Luk 1:34-66

³⁴Ŋunde yiní Mariako ŋande oseseyaró, “Ŋu date te tunoqeweya? No uni ka kama ranowó.”

³⁵Yiní mande topé ŋande yaró, “Yuqa Surumí ŋundo poka kiriní Anutu Koreko Horé yote ŋuro wimbímbo yoŋo kereweya. Ŋuroko oŋa ŋuko meté horé yoní, Anutu koro Naŋuní, ye nekowaŋgo.

³⁶Iŋo, nuweŋge Elisapet ŋu koŋgomu tero kusimi taró, quko itaka ka qahu tero simó urumuni ka pisiyoweya. Itaka qahu tero kombo saŋiyo kanata ŋunde kini tete.

³⁷Anutuko oka tewero kama rukusuwoweya!”

³⁸Ŋunde yiní Mariako ŋande yaró, “Qeno, no eneŋo sunará pare. Ke yete ŋundiro nono tunoqiní.” Ŋunde yiní sambo simó ŋu roto toŋeró.

³⁹Ŋu naruko ŋuno Maria otoqoro Judia koro mira purí-purímo yendé kano waka ta oró.

⁴⁰Oro enendo Sekaraiako ya ŋuro quroko oro Elisapet qenero, “Naru meté,” yaró.

⁴¹Yiní Elisapetko mandí iŋoní simó qahímo yaró ŋu sore-sore taró. Ŋunde tiní Yuqa Surumí ŋundo Elisapet newondímo maŋgoraró.

⁴²Maŋgoriní ki parámi tero ŋande yaró, “Anutuko puriŋo te kunoní pare soso taka yereyote. Ŋuya Anutuko simó qahuŋgemo puriŋo te inoyote.

⁴³Date koro Uni Paráminemboro nimí ŋundo nono mahete?

⁴⁴Qeno, keŋo mandeke ŋu iŋoweqo, simó qahunemo ŋundo niŋgu-niŋgu tero sore-sore tete.

⁴⁵Keto ŋande iŋondutuwoyaró, do ka Anutuko no nimiraró ŋu hamó tunoqeweya. Ŋunde ŋuro ke puriŋo ka rete.”

⁴⁶Ko Mariako ŋande yaró, “Newondenembo Uni Parámimboro owí hokoyoteno,

⁴⁷ko yuqanembo Anutu, no Rambaruru Koŋgo Norewero Uni ŋuro niŋgu-niŋgu teyoteno,

⁴⁸dokoro, eneŋo sunará pare ŋuko owí moré kini ŋuro iŋo nunaró. Hamó, imemoŋgo Anutuko puriŋo ka nunaró ŋuro unipare soso qene iŋowaŋgo,

⁴⁹dokoro Uni Wimbí Moré ŋundo kondé samaka nereró. Ŋunde tero owí meté horé tete.

⁵⁰Naru suki-suki enendo unipare soso eneŋo sasaro teteŋgo qu sikíye te yunoyote.

⁵¹Kandeto o wimbí moré qambu teyote. Enendo uni kumimbo eneŋo owéye hokoyoteŋgo ŋu yoriní umbu wisikaraŋoyoteŋgo.

⁵²Enendo wiri yerete uni owéye riní umbuyote, quko eneŋo owéye ri umbuyote qu ŋu owéye hokoyote.

⁵³Unipare o qoyemboro khumoyoteŋgo ŋu o yunoní nero qahuye tinditeyote, quko onoŋo unipare oka kama yunoro kina yohoweyote.

⁵⁴Enendo Israel, eneŋo sunará simó ŋu, samaka yerero sikíye te yunoyote.

⁵⁵Dokoro naru suki-suki ŋunde enendo teyoweya ŋuro usisambanani Abraham koya eneŋo sowe qu ŋunde yimiraró.”

⁵⁶Ŋunde yero Mariako Elisapet koya kombo kapusa ŋuno yate rotoro yendéyómo toŋeró.

⁵⁷Asa naru kini tiníqo, Elisapet simó urumuni ka pisiyaró.

⁵⁸Pisiyoní yendé uniparetoya suwisawiyómboya Uni Parámimbo Elisapet sikí parámi te inaró ŋuro iŋoro eneya niŋgu-niŋgu taŋgurí.

⁵⁹Asa kosa naru kande saŋiyoro kapusa ŋuno simó kowí toŋowero kopaŋgurí. Koporo, iwí Sekaraia koro owé qu inowato, ye iŋaŋgurí.

⁶⁰Quko nimímbo ŋande yaró, “Kini. Owí muko Jon,” yaró.

⁶¹Yiní ŋande miraŋgurí, “Keŋo suwisawike ka, owéye ka ŋunde kini qu,” yaŋgurí.

⁶²Ŋunde yero kandeyembo naŋge rokó-rokó tero iwí ŋande osese taŋgurí, simó ŋu do owé ka inowato.

⁶³Ŋunde tiqo, kandímbo rokó-rokó tiní sokome inoyi ŋande nakayáŋaró, “Owí muko Jon.” Nakayáŋoní qenero iŋondata parámi taŋgurí.

⁶⁴Ŋu naruko naŋge Sekaraia maŋgó meté tiní mande yero Anutu owí hokaró.

⁶⁵Yendé unipare soso qenero sasaro taŋgurí. Ko o soso tunoqaró ŋuro mande piŋa Judia koro mira purí-purímo yendé soso ŋuno uró.

⁶⁶Uni soso piŋa mande iŋoro iŋondata tero ŋande osese taŋgurí, “Simó ŋuko, date uni ka tunoqeweya?” yaŋgurí. Hamó, Uni Parámimboro kandí simó ŋu saŋano yora.