Luku 12:15-55

¹⁵Koto laa Yesuma꞉ paeyao pa꞉ta꞉ alota꞉ Handeteke hapa꞉peke. Hande pasa꞉tei hau ta꞉ta꞉ ta꞉ta꞉ pikieki a꞉paapa꞉na꞉ ika꞉ kone wopu handeteke hata꞉ leke leke lo hapa꞉peke. Wanda꞉hali paeyaoma꞉ hamoko tieke ekipa haena꞉ kone ika꞉ da꞉ta꞉la꞉ ekina꞉ teketa꞉ ika꞉ wia haleme alemanu pa꞉ta꞉ na ula꞉me leekeme.

¹⁶Koto laa Yesuma꞉ iki pa꞉ta꞉ onkoluma꞉ pi dupa leekeme. Amba꞉ a꞉nda꞉ta꞉ mo hamoko hali ma꞉nda꞉na꞉ e pa꞉ta꞉ ne napekemanu wotu wiekeme.

¹⁷Kutupa mo halima꞉ ipika꞉ honema꞉ kone alota꞉ Mo hande ne napekemanu poka꞉ mepi pea wia꞉peke alena꞉ ana꞉ na pa꞉la꞉ma꞉ eki puluepe laa hone wiekeme.

¹⁸Kutupa ipika꞉ honema꞉ kone alota꞉ Dupulueke. Yaka ne napekemanu u hala꞉ damanu londa꞉la kutupa da tieke tiekemanu a꞉eyaata꞉ mo ne napekemanu make yaka mandane alemanu paeyao make koto da pa꞉ta꞉manu mu ulueke laata꞉

¹⁹kota꞉ ya kone dupa lolueke. Naka꞉ta꞉ yolee. Naka꞉ wia hale ale manuta꞉ bapi wotu kone ana꞉na꞉ wilieke laa Ameta꞉ pa pitu hata꞉ ne ikali nalo hata꞉ ta꞉na꞉ma꞉ homo hapeke lolueke leekepate

²⁰Koda꞉ma꞉ ipiki pa꞉ta꞉ alota꞉ Neketa꞉ hone na wiki halio. Ame do timba kone naka꞉ da꞉ta꞉la꞉eki pao yokulueke. Kutu pua꞉ka꞉na꞉ta꞉ kota꞉ nakana꞉ma꞉ naka꞉eki laa wia hale ale manuta꞉ epima꞉ milia꞉pe laa leekeme.

²¹Kutupa Yesuma꞉ pi paeyaaso alota꞉ Hali epima꞉ Dota꞉ yakaeki homekee laa alemanu wopu mu momba꞉la꞉tiki pita꞉la꞉ dina꞉ta꞉ Koda꞉na꞉ leke popelekena꞉ta꞉ pa natehali hala꞉me. Kota꞉ dupiki some a꞉nda꞉ta꞉ mo hande titina꞉ loa꞉ haumanu pa꞉ta꞉ opolo ipilieke leekeme.

²²Koto hoki naneta꞉ Yesuma꞉ ipika꞉ disaipolo haliweki pa꞉ta꞉ alota꞉ I̱ma꞉ do alo ekita꞉ ikana꞉ma꞉ iki pa hapeke ekina꞉ nemanu make lokena꞉ yama꞉peke alemanu koto alemanu pa꞉ta꞉ta꞉ ka꞉nda꞉ma꞉ na homo hapa꞉peke.

²³Pa ekipeke. Da꞉ta꞉la꞉ ekima꞉ta꞉ ne ota꞉ lombei pa꞉la꞉ make mo lokema꞉ta꞉ dau make ota꞉ lombei pu pa꞉la꞉me.

²⁴Ba manuna꞉ hau handa꞉pa꞉peke. Ikana꞉ma꞉ta꞉ e wae alemanu na nokopata꞉ na mondu no halememe. Ika꞉ sidowa o ne amu pu u haleme da ma꞉nda꞉ na hala꞉me. Koda꞉ma꞉ taa halo hala꞉ handa꞉e. Koto ekina꞉ta꞉ ikana꞉ma꞉ mo ba manuta꞉ taa lu ankulalemetaa.

²⁵Iki ma꞉nda꞉ epima꞉ ipika꞉ hone wopu wita꞉la꞉ ekima꞉ ipika꞉ do kenkena꞉ halo pa꞉la꞉ nate leke manuta꞉ mu moneao ulu pua꞉peke ya꞉la꞉pe.

