Lucas 1:34-66

³⁴Ari osampitanakiri María, okantziri: “¿Tsikama onkini nomotziti, tii noñiiri shirampari?”

³⁵Jakanakiro maninkari, ikantziro: “Iriira kantakaiyaawoni Tasorintsinkantsi. Tima ipamankantakimiro ishintsinka Jinokijatzi, ojyapaatyaawomi opamankantzi aamparyaantsi. Irootaki jiitantyaari powaiyani Tasorintsi Itomi Pawa.

³⁶Ari okimitsitakari iijatzi pirintothori Elisabet, jiiwiitari maanirothaki, okantawitaka antawopirowitaka iroori, motzitai. Tzimakotaki 6 kashiri.

³⁷Tima tikaatsi kompitzimotyaarini Pawa”.

³⁸Opoña okantanaki María: “Naakataki jompiratani Pinkathari, jantinawo okaatzi pikantakinari”. Irojatzi ipiyantanakari maninkari.

³⁹Opoña pashini kitiijyiri, shintsiini iyaatanaki María, jataki tonkaariki Judea-ki osaiki nampitsi,

⁴⁰irojatzi ariitantakari ipankoki Zacarías, iwithatapaakawo Elisabet.

⁴¹Okanta okimawakiro Elisabet iwithatapaakawo María, ijyiwatanaka omotzitakiri. Tima ikantakaanakityaawo Elisabet Tasorintsinkantsi,

⁴²oñaawaitanaki shintsiini iroori, okantanaki: “Iirokataki anairori pashini tsinaniyitatsiri itasonkawintaimi. Ari inkimityaari iijatzi powaiyani.

⁴³¿Oitama pipokashitantanari inaanatityaari Nowinkathariti?

⁴⁴Tima nokimawakimi piwithatapaakina, ijyiwatanaka nomotzitakiri naaka, ikimoshiritanaki.

⁴⁵Kimoshiri pinkantaiya iijatzi iiroka pikimisantaki, tima aritaki imonkaataiya okaatzi ikowakaakimiri Awinkathariti”.

⁴⁶Opoña okantanaki María: Antawoiti nowishiryaawintaiyaari Nowinkathariti,

⁴⁷Kimoshiri nonkantawintaiyaari Pawa tsika itzimi owawisaakoshiritainani.

⁴⁸Tima iñaakiro jompiratani ashironkaawaitaka, Aripaiti inkantayiitai: Antawoiti itasonkawintaitakiro.

⁴⁹Tima antawoiti jantzimotakinari matzirori otzimi ishintsinka. ¡Tasorintsi inatzi iwairo!

⁵⁰Ari inkantaitatyiiyaani inishironkayitairi inkaati inchariniyitaiyaari paata, Tsikarika inkaati pinkathayitairini.

⁵¹Iro ishintsinka imatantayitakari. Japirotsitairi ikinkishiriwitari jantirimi kantakaapirowaitachari.

⁵²Ikaatzi pinkathariwitachari, ikantakaantakiro Pawa iiro jiyaatakaantawo impinkathariti, Iri jiñaapirotakaiya ikaatzi tsinampashiryaawitachari.

⁵³Jajyaagantakaayitaari ikaatzi tajyaaniintawitachari, Iriima ikaatzi ajyaagantawitachari jaapithayitairi tzimimowitariri jomishitowakiri.

⁵⁴Inishironkatairi Israel-mirinkaiti, tima jompiratani jinayitaki. Tii ipiyakotziri inishironkayitziri,

⁵⁵Tima iro ikantayiitakiriri pairani achariniyitakari, Jitakari Abraham-ni irojatzi inkaati inchariniyitaiyaari.

⁵⁶Ari osaikimowaitapaintziro María jiroka Elisabet ikaatzi mawa kashiri, irojatzi opiyantaari opankoki iroori.

⁵⁷Ikanta imonkaataka ontzimaanitantyaari Elisabet, tzimaki otomi.

⁵⁸Ari ipokaiyakini ojyininkapaini ikimoshiriwintaiyironi, tima jiyotaiyakini antawoiti inishironkatakiro Pawa.

⁵⁹Aritaki maakotapaaki 8 kitiijyiri iintsi, jagaitanakiri intomishinataanitiri, ari ikowawitaka jiitaitirimi Zacarías, tima iwairo inatzi iwaapati.

⁶⁰Irojatzi okantantanakari inaanati: “Iiro jiita Zacarías, jiitya Juan”.

⁶¹Ari ikantaitanakiro: “¿Iitaka? Tima tikaatsi pijyininka iitachani Juan”.

⁶²Ipoña jookotaitakiri iwaapati josampiitziri, tsika inintzi jiitiri.

⁶³Jookotaki Zacarías inchakota jamaitiniri, ari josankinatakiri, okantzi: “Juan jiitya”. Iyokitzi ikantanaka jaminanakiri ikaatzi osampitakiriri.

⁶⁴Jomapokashitanaa iñaawaitanai Zacarías. Antawoiti ipinkathatanakiri Pawa, ipaasoonkitanakiri.

⁶⁵Pagaanka ikantaiyanakani ijyininkapaini Zacarías. Tima ithonka ikimakoitakiro tonkaariki Judea-ki okaatzi awisaintsiri.

⁶⁶Pampithashiri ikantaiyanakani ikaatzi kimakowintakiriri, ikantaiyini: “¿Tsikama jiityaaka paata jirika? Tima kimpoyaawinta jowanakiri Awinkathariti jirika iintsi”.