Lucangundru 1:34-66

³⁴Maria angelani jatana wonti: “Worderu jenia nganala nganai, ngangau ngato noa wata ngujamai?”

³⁵Ja angelali kalabana wonti ja jatana wonti: “Jaola kulikiri jinkangu ngarila nganai, ja Kapara pirnaia ngurulali jidna walpala nganai; ngangau bakana nina Kulikirila, nina jundru dankala nganai, tanali Godaia Ngatamura dikala nganai.

³⁶Ja mai, Elisabeth kamaneli jinkani bakana mandrantju nganai kankunto, ja naupini pira mara wora ja kulno nganai nankangu, nana tanali ngameri dikai.

³⁷Ngarla Godata wata ngandandarila nganai jaura pratjanani.”

³⁸Maria jatana wonti: “Mai, ngani Kaparaia mili nganai, ngakangu pantjiatimai worderu jidni jatana warai!” Ja angela nankangundru kutingana wonti.

³⁹Maria terkakana wonti tanangupini ditjini, ja palkana wonti mardawonpaia ngura kulnuja Judaiaia.

⁴⁰Ja Zachariani pungani wirina wonti ja Elisabethangu mandurini jaura jinkina wonti.

⁴¹Ja jendranguta Elisabethandru Mariani mandurini jaura ngarana wonti, kupa nankani mandrani kulkungana wonti; ja Elisabeth manamiri pantjina wonti Jaolali kulikirieli

⁴²Ja nani ngaiala pirnali maritjina wonti ja jatana lwonti: “Murlali pirna jidni nganai widlani, ja murlali pirna jinkani maadraia tandra nganai!

⁴³Ja wodajerindru jenia ngakangu, Kaparaia ngakanaia ngandri ngakangu wokarananto?

⁴⁴Ngangau mai, matja rnandurini jaura jinkani ngakangu talpani wirina, kupa mandrani ngakanani mankina kulkungana warai.

⁴⁵Ja murlali pirna nandru morlalu ngundrana paraia, ngangau morlalu jenia pantjila nganai, mina nankangu Kapara jatana paraia.”

⁴⁶Ja Maria jatana wonti: “Mungarali ngakanali Kapara jurakokala wapaia,

⁴⁷Ja jaolali ngakanali Goda Kulkanipinlandru ngakanani mankila wapaia,

⁴⁸Ngangau Nulia najina wonti nunkani mili waka. Ngangau mai, kararindru ngana jurakokala nganai kana nguja warupotujeli.

⁴⁹Ngangau ngakangu pirnala ngankana paraia Nauja ngurunguru, ja kulikiri tala nunkani nganai.

⁵⁰Ja kalumiltjamiltjarina nunkani ngujandru ngujani nganai tanangu, tana nunkangundru japali nganai.

⁵¹Nulia ngurungurula ngankana wonti ngunarali nunkanali; Nulia piltjaru ngankana wonti tanana ngara ngundranani tananani pirna ngundrateriai;

⁵²Nulia kapara worana worarana wonti pirnalaia pirindru ja wakawaka miri ngankana wonti.

⁵³Tana maua nganana, Nulia potujeli manamiri ngankana wonti; ja tana poto pirnanto Nulia kala jinpana wonti.

⁵⁴Nulia Israeli milini nunkanani marangokana wonti kalumiltjamiltjarina nunkani ngundrala.

⁵⁵Worderu Nauja jatana wonti ngaianani ngaperi worani, Abrahamangu ja ngatamurani nunkanani ngurali.”

⁵⁶Maria nankangu jela pira parkulu ngamana wonti, ja ngadani pungaia nankanaia tikana wonti.

⁵⁷Elisabethananka ditji matja wokarana, nandru dankananto, ja nandru kupa ngatani dankana wonti.

⁵⁸Ja jenimalinietjali ja kamanelieli nankanali ngarana wonti worderu Kapara kalumiltjamiltjarina nunkani nankangu pirna ngankala wiri; ja tana nankangunto mankina wonti.

⁵⁹Ja jendranguta ditji mara wora ja parkulani tana wokarana wonti nina kanku karuwali ngankala, ja tanali nina ngaperi nunkani jeri “Zacharias” dikana wonti.

⁶⁰Ja ngandrieli nunkanali kalabana wonti ja jatana wonti: “A-ai, Johannes tala nunkani nganala nganai.”

⁶¹Ja tana nankangu jatana wonti: “Wata kamaneli kulno jinkani nganai, nina tanali ninapini tala dikai.”

⁶²Tanali ngaperi nunkani marali jekibana wonti, worderu nulu ngantjai ninaia dikala.

⁶³Ja nau ngatjina wonti marda pirrapirrani ja dakana wonti ja jatana wonti: “Johannes tala nunkani nganai.” Ja tana pratjana ngaruparana wonti.

⁶⁴Nurujeli mana nunkani piririna wonti, ja tali nunkani walturina wonti, ja nau jatana wonti ja Goda jurakokana wonti.

⁶⁵Ja jenimalinietja pratjana japali pantjina wonti, ja Judaia mardawonpa worani tana ngankamalina wonti jenia jaura pratjanandru.

⁶⁶Ja pratjana, tanali jenia ngarana wonti, jenia ngarali patana wonti ja jatana wonti: “Mina naupini kupa pantjila nganai?” Ngangau Kaparaia mara nunkangunto nganana wonti.