Hechos 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Na' cate' bžin Feston' ciuda Cesarean' gan' ṉabi'e, gwzoe' šoṉe ža na' gwze'e gwyeje' Jerusalénṉa'.

²Nach bx̱oz gwnabia' ca' len nochle beṉe' blao c̱he beṉe' Israel ca' ja'aque' jaseṉe'e ḻe' cont bosocuiše' Pablon'.

³Na' gosata'yoede' Feston' gone' mandadw šjasesane' Pablon' Jerusalén. Gosata'yoede' ḻe' gone' ca' ḻe gosaclaže' yesebe'na'ogüe' Pablon' cont yesote'ne' tnez.

⁴Na' gobernador Feston' boži'e xtiža'gaque', gwne': ―Yega'aṉche' Cesarean' gan' die' ḻižyan' ḻe neda' bich chžeda' ša'a na'.

⁵Na' ḻe cuej no beṉe' gwnabia' c̱hele seḻa'le ḻegaque' len neda' cont yosocuiše' ḻe' lagua' gan' gona' yeḻa' justis še bi da' xiṉj ba none'.

⁶Nach gwzoa gobernadoren' len ḻegaque' Jerusalénṉa' do x̱ono' o do ši ža na' gwdena' beze'e beyeje' Cesarean'. Na' beteyo gwchi'e gan' chone' yeḻa' justisen' na' bene' mandadw gwyej Pablon' lagüen'.

⁷Nach cate' bžin Pablon' lagüen' ba nita' beṉe' Israel ca' za'ac Jerusalénṉa' na' ḻa' gosec̱hjte' ḻe' na' gosezolagüe' bosocuiše' ḻe' chesene' da' zan da' mal juisyw ba bene', perw bi blo'elaon še diža' ḻi cheso'e.

⁸Nach Pablon' bzoa rson c̱he', gwne': ―Bibi doḻa' napa' len ley c̱he neto' beṉe' Israel ṉe len yodao' blao c̱heton' na' ṉe len rey César ben' chnabia' doxen nación Roman'.

⁹Na' Feston' goclaže' yega'aṉe' binḻo len beṉe' Israel ca', da'nan' gože' Pablon': ―¿Bi che'ndo' sao' Jerusalén gona' yeḻa' justis c̱hion' na'le c̱he yogo' da' ca' chosocuiš beṉe' quinga le'?

¹⁰Nach Pablon' gwne': ―Rey Césaren' ba nzoe' le' cont gono' yeḻa' justis, na' cheyaḻa' gac yeḻa' justis c̱hia' laguo' nga. Ca nac beṉe' Israel quinga, le' ṉezczedo' bibi da' xiṉj ṉa' gona' ḻen ḻegaque'.

¹¹Šaca' ba gwdapa' doḻa' o bichle da' ba bena' da' cheyaḻa' gata', bi žia' bi gata'. Perw bibi nona' ca nac dan' chosocuiše' neda' nga, na' nono zaca' gwde neda' laogaque'na'. Da'nan' chṉaba' tia' lao rey Césaren' cont gone' yeḻa' justis c̱hian'.

¹²Nach Feston' bene' yeḻa' güexi'a len beṉe' gwnabia' c̱he' ca' bi yesone' len Pablon' nach gože'ne': ―Ba gwṉabo' tio' lao rey César na' lagüe' nan' šejo'.

¹³Na' cate' ba gwde yeto c̱hope ža, rey Agripa len no'ol c̱he' ben' le Berenice besežine' Cesarean' bedeseguape' Feston' tiox.

¹⁴Na' cate' gwṉeze gobernador Feston' ṉite' yezan ža, nach be'lene' rey Agripan' diža' c̱he Pablon', gože'ne': ―Zoa to beṉe' nyix̱jw Félixen' ḻižya nga cate' bechoje'.

¹⁵Na' cate' gwya'a Jerusalénṉa' bx̱oz gwnabia' ca' na' nochle beṉe' blao c̱he beṉe' Israel ca' goseṉabe' c̱hoglaguan' cont gaque' castigw.

¹⁶Perw na' goše'gaca'ne' bi de costumbr c̱he chio' beṉe' nación Roma gwdecho beṉe' yesaque' castigw še bi yesyediḻlagüen' len beṉe' ca' chosocuiš ḻe' cont yosozoa rson c̱hegaque'.

¹⁷Nach cate' besela'aque' nga beteyo ḻa' gwche'tia' gan' chona' yeḻa' justis na' bena' mandadw gosebeje' Pablon'.

¹⁸Na' cate' bosocuiš beṉe' ca' ḻe', ṉe toz da' mal dan' chacda' yososbague'de' ḻe' bibi gosene'.

¹⁹Dan' chac c̱hegaque', bi chejnilaže' Pablon' can' chesejnilaže' ḻegaque', na' cheso'e diža' c̱he to beṉe' ba got, beṉe' le Jesús, na' Pablon' že' mbancze'.

²⁰Cate' bich bi bežellaža' gona' ca dan' chesac c̱hegaquen' na' goša' Pablon' še chaclaže' yodia'ne' Jerusalén cont gac yeḻa' justis c̱hen' c̱he da' ca' chososbague'de' ḻe'.

²¹Nach Pablon' gwṉabe' šeje' gone' yeḻa' justis c̱he' lao rey César Augusto, na' bena' mandadw beyeyjue' šlac gac gwdia'ne' lao rey Césaren'.

²²Nach rey Agripan' gože' Feston': ―Chaclaža' gwzenaga' can' choe' ben' dižan'. Nach Feston' gože' ḻe': ―Gwx̱e gwzenago' c̱he' šeca'.

²³Nach beteyo gosacxenchgua rey Agripan' len Berenice cate' goso'e gana' chi' gobernadoren', na' ḻecz zjachi' beṉe' ca' chesenabia' soldadw ca' na' yogo' no beṉe' blao c̱he ciudan'. Na' gwdena' Feston' bene' mandadw jasexi'e Pablon'.

²⁴Na' Feston' gwne': ―Rey Agripa, na' len yogo' le'e že'le nga len neto', ca nac benga ze laole nga, yogo' beṉe' Israel beṉe' že' Jerusalén len beṉe' že' Cesarea nga ba gose'e neda' benga naque' beṉe' mal na' yogo'cze' chesene' bi cheyaḻa' bane'.

²⁵Na' ba gwṉabyoža' na' gota'bia' bibi none' da' zaca' c̱hoglaguan' c̱he' gate'. Na' ba gwṉabe' tie' lao rey César gone' yeḻa' justis c̱he', na' ba gwc̱heba' gwdia'ne' ciuda Roma na'ale gan' zoa rey Césaren'.

²⁶Na' chacžejlaža', ḻe bibi chežellaža' gwzoja' reyen' yapa'ne' bin' none'. Da'nan' bac̱h gwleja'ne' laole nga, na' chbechgüeda' chbeja'ne' laguo' le' rey Agripa, cont yeyož gwzenagcho c̱he' na' gata' bi da' gwzoja'.

²⁷Chacda' bi naquen to ḻicha seḻa'ne' Roman' sin cbi gwzoja' še bin' none'.