²⁶Kota꞉ koto hosiki ale siki kone na pea꞉peke ya꞉ka꞉na꞉ta꞉ pa ekipeke mo mandane ale pa꞉ta꞉ manuta꞉ ka꞉nda꞉ma꞉ homo halemepe.

²⁷Mo hapeke pa꞉ta꞉manu pa opa꞉la꞉ moma sununa꞉ opa꞉la꞉ ekita꞉ handa꞉pa꞉peke. Ikana꞉ma꞉ta꞉ e na poko make aka꞉manu na tombulu yamo halememe. Koto pa꞉la꞉pate I̱ma꞉ iki pa꞉ta꞉ alome. Kini Solomonoma꞉ta꞉ hamoko alemanu wotu wiekepate kone do moma manuna꞉ loke hake dau epeke epeke ekimanu ma꞉nda꞉ ota꞉ na wia hayekeme.

²⁸Mo ame homeke opa haena꞉ laa beliata꞉ tunkula hapuao tina꞉ yanka꞉peke yeke ambu manuna꞉ au kone Koda꞉ma꞉ lawao haya꞉ka꞉na꞉ta꞉ a꞉pei kota꞉ ika꞉ hone tulaaseme ekita꞉ ota꞉ hodiki ale siki ya꞉ka꞉ta꞉me. Koto alemanu pa꞉ta꞉ kone Koda꞉ma꞉ kutu pu haya꞉ka꞉na꞉ta꞉ kota꞉ ipikana꞉ma꞉ iki make dau ota꞉ ana꞉na꞉ kone yamatiki pilieke.

²⁹Kutu piliekema꞉ ikana꞉ma꞉ta꞉ Ya nolo polo ne ikali hanema꞉ epea꞉ka꞉na꞉ mulua꞉pe laa ka꞉nda꞉ma꞉ na homo hapa꞉peke.

³⁰Mo Koda꞉na꞉ biki na opeleme wanda꞉halima꞉ta꞉ hoto paeyao koto alemanu hone wopu u halememe. Pate ika꞉ Apa꞉ma꞉ta꞉ koto alemanu nate paeyao ikana꞉ma꞉ mu halo peleme ekita꞉ hone ula꞉me.

³¹Koto pa꞉la꞉ ekina꞉ta꞉ ikana꞉ma꞉ta꞉ Koda꞉na꞉ Kilu Tombuao Hala꞉eki amba꞉la weiyu haemeka꞉na꞉ta꞉ kota꞉ ipikana꞉ma꞉ mo koto ale manuta꞉ haka꞉ta꞉pao ku halieke.

³²Yaka sipisipi ma꞉na꞉ tapake sikio. Paala꞉ma꞉ na homa꞉pa꞉peke. Pa ekipeke ika꞉ Apa꞉ma꞉ta꞉ oli hande Kilu Tombuao Hala꞉ ekita꞉ iki pa꞉ta꞉ kuluekema꞉ta꞉ ta꞉na꞉ma꞉ homo hala꞉me.

³³Ika꞉ ala꞉ta꞉ ala꞉ta꞉ta꞉ tapao mani meaata꞉ mo natehali wanda꞉hali pa꞉ta꞉ hala꞉pa꞉peke. Kutupa na kukutu pulu pa꞉la꞉ mani pausa meaata꞉ ika꞉ hamoko ale manuta꞉ oli ya nane na paeya꞉niake pa wia halo pelemeeki homeke amu pu hapa꞉peke. Ekipeke koto naneta꞉ mo pake no haleme haliwekima꞉ make bisapu inkikima꞉ make na hoeyaalimikie.

³⁴Ika꞉ hone manuta꞉ mo ika꞉ epeke epeke alemanu u haleme ale pa꞉ta꞉ mandakena꞉ u pelia halimikie.

³⁵Ikana꞉ma꞉ta꞉ mo e pokaasa꞉ haliweki tupa꞉ hata꞉ta꞉ ika꞉ you halita꞉ hali ma꞉nda꞉ma꞉ wanda꞉ panake mea ne pamba꞉la꞉ ekina꞉ pa꞉leke handaa paa epena꞉ yu wia haleme tupa꞉ ikana꞉ma꞉ta꞉ ika꞉ aka꞉manu wotu soto la꞉tia haena꞉ yama ika꞉ ola꞉pakemanu ka꞉watia hata꞉ta꞉ anemone ipilia꞉ ekimanu lekema꞉ lekema꞉ pitolo hata꞉ hao hapa꞉peke. Koto ekina꞉ta꞉ mo you halima꞉ a꞉pa pota꞉ lia꞉ka꞉na꞉ta꞉ kota꞉ koto kone lombilimikie.

