Lucas 1:34-66

³⁴Tumetu Mariara acuare: —Ique deca baecua. ¿Eje bucha cabacuatie ejuu? —jadya tujatu acuare.

³⁵Yusu tsahuaquiratu quemitsacuare: —Yusuja Espíritu tu miaqueja junaya. Yusu dutya casa aniyarami jadya amereya. Jadya tibudyatu ebacua nana cuinanayaque YUSUJA EBACUAQUE bacani juya.

³⁶Tumebaedyatu micue ata Elisabetja cuinanayadya ebacua, arepa tuque esiri juya ama bucha. Tunara “cabacuati baecua” jadya ayaquetu amena shucuta badi maquique.

³⁷Aijamatu Yusuja ai ataqui amaque, —jadyatu Yusu tsahuaquira acuare.

³⁸Tumetu Mariara acuare: —Yusu Ecuana Cuatsashaquira cuatsashaya eque juishuque ique. Paju taa mira ique cuejahua eque, —jadyatu Mariara acuare. Tuque jadya cuejatsutu Yusu tsahuaquique dirunucacuare.

³⁹Eje uma huecaca ama jadya juhuaque cuetihuajutu María cabajejetitsu cuacuare Judea emata epuju, Elisabet, Zacarías ecatse aniyaju.

⁴⁰Tuhua junatitsutu nubinaticuare tatseja etareju. Etareju nubinatitsu tujatu isaranaticuare tuja ata Elisabet.

⁴¹Mariara jadya isaranatie ayajutu Elisabetja ebacua ecare cani juque bucucucuare. Jadya juyajutu Elisabet caadebaticuare Yusuja Espíritu tuatsehueque.

⁴²Tume tujatu María jadya acuare: —Yusurami mepehua dutya epuna cuana ducuque mique peadya. Tuquetu miatsehue dyaque jida. Tumebaedya tujatu mepehua micue bacua cuinanadadiyaque, dyaque jida tuatsehue juishu.

⁴³¿Ai jatsu ique, Ique Cuatsashaquija ecuaque eaqueja tarepera jeishu?

⁴⁴Mira isarayaju micue etsuri bacaya tsehuedya cuitadya tuque ecue ebacua nana ecarecani juque bucucuhua, pureama juatsu.

⁴⁵Miquemi dyaque jida, mique tyatana ana atahuaque tyatahua tibu. Yuneri cuitadyatu Yusura yana ahua equedya judadiya, —jadyatu Elisabetra atsacuare.

⁴⁶Tumetu María jerucuare Yusu pureama ayaque: “Dutya ecue inime tsehue mique pureama aya, Yusu Ique Cuatsashaquique dyaque casadaque.

⁴⁷Mique Ique Inajacamerequiradya ducuta pureama amereya.

⁴⁸Mira jida tsehue mepehua. Mique merequique jetiedyaque ique. Riyaque huecaca eque amena dutyara: ‘María peadyatu aniya epuna Yusura mepehuaque, tuatsehue dyaque jida juishu’ jadya abuque.

⁴⁹Mique dutya casa aniyaquemi dyaque jida juhua eatsehue. Miquemi juchama neri.

⁵⁰Micuetu nerecabajacanime ama mique muibaqui cuanaque.

⁵¹Miquemi dyaque casada. Casumitiya cuanara inime pireya cuanaquemi pana yuamatura aya.

⁵²Casada cabatiya cuanaque tuquemi casadama amereya. Casadama cabatiya cuanaque tuquemi casada amereya.

⁵³Nerecada cuanaque tuquemi dutya tunara ai sareya cuanaque tyaya. Chipiruda cuanaque bacuemi ecana ni ai buchique tyaya ama.

⁵⁴Micuetu tsahua bahue Israel eque ejuracana cuanaque, mique merequi cuanaque. Ni eje tupu mira ecuana iyuhue tsehue bajacaya ama.

⁵⁵Jadidya tuquemi quisarati tyahua ecuanaja ebaba Abraham, dutya tuque eque ejuracana cuanaque jadya. Tereya ama tuque micue ecuana tsehue ecuana nerecaba ishuque”, jadyatu Mariara Yusu jeru eque acuare.

⁵⁶Quimisha baditu Maria Elisabet queja aniticuare. Jadya juatsutu dirunucacuare tuja etareju.

⁵⁷Tumetu Elisabetja cuina ishuque huecaca jueticuare. Ejitajutu acuare peadya deca ebacua.

⁵⁸Yusu Elisabet tsehue dyaque jidaque bahue juatsutu tuja ata cuana tuaqueja cuacuare, “Dyaque jidatu Yusu miatsehue” jadya cuejara.

⁵⁹Ebacua nanaja cuinana huecaca catsurutiyajutu tuja ata cuana, tuque japadama aniya cuanaque jadya chine ishu cuejatanacuare. Tumeque huecacatu ebacua nana ecuita huitu biti tubutanacuare tunaja bahue Israel eque ejuracanaque jadya adebatae juishuque. Etataque “Zacarías” bacani datse tunajatu acara acuare.

⁶⁰Tume tuna ecuaque Elisabetra jadya acuare: —“Juan” bacani paju, —jadya tujatu ecana acuare.

⁶¹—¿Eje bucha juatsu? Aijama taa tu Juan bacani micue ata ni peadya, —jadya tunajatu acuare Elisabet.

⁶²Elisabetra “Zacarías” bacani acarama aya bacatsu, “‘Juan’ bacani paju”, jadya ayajutu ecuita cuanara emetucu tsehuedya jutidya ebacua nanaja etataque bacaduracuare: —¿Ai bacani tuquemi amerecara aya? —jadya.

⁶³Tuja emetucu tsehue piye cuejatsu tujatu bacacuare aiju huene ishuque. Inatsatsu tujatu huenecuare, “‘Juan’ bacani paju”. Dutyara tunajatu bape ebari bacuare.

⁶⁴Jadya huenetsutu Zacarías quisaratitibunenucacuare. Quisaratinucatsu tujatu Yusu pureama atibunecuare.

⁶⁵Dutya tuque japadama aniya cuanaque tuna anajacatacuare. Tsapecuare tunajatu quisarati dutya Judea yahuaju emata cuanaju anitaya cuana queja Zacarías eje bucha juhuaque. Cuatsabiji tunajatu acuare, ebacuaqueja ebacani cuejatsupa amena quisaratinucaya jadya.

⁶⁶Dutya tumeque cuatsabiji jadya juhuaque bahue juya cuanara tunajatu bape bacacuare. Cabacaduratibarecuare tuna: —¿Aitu judadibuque tumeque ebacua nana? —jadya tuna jubarecuare tuna cama. Yuneridya tucuetu Yusu Ecuana Cuatsashaquira naruya, tsahuaya jadya aya eje tupu tuque aniya jari tupu.