LUKA 1:34-66

³⁴Maria na aneru ekiraiato, ekirato, “Mai tu kamasi beḡorani? Au tau ta ḡesi tu roḡosi baḡana gena-vegogo.”

³⁵Aneru na evaḡa-veseato, ekirato, “Iauka Veaḡa ḡoi iatamu ai befoforini, Barau ḡena seḡuka na beboroḡimuni. Moḡesina nai ḡoi ḡemuna bemaḡurini merona veaḡana tu Barau Natunai beḡe kiraḡiani.

³⁶Bono riba, ḡoi garagaramu Elisabeta, ḡia varau beḡauka, senaḡi ma banina. Ribamu, tarimarima na ḡekiraḡiato-ḡoi, ḡia tu gabani vavinena ḡetato-ḡoi, senaḡi toma ḡena ḡue imaima sebona (6) maiḡa.

³⁷Korana Barau tu dagara mabarari veiveiri ma ribana.”

³⁸Maria ekirato, “Au tu Vereḡauka ḡena vetuḡunaḡi vavinegu, be bokira kavana au ḡegu ai bene ḡora.” Benamo aneru na eraga-kwaneato, erakato.

³⁹Mo negai Maria evariḡisito, Iudea ḡorori vanuḡana ta ḡana eraga-iaḡoto.

⁴⁰Monai Sakaria ḡena numai eraḡekauto, Elisabeta evaḡa-namoato.

⁴¹Elisabeta na Maria ḡena vevaḡa-namo guruḡana eseḡaḡiato nai, natuna tu diana nuḡanai eḡarevato, benamo Elisabeta Iauka Veaḡa na evaḡa-vonuato, mamina eḡabiato.

⁴²Benamo eguruḡa-baregoto, ekirato, “Vavine vefakari ai Barau ḡena vevaḡa-namo ḡoi iatamu ai tu barego vedaurea, ema boḡabiani merona iatanai maki!

⁴³Senaḡi au ḡegu namo tu kara Vereḡauka sinana ḡegu ai beiaḡoma?

⁴⁴Ḡemu vevaḡa-namo guruḡana baseḡaḡia nai, natugu tu nuḡagu ai eiakuni nai eḡarevani.

⁴⁵Ḡoi overereni, korana oveḡabi-dadamato, Vereḡauka ḡena guruḡa bemoḡonini otato nai.”

⁴⁶Benamo Maria ekirato, “Au nuḡagu na Vereḡauka evaḡa-raḡeani.

⁴⁷Au iaukagu na maki au vaḡa-maḡurigu Barauna eiaku-viniani,

⁴⁸korana tu au, ḡena vetuḡunaḡi vavinena, ḡegu tanu lealeai roḡo etuḡamaḡi-taḡoguni! Mainana, beiaḡoni mo, ḡuru mabarari beḡe kirani, Barau ḡena vevaḡa-namo tu au iatagu ai beḡe toni,

⁴⁹korana tu veiḡa baregori Seḡuka Barauna na au ḡegu ai beveiri. Ḡia arana tu veaḡa.

⁵⁰Ḡena vetuḡaḡwa tu ḡia ḡegari-viniani tarimari iatari ai betoreani, ḡuru ta beiaḡoni ḡuru ta iatari ai betanuni.

⁵¹Ḡia ḡimana eḡabi-vaisirito seḡukana na ḡeveiavini tarimari elai-karovorito.

⁵²Ḡia na vere baregori ḡeri tanutanu gaburi na edori-firiḡorito, a tanu lealea tarimari ḡia na eḡabi-vaisirito.

⁵³Vito tarimari maki dagara namori ai evaḡa-vonurito, a farefare vovoka tarimari ḡia na ḡimari kori evaḡa-ḡenoḡoirito.

⁵⁴Ḡena kiraḡitore ḡita tubura ḡatara Isaraela tarimari ḡesi asi etuḡa-rekwarito, ema ḡia eiaḡomato ḡena vetuḡunaḡi tarimari Isaraela bene vaḡa-kavari ḡana,

⁵⁵senera ekiraḡitore-vinirito ilailana. Aberahamo ma besena ḡesi roḡo bevetuḡa-ḡwa vanaḡi-vanaḡirini, etato.”

⁵⁶Maria monai tu Elisabeta ḡesi ḡetanuto ḡue toitoi (3). Moḡa murinai ḡena vanuḡa ḡana ma eḡenoḡoi-iaḡoto.

⁵⁷Elisabeta ḡena ḡabi ḡarona varau eraḡasito nai, mero ta eḡabiato.

⁵⁸Benamo sevinai ḡetanuto tarimari ema garagarana na varina ḡeseḡaḡiato nai, ḡia ḡesi ḡeiaku-vegogoto, korana Vereḡauka ḡena namo e varevare-bara ḡia ḡenai eḡorato nai.

⁵⁹Ḡaro vaḡa-imaima toitoinai (8) mero tauḡanina kefina beḡene lama-vaḡia ḡana ḡevegogoto. Mai ḡaro sebonai maki arana beḡene vatoa Sakaria, tamana beḡene turaia ḡetato.

⁶⁰Senaḡi sinana asi eurato nai ekirato, “Asiḡina! Ḡia arana tu Ioane.”

⁶¹Ḡia ḡekirato, “Senaḡi ḡoi ḡemu bese nuḡanai mai ara tu asiḡina!”

⁶²Benamo ḡia na mero tamana ḡimari ai moḡo ḡedanaḡiato, mero arana tu deikara beḡene si.

⁶³Sakaria na toretore vetuḡuna ta ekiraḡiato, benamo maiḡesi etoreato, “Ḡia arana tu Ioane.” Benamo mabarari nuḡari ḡefarevaḡito.

⁶⁴Monai vau muruna evekeoto, meana maki eroroḡototo, benamo eguruḡato, Barau evaḡa-namoato.

⁶⁵Moḡa lorinai seviri ai ḡetanuto tarimari mabarari ḡeḡaba-rakavato ema mo veiḡa varina Iudea ḡoro vanuḡari mabarari nuḡari ai ḡevari-fiuato.

⁶⁶Varina ḡeseḡaḡiato tarimari mabarari na ḡetuḡamaḡi-iaḡiato, ḡekirato, “Mai mero tu kamasi beveini?” Korana tu Vereḡauka ḡimana seḡukana tu ḡia iatanai.