1Ascaino Festo nocotoshitan niaifoni. Nocoashu osha rafu non fusti finontan Cesarea anoashu Jerusalén ano cani.
2Nocoano nocon yorafohuunshon Dios cufimisi niaifofo non Israeli niaifo futsafoan aqui funifo Pabloqui tsain chaca huai fucani.
3Festo fuparapaiquin yoinifo, —Niaifo Festo, ranushumuafo yonohuun Pablo nuno ihuunon. Noco ashopun, —huanifo. Fai pochininshon Pablo cushupainifo rutushquin. Rutupaicaquin niaifo fuparapainifo.
4Ato cumani, —Pablo cunu muran Cesarea ano ica. Urifi samamashta un ari cai.
5Ahuara chaca huacun maton niaifofo yoitacahuun ufu canon. Nannoshon na nocofunu man yoiti huatiroquin, —huani.
6Ascan huatan atofu osha mucu rafuti iyoni Cesarea ano nasocurani oni. Iyoconaino ato ichanan huani. —Pablo uqui ihuucahuun, —ishon Festopan ato yononi.
7Nococun ahuun caifo Israelifoan Jerusalén anoashu fucashon yoiti huanifo. Yoifiaitocai tsoan ismacoinnima iconmainquin.
8Ascaiton Pablonun ato cumani isca huani, —Aririma. Uncai ahua chaca huama. Uhuun caifo Israelifo nocon shunicaifoan yononi cuscacai un potamisima. Nocon Dios fu tsainti pushu un a muranshon ahua chaca huayamafain Romanofoan yonomisi cuscaricai un yoitima imisima, —ishon Pablonun yoini.
9Ascatan niaifo Festopan Israelifo ahuunoa shinansharamapaiquin Pablo yoini, —¿Min Jerusalén ano catiromun min caifofoan mia yoitihuai cuscan nannoshon uhuun ointaifi min cumatiro? —huaiton.
10—Ma. Nuno Romanofo aton niaifoan yoitiro un chaca huaa iyamarai un chaca huama. Minfin tapisharaquin uncai uhuun caifo Israelifo un chaca huamisima.
11Un ahuara chaca huacun ua rututirofo. Ascafiashucai uqui chaca huafo cuscan iconyamaino tsoancai ua atoqui nichitiroma ua rutunonfo. Unfin niaifocoin Cesar ano capaicain uhuunoa yoishquin, —ishon yoini.
12Nicatan Festopan afu niaifofo patashari yoinannifo. Tsainquin anaititan yoini, —Mihuunoa min niaifocoin Cesar yoipai. Ascacufin min Cesar ano catiroquin, —ishon niaifoan Pablo yoini.
13Ascano shafa ranan finontan niaifo futsan ahuun anu Agripa yafi ahuun chico Berenice Cesarea ano funifo niaifo Festo oinfucani.
14A futan shafa ranan finoanno Festopan niaifo futsa Pablohuunoa tapimani. —Nocofunun futsa nuno ica. Nan Félixpan cunu muran iquimani.
15Un Jerusalén ano cayamua Israelifoan ahuun yorafohuunshon Dios cufimisi niaifofo non Dios fu tsainti pushu cushumisifo uqui fucashon nan nocofunu ahuun anu Pablo ua yoitihuamanonfo. “A onaintimahuu,” ua huayamuafo.
16Un ato yoia non Romanofoan nocon fuyamisicai ascarama. Nocofunu ahuara chaca yocashomacai non onaintimatiroma.
17Ascano ufu fuyamuafo nuno Cesarea anoshocai un ato manayamuama. Iyoconaino un ato ichanan huama. Nocofunun ahuun anu Pablori un iquimani.
18Ascaiton ahuun caifofo un yoia, “¿Natian ua yoihuu ahua chaca huamun?” un ato huaa. Uhuun nomuran un shinan na nocofunun ahuara fasi chaca huaa. Ascafiacai ua anori cumacanima.
19Ascatamarocon atofu Diosihuunoa fochismanantanancani yoifain nocofunun Jesushuunoari ua yoiafo. “Nan Jesús naafiashu man funini,” Pablonun yoia.
20Afohuunoacai un tapiama. Un mun ahuuscaicain uncai tapitiroma. Ascacun un Pablo yocan, “¿Min Jerusalén ano ufu catiro min caifofo muran mia chaca huafo cuscan min ato cumanon?” ishon un yocan.
21“Ma. Unfin niaifo Cesar ano capaicain uhuunoa yoicai,” ua huaita. Ascan un yonoa Pablo cunu murannoa ranushumuafo cushunonfo Cesar ano un nichiaitian, —ishon ato huani.
22Nicatan, —Urifi na nocofunu nicapairan, —ishon Agripanun Festo yoini. —Funamanri min nicai, —huani.
23Iyoconaino niaifofo ichanancashon niaifocoinchi Agripa yafi ahuun chico Berenice pushu muran iquiafono manutifo chaan chaan acaino nantifi funinifo nan niaifo tsaoaitian. Ascan Festopan yonoa Pablo iquimani.
24Iquishon Festo yoini, —Uhuun niaifo Agripa yafi no fu ichananfo na nocofunu ahuun yorafo nan Israelifo Jerusalén anoafo non Cesarea anoafoan ua yoiafo, “Nan Pablo rutuhuu,” ua oi ashcafinin yonoafo.
25Asca huafiainfonocai un ahuunoa un tsain chaca yoiaifoan un nicama. Ascashon ahuun tsainri un nica. Tsain chaca huafo cuscan yafi ahuun tsainri nicashon un shinan ahuacai chaca huamafinquin naashquin. Un cunu muran nichipaifia, “Un niaifo Cesari yoipai uhuunoa tapinon,” ishon ua yoia. Ascan un Roma ano nichicain.
26Ascafia ahua chaca huayamacucai un ahuunoa Cesar niaifo cunushotiroma. ¿Nocofunucai ahua chaca huaa non yoitiroma? ¿Ahuuscai non niaifon Cesar ano nichitiromun? Un shinan un asca huacai sharama. Ascan mato ointaifi un na nocofunu iquimani man non nocon niaifo Agripa man nicaiton man yoitiro ahuarafo raquirimain un niaifo Cesar un cunushonicain, —ishon Festopan ato yoini.
