Lii Lolo nèti Dhèu Pajuu-paleha 1:20-26

²⁰Petrus tuhu hari lii padhai na, peka na, “Uru-uru sèra, dhèu aae Daud suri tèke le ètu dꞌara sasuri Lii Sodꞌa Koa-kio, peka na, ‘Hudꞌi sène era pea nèngu, jꞌajꞌi mi era dhu paꞌela eele; bisa heka dhèu èci sa pea ètu èèna.’ Aa na suri kahèi, aku nèngu na, ‘Hudꞌi sène, sasabꞌa nèngu ra hia asa dhèu leo laꞌe.’

²¹De èdhi hudꞌi tenge dhèu èci ho gati Yudas. Èdhi tenge dhèu dhu bera-bera dènge èdhi nèti uru ka mai. Dhèu èèna, hudꞌi dhèu dhu nèbhu le madhutu Yesus laꞌe-mai, mulai nèti Yohanis sarani Yesus. Aa nèngu èèna, hudꞌi dhèu dhu nèdhi dènge musi madha, na, Yesus kèdꞌi hari nèti mamadhe Na, toke dꞌai lodꞌo Yesus caꞌe hari asa dedha-liru ètu talora èdhi.”

²³Ropa Petrus peka nare sèmi èèna, ka dhèu dhu pakaboko sèra, pamaso ngara dhèu dua. Èci ngara na Matias, aa èci hari ngara na Yusuf (dhu tema le ra paroa na Barsabas; ngara na leo èci hari, na, Yustus).

²⁴Hèia ra sabajꞌa, aku rèngu na, “Ama ètu dedha-liru! Ama dhu meꞌa iie dꞌara dhèu aaꞌi-aaꞌi. Yudas madhe le, tèke eele sasabꞌa na. De Ama pajꞌujꞌu hia jiꞌi dhèu èci nèti rèngu dua se, mia dhu Ama dꞌèi, ho jiꞌi dedꞌe ne jꞌajꞌi mi dhèu pajuu-paleha Lamatua Yesus.”

²⁶Ka ra ère lot, pake ngara dhèu dua sèra. Hèia dhu lèke ka Matias. Ka ra dedꞌe ne jꞌajꞌi dhèu pajuu-paleha Lamatua Yesus, ho na paꞌèci dènge rèngu dhèu canguru èci sèra.