Luk 1:34-66

³⁴Goa sa rabu Maria-me mo ensel agaa misa: Go naakiri akea pua madialua ya? Neme aa page meda abi nape-ga.

³⁵Go raburi ensel-me gupa lakesa: Holi Spirit-mi ne madaa ipua Gote-na puri ora so madaame ne waru surubalia. Goa palia-pulu orope go naaki neme madiali. Gore onaanumi go epe naaki nipu epe aa loa Gote-na Si teme.

³⁶Gore paga. Nena aai Elisabet aba onagae yapare nipuna robaa-para naaki meda pia. Abare onaanumi gupa simi: Nipumi nogo naaki mada namadialia simide pare abia nipuna akualu 6-pela popea sa.

³⁷Gore Gote-me napape yaere meda ora naia sa.

³⁸Gore Maria-me lalo: Pagape. Niri Aa Mudu-na kogono ona ya-pulu neme go lae yaenu pa pinawa sa. Goa sa raburi ensel-me pagoa wala pisa.

³⁹Gore orope Maria nipu rekoa aipapulu so rudu-nane ae adaare meda Judia pisa.

⁴⁰Nipu pua no Sekaraia-na ada-para pua odobaawa Elisabet-para epe naare pa lo agaa pua lakesa.

⁴¹Elisabet-me Maria-na agaa pagesa raburi mo Elisabet-na robaa-para piri naaki pogosa. Go rabu Elisabet madaa Holi Spirit rulatabesa.

⁴²Go rabu Elisabet-me Maria-para puri paloa gupa sa: Robaa-para pirana page nipu epe puri mealia.

⁴³Gore neme epe kogono napede pare nina Aa Mudu-na agimi ni adola epaa.

⁴⁴Pagape. Nena agaa pagawade rabu no robaa-para piri naakimiri pedo pua popa pogolaade.

⁴⁵Aa Mudumi abade ne lagisade agaare neme go ora adolalo pi sa. Goa pe-ga neme raaname omape. Elisabet-me apo agaa gupa sa.

⁴⁶Gore Maria-me lalo: Nina konemere Aa Mudu-na bi minasaayo.

⁴⁷Goa pua nina Raba Mi Aa Gote madaa pedo waru pe.

⁴⁸Niri nipuna kogono ona madaare nipumi ni odome omoa raba muaaya. Gote-me puri pane epe oyae medaloma ni madaa mea epea-pulu abia page orope page go puri pane Gote-me ni raba mualia. Go pea-pulu onaa rayome ni ora epe ona teme.

⁴⁹Goa pea-ga nipuna biri oro yaalo epe aalia.

⁵⁰Onaa rayome nipuna agaa waru pagoa paala omemere nipumi oro yaalo epe raba mi kone katalo pia. Goa pea rabu oro yaalo madini onaanu madaa go kone ia.

⁵¹Nipumiri abade napiaa kogono pisaaya. Go rabu nipumi kone pogati onaa medaloma ratu tisaaya.

⁵²Nipumi su amaa aa mudu puri pane aanu rabuaniaawa onaa naraanuna bi minasaasaya.

⁵³Onaame nipuna agaa pagolalo kone imi onaare nipumi oyae waru mea kaloaaya. Pare nipumi amope onaanu gimoa oyae nakasa.

⁵⁴Niaana akuanu-para aana oraawa lakesa agaa nagimisa. Nipumi niaa Israel su-para piri kogono onaanu raba mulalo ipisa.

⁵⁵Go-rupare nipumi Abraham-para nipuna orope madini naakinu-para oro yaalo odome omoa raba muaaya sa.

⁵⁶Elisabet raapu Maria nipu akualu repo pirisa pare orope wala nipuna ada pisa.

⁵⁷Elisabet-na naaki madiape di raname sa raburi mo naaki Jon madisa.

⁵⁸Elisabet nipuna rurunu-para nipuna adaare padane-para piri onaanumiri Elisabet naaki madiaade remaa pagesimi. Gore Aa Mudumi nipu odome omoa raba misa-pulu nimu Elisabet raapu pedo pu pirisimi.

⁵⁹Gore yapi 8-pela pa piruare mo naakina yogane ruguta pisimi. Nipuna biri aaraana bi-rupa Sekaraia talo pisimi.

⁶⁰Go simi pare mo naakina agimi dia sa. Nipuna biri Jon lamina sa.

⁶¹Go rabu nimumi lalo: Nena ai Aapa page nena ruru page go-rupa bi ma-ae meda dia yaade simi.

⁶²Go rabu nimumi aaraa agaa mulalo pa kimi robo sua agaa misimi. Nipumi mo naakina biri akepu bi ma-aalia pae kone sua agaa misimi.

⁶³Sekaraia-me pepa tape yae meda mea gialepa loa gupa pepa madaa tisa: Go naakina biri Jon lo tisa. Goa tisa raburi mogo pirisimi onaame kone adaapu isimi.

⁶⁴Go kone adaapu saapirinare mo Sekaraia-na agaa lapaasa. Go rabu nipuna agaa namaarea sa raburi nipumi agaa lapaawa Gote-na bi minasaasa.

⁶⁵Go raburi mo nimuna adaare padane-para pirisimi onaamere paalame omesimi. Go remaare Judia su rayona pagesimi.

⁶⁶Onaa rayome go agaa kone-para su kiritua nimu kone adaapu isimi. Nimumi gupa simi: Oropere go naakimiri akea palia pae? Gore mo naaki madaa Aa Mudumi puri kasa adesimi-pulu goa simi.