LUKAS 1:34-66

³⁴Naž Lian' wnnablbe' wbás che ya'abán', na' wnnabe': —¿Nakx̱kze gak da' ki, dan' bi zóaḻena' benne' byo?

³⁵Naž wbasen' gože'-be': —Dios Be' La'y ḻe'e gan zo', na' gone' ga yeḻa' wak che Dios, Benne' ẕente, sóaḻenen le', na' gaken gan zo' ka to ẕoḻ da' ẕgo'o bejw. Che ḻen bi' byodo' na', bi'don' žaḻa' galjbe', cho'obe' ḻo na' Dios, na' si' labe' Ẕi'n Dios.

³⁶Ḻezka' X̱bel, ẕi'n x̱a x̱to'o wdé, ba yo'o to bi' byodo' ḻi'e ḻa'kze ba ngole'. Wnnégake' chie', na' wnnágake': “Nake' no'le wbíž” san ba zej x̱op byo' yo'o bi'don' ḻi'e.

³⁷Bi be zoa da' bi gak gon Dios.

³⁸Naž Lian' wnnabe': —Nakkza' chie'. To chi'ize naka' wen žin che X̱anžon'. Gak chia' kan bach wnnó' gon Dios chia' neda'. Naž ḻa' beza'te wbás che ya'abán' gan zoa Lian'.

³⁹Ḻa' ža na'ze wyó'o Lia nez, na' taría taría wyejbe' gan nak ḻaw ya'ado' ka', na' bžinbe' to yež da' nbaben Judea.

⁴⁰Kate' bžinbe' ga na' wyo'obe' liž Secrían', na' gožbe' X̱belen': “Padiox̱.”

⁴¹Kate' benle X̱belen' dan' wnná Lian', ḻa' btate kwin bi'don' yo'obe' ḻi'e, na' Dios Be' La'y bedjsóaḻene' ḻe'.

⁴²Naž X̱belen' wnníe' zižje, na' wnné': —Dios ba ben cháwe'že' le' ka yógo'te no'le ka', na' ḻezka' ben chawe'e bi'don' yo'obe' ḻi'o.

⁴³¿Noẕkze neda', dan' bḻa' x̱na' X̱ana' ga zoa' ni?

⁴⁴Katen' benla' dan' gožo' neda', ḻo yeḻa' žebél chebe' ḻa' btate kwin bi'don' yo'obe' ḻi'a.

⁴⁵Ba nez ẕen naken chio' dan' bejḻi'o x̱tiža' wbás che ya'abán', na' gakkze kan gože' le' ḻo wláz X̱anžon'.

⁴⁶Naž Lian' wnnabe': Dot ḻaža'a ẕka'n ẕena' X̱anžon',

⁴⁷na' žebéḻenla' Dios, Benne' Weslá chian'.

⁴⁸Dios na'kze be' ḻaže'e neda'. Yoa'a ḻo ne'e Ḻe', na' to chi'ize naka' wen žin chie'. Na'a so ḻaw, nnágake' chia': “Ba nez ẕen naken che no'len'.”

⁴⁹Ẕenḻe'e nak da' ben Dios, Benne' ẕente, chia' neda'. ¡Ga'n ẕen La la'y chie'!

⁵⁰Ḻe' žeyache' ḻáže'tezle' benne' ka' ẕžébegake' Ḻe', na'a ža, na' to chi'ize.

⁵¹Da' zan yeḻa' wak ẕen ka' ba bene' Ḻe'. Bzex̱jwe' benne' ka' bka'n ẕéngake' yeḻa' žejní'il chégake'.

⁵²Beké'e yeḻa' wnná bia' chegak benne' blo ka', na' bene' ga zej nak blo benne' gax̱jw ḻaže' ka'.

⁵³Bwawe' benne' ka' beldone', na' bka'ne' ka'ze benne' wnni'a ka'.

⁵⁴Gókḻene' benne' Israel ka', benne' wen žin chie' ka', dan' be' ḻaže'e ḻégake', na' beyache' ḻáže'le' ḻégake'.

⁵⁵Bene' da' bchebe ḻaže'e chegak x̱a x̱to'žo ka', dan' gone' chežo, dan' bchebe ḻaže'e che Bran, na' chegak ẕa'sóe' ka'.

⁵⁶Lian' bgá'nḻenbe' X̱belen' chonne byo', na' wdé na' beyejbe' ližbe'.

⁵⁷Kate' bžin ža žaḻa' soa x̱kwide' che X̱belen', golj to bi' byodo'.

⁵⁸Benne' ẕjo'o ḻi'a chie' ka' ḻen lježe' ka', béngekle' kan Dios beyache' ḻáže'le' ḻe', na' bebéḻengekle' ḻe'.

⁵⁹Kate' ba gok x̱ono' ža zoa x̱kwiden', bḻa'gak ljéžgake' ka' ga na' nich chóggake' ḻo beḻa' che bi' byodon' da' nak bian' nbabbe' che Dios, na' gónegekle' wzóagake' labe' Secría kan zoa la x̱abe'.

⁶⁰Naž beží'i X̱bel, x̱na'be', na' wnné': —O'o. Ẕwa si' labe'.

⁶¹Wnnábgekle' ḻe', na' wnnágake': —¿Biẕ chen'? Bi zoa nitó lježle, benne' lie' Ẕwa.

⁶²Naž benne' ka' bḻoé'ezegekle' nich nnábgekle' x̱abe' biẕe žénele' si' labe'.

⁶³Secrían' wnnabe' to blagdo', na' bzoje' ḻawn da' ẕnnan: “Ẕwa si' labe'.” Bebángekle' yógo'tegake'.

⁶⁴Ka' gaze ḻa' beyáljwte žoa'a Secrían', na' gok bechaḻje', na' bka'n ẕene' Dios.

⁶⁵Naž bebángekle yógo'te benne' ẕjo'o ḻi'a chégake', na' wzé diža' kan gok da' ki yógo'te yeždo' zej nnitan' ḻawgak ya'ado' ka' gan nbab Judea.

⁶⁶Bza' ḻáže'gak yógo'te benne' ka' katen' béngekle' kan goken, na' wnnágake': —¿Biẕkzen' gon bi' byodon'? Da' likze X̱anžon' zóaḻene'-be'.