Acts 1:20-26

²⁰Ma sa Pita ka fata lau 'uri, “Ru ne fuli dia be kera kedea laona buko Psalm ki nia 'uri, ‘Na lume nia ka gwau, ma nao ta wane si to laona.’ Ma te kekedee laugo be nia 'uri, ‘Nia lea fuana ta wane lau ne kai talana fua kai ngalia raoe be nia.’

²¹“Nia 'e lea fuana kulu kai filia lau ta wane fua kai rao oku fai kalu na lifurongo ki fuana fatae sulia tataelana na 'Aofia sa Jesus fasia maea. Na wane ne kulu kai filia, nia ta wane ana fikute wane be kera leka oku fai kulu ana kada be sa Jesus nia to 'ua fai kulu, safali mai ana kada be sa Jon siuabua sa Jesus, leka mai ka dao ana fa dangi be God ngalia na sa Jesus fasi kulu 'uria 'i langi.”

²³Ma kera ka filia ro wane ki. Ma satana ta wane ne sa Josef, ne kera saea ana sa Basabas, ma kera ka saea laugo ana sa Justus. Ma satana ruana wane ne sa Mataeas.

²⁴'Urinai kera foa kera ka 'uri, “'Aofia 'ae, 'oe ne 'oe saitamana manatana wane ki tafau. Aia, 'oko fatainia mai fua malu ana kada ne sa ti ana ro wane ne ki ne 'oe filia,

²⁵fua kai ngalia raoe ne ana lifurongolae be sa Jiudas lukasia ma ka leka na 'ana 'uria kula ne bobola fua nia kai to ana.”

²⁶Ma burina ne kera foa tafau, kera ka saketo ana ru dia daisi, fua kera ka dao to'ona sa ti ana ro wane ne ki ne God filia, ma kera ka filia sa Mataeas fua ka rao fainia akwala ma te wane ni lifurongo nai.