomwe pana cuma canu na mtima wanu uli pamwepombo.

³⁵Ndipo kondzekerani kuti muphate basa. Mibvuniko yanu ikhali idagaka.

³⁶Na tenepo khalani ninga anyabasa ali kudikhira mbuya, omwe an'bwerera kucokera kucikondweso ca malowozi. Ndipo iye akafika akadzagugudza msuwo mudzam'fungulire na kankulumize.

³⁷Ndipo wakusimbidwa mbaanyabasa wale omwe Mbuya akabwera an'dzawagumana adamudikhira. Ndiri kukuwuzani cadidi kuti iye an'dzawakhazika patsantsali la kudyera iye acibvala ndipo aciwatumikira.

³⁸Ndipo wakusimbidwa pomwe n'bale omwe mbuya an'dzawagumana adamukhalilira napo n'pakati pausiku ayai madandakweca.

³⁹Na tenepo dziwani kuti penu mwenekaciro nyumba angadadziwa nthawe yakubwera mbava, ndipo iye angadailekerera lini kuti ichole nyumbayo.

⁴⁰Na tenepo khalani wakukondzekera nakuti Mwana wa Munthu an'dzabwera panthawe yomwe imwe mukhadikhira lini.

⁴¹Pamwepo Pedru adabvunza kuti: “Nandi Mbuya, kodi muli kutsikira matereya ife tekha ayai kuna wanthu wentse?”

⁴²Ndipo Mbuya adatawira aciti: “Kodi mbani msunga cuma wandzeru na wakukhulupirika, omwe mbuya angadzamusiire panyumba pace kuti ambadzagawire phoso andzace nthawe ikakwana?

⁴³Wakusimbidwa ni msunga cuma ule omwe mbuya wace akabwera an'dzam'gumana acicita tenepo.

⁴⁴N'cadidi kuti iye an'dzam'pasa mpando ukulu wakumbawonerera bzinthu bzace bzentse.

⁴⁵Tsono nyabasa ule omwe angadakumbuka kuti: “mbuya wangu ali kucedwa kubwera.” Ndipo iye aciyamba kutukwana na kumenya anyabasa andzace wale, wacimuna na wacikazi. Ndipo acimbadya na kumwa aciledzera.”

⁴⁶Ndipo pantsiku yomwe an'dzafika mbuya waceyo pomwe angadzafika mbuya waceyo, pantsiku yomwe iye akhamudikhira lini. Ndipo iye adzamulum, acimucosa basa.

⁴⁷Napo iye acidziwisisa bzomwe bzin'funa mbuya wace iye akasaya kucita na kubziteweza, adzachangidwa kwene-kwene.

⁴⁸Ndipo ule omwe akhandziwa lini bzomwe bzikhafuna mbuya wace, akacita bzinthu bzakuipa, na tenepo an'dzachangidwa pang'ono. Tsono ule omwe an'tambira bzizinji an'dzasundidwambo bzizinji. Na ulembo ule omwe an'khulupiridwa na bzinthu bzizinji, iye an'dzasundidwambo bzizinji.

⁴⁹Ndipo ine ndidabwerera kudzaphatiza moto padziko la pantsi. Na tenepo ndikhafuna kuti nthawe ino ukhale uli kugaka kale!

⁵⁰Ine-pano ndina batizo linango kuti nditambire. Tsono ndina ciya mpaka iro licitike.

⁵¹Kodi mun'kumbuka kuti ndidabweresa m'tendere pantsi pano? Ne-ne-ne, ndidabweresa kupambulana.

⁵²Na tenepo kucokera lero mpaka kutsogolo, banja la wanthu axanu lin'dzapambulana. Wanthu atatu an'dzawengana na wanthu awiri. Ndipo awiri acidzawenganambo na atatuwo.

⁵³Ndipo baba-munthu an'dzawengana na mwana. Ndipo mwana aciwenganambo na baba munthuyo. Na ma-munthu a'ndzawenagana na mwanace wacikazi. Ndipo mwana wacikaziyo acidzawenganambo na mamaceyo. Mibzala an'dzawengana na mulowola. Na mulowolayo acidzawenganambo na mibzalayo.

⁵⁴Ndipo Jezu adawawuza pomwe wanthu wale kuti: “Mukawona m'tambo uli kukwira ucicokera kumadokero mumbalewa kuti mbvula in'bvumba. Ndipo iyo imbabvumba cadidi.

⁵⁵Ndipo mukabva condzi cicicokera kunyantsi, mumbalewa kuti lero kunipsa. Na tenepo kumbapsa cadidi.