³⁷Kutupa mo you hali paa la꞉ka꞉la a꞉pa mo ipika꞉ e pokaaseme hali wekita꞉ u̱ na polu pitiki a꞉nda꞉ pa ipiki yu wia pilimieki a꞉pa handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie. I̱ma꞉ iki pa꞉ta꞉ ota꞉ pi aloma꞉ Mo haliwekima꞉ koto hau pimiki yeke handaa ika꞉ you halima꞉ta꞉ ipika꞉ manda aka꞉ hola wiaata꞉ iki pa꞉ta꞉ Ne no hala꞉ alena꞉ a꞉pa pita꞉pe laa ne pana꞉ pu kilieke.

³⁸Kutupa make mo you halita꞉ buta꞉ hokina꞉ o hoki nane kone epea꞉ka꞉na꞉ ikana꞉ma꞉ tiki tiki yao ipiki yu wia pilimieki handea꞉ka꞉na꞉ta꞉ kota꞉ ikita꞉ ta꞉na꞉ma꞉ homo halimikie.

³⁹Kutupa make doeki hone wotu wia꞉pa꞉peke. Mo da teke hali ma꞉nda꞉ma꞉ mo pake nala꞉ hali ma꞉nda꞉ epolo pa꞉la꞉eki amba꞉ handa꞉ wia꞉ka꞉na꞉ta꞉ kota꞉ koto someta꞉ oni ipika꞉ da yamba꞉la na yapena꞉ lelieke.

⁴⁰Iki make ota꞉ tikitiki yao hapa꞉peke. Pa ekipeke. Mo hande Wanda꞉halina꞉ Eiyeketa꞉ ipilieke hone na witolo halimi di nina꞉ ipilieke laa loa꞉me leekeme.

⁴¹Pidama꞉ alota꞉ Tekehalio. Nakana꞉ma꞉ do ale onkoluma꞉ pita꞉ niki pa꞉ta꞉ homeke alepe o mo wanda꞉hali paeyao pa꞉ta꞉ alepe laa lota꞉ piekeme.

⁴²Koto leeke mo Tekehalima꞉ Pidana꞉ pi hombo peaaso alota꞉ Kima꞉ na homeke make ota꞉ epeke hone wotu u lenkene pu wia e poko halia꞉ halita꞉ epi ya꞉ka꞉ta꞉pe. Koto halita꞉ mo da teke halima꞉ta꞉ ipika꞉ da handeteke haena꞉yeke make mo ipika꞉ mandane e pokao haleme wanda꞉hali pa꞉ta꞉ ika꞉ ne no haleme di mia꞉ka꞉na꞉ta꞉ ika꞉ ne nena꞉ teli teli peao halieke leekeme.

⁴³Ipika꞉ you hali paa la꞉ka꞉la a꞉pa ipika꞉ e pokao hala꞉ halima꞉ mo hande emanu ota꞉ epeke tupa꞉ pitolo pitilia꞉eki a꞉pa handa꞉ ya꞉ka꞉na꞉ta꞉ kota꞉ koto e pokao hala꞉ halita꞉ ta꞉na꞉ma꞉ homo halieke.

⁴⁴Ota꞉ alome. Mo you halima꞉ta꞉ koto someta꞉ ipika꞉ ala꞉ta꞉ ala꞉ta꞉ paeyao handeteke haena꞉ la꞉lieke.

⁴⁵Kutu pulu pa꞉la꞉pate mo e pokaasa꞉ halima꞉ta꞉ ipika꞉ kone alota꞉ Yaka you someta꞉ di hokulu hokulu pitolo hata꞉ a̱i̱ na ipula꞉me laa mo mandane e pokaasa꞉ wanda꞉ pita꞉ hali yaapo kini pea hali lu yombitolo hata꞉ ikali ne nalo keaaso hata꞉

⁴⁶ipika꞉ you halita꞉ Do natena꞉ ipilieke hone na witolo halia꞉ natena꞉ta꞉ koto kone opolo ipilieke. A꞉paata꞉ mo e pokaasa꞉ halita꞉ homena꞉ liaata꞉ pa pi na opiki wanda꞉hali ame̱le̱ haena꞉ la꞉lieke leekeme.

⁴⁷Mo e pokaasa꞉ hali ma꞉nda꞉ epima꞉ ipika꞉ you halima꞉ pea꞉peke la꞉la꞉ haumanu hone wia ipikana꞉ma꞉ ipika꞉ kone ana꞉ lao na piki ipika꞉ you halima꞉ pea꞉peke la꞉la꞉ haumanu na pia꞉ka꞉na꞉ta꞉ kota꞉ koto halita꞉ mo you halima꞉ dopitama꞉ podela꞉ mia꞉ka꞉na꞉ta꞉ tanda tieke nelieke.

⁴⁸Pate e pokaasa꞉ hali ma꞉nda꞉ma꞉ta꞉ ipika꞉ you halima꞉ hone pa꞉la꞉eki hone na witolo kone tanda napekeeki pia꞉ka꞉na꞉ta꞉ kota꞉ ipikita꞉ ae̱ya̱piki dopitama꞉ hosiki podela꞉ milieke. Hali ma꞉nda꞉ta꞉ mandane alemanu handeteke haena꞉ yeke anekema꞉ halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ anekema꞉ muluekema꞉ hone wilieke. Koto tupa꞉ kone hali ma꞉nda꞉ pa꞉ta꞉ ala꞉ta꞉ ma꞉nda꞉ wopu handeteke haena꞉ yeke halea꞉ka꞉na꞉ta꞉ kota꞉ mo hali pa꞉ta꞉ yama꞉ta꞉ ota꞉ ankulao anekema꞉ muluekema꞉ hone wilieke leekeme.

⁴⁹Yesuma꞉ alota꞉ I̱ epolo ekita꞉ ti ulekema꞉ do kenkena꞉ mo yaaluekema꞉ epoa꞉pate ya honema꞉ta꞉ amba꞉ kone talo hapeke alee.

⁵⁰I̱ta꞉ bapitaisi pea꞉peke hau homeke mulueke hone ulupate pa a̱i̱ na pu paeyaaso ekina꞉ kota꞉ yaka weleke pukima꞉ ka꞉nda꞉ tieke minolome.

⁵¹Ika꞉ honema꞉ta꞉ I̱ma꞉ta꞉ ika꞉ a꞉nda꞉ piteleme ekimanu homu pealo epoa꞉me hone wi witelemepe. Ota꞉ dia꞉me. I̱ta꞉ wanda꞉hali tapake tekili pawaluekema꞉ epoa꞉me.

⁵²Ame do hao kini peaata꞉ wetepena꞉ make tapakesiki yunki hata꞉ma꞉ ika꞉ kone tekilipa tepoma꞉ta꞉ yaapo pa꞉ta꞉ a꞉nda꞉ litolo hata꞉ yaapo sikima꞉ta꞉ pa tepo pa꞉ta꞉ a꞉nda꞉ lia꞉tiki pu halimikie leekeme.

⁵³Ateke tonuma꞉ta꞉ pa eiyeke ame̱le̱ a꞉nda꞉ lualu peaata꞉ eiyeke tonuma꞉ta꞉ ateke tonu ame̱le̱ a꞉nda꞉ lualu pilimikie. Inkiki tonuma꞉ta꞉ waneke tonu ame̱le̱ a꞉nda꞉ lualu peaata꞉ waneke tonuma꞉ta꞉ inkiki tonu ame̱le̱ a꞉nda꞉ lualu pilimikie. Halikina꞉ inkiki tonuma꞉ta꞉ ika꞉ aeya꞉ tonu ame̱le̱ a꞉nda꞉ lualu peaata꞉ mo aeyeke tonuma꞉ta꞉ ika꞉ halikina꞉ inkiki tonu ame̱le̱ a꞉nda꞉ lualu pilimikie leekeme.

⁵⁴Yesuma꞉ mo wanda꞉hali pa꞉ta꞉ alota꞉ Ikana꞉ma꞉ oni nate pamba꞉la꞉ nane yama꞉ ipula꞉ koa handolota꞉ kota꞉ koto kone ikana꞉ma꞉ alota꞉ Lako ipilieke lo halemeketa꞉ kota꞉ ota꞉ ipu hala꞉me.

⁵⁵Kutupa oni ka꞉wa꞉na꞉ yu nanema꞉ tilao po ipula꞉eki handolota꞉ kota꞉ ikana꞉ma꞉ koto kone alota꞉ Nate tieke talo hata꞉ titipu tieke pilieke lo halemeketa꞉ ota꞉ titipu tieke pu hala꞉me.