Aposol 1:20-26

²⁰Motong la Pita iwete mulu nen, “Ngan betanga yo tiwode ilo ye Rau ke Woungu in nen, ‘Rumu ki tani in sila iken sokorai. Le kin tooltool sa iyepe ye be.’ Inbe betanga damono ki yo iken ye rau tani i, in iwete nen, ‘Katara tool atu mulu a ikoli ye urata.’

²¹“Ngan nen le dada dook mata yo be tatoo a tatara tool in nen. Ole takamata di tooltool yo kanakana ngan taye di tayepe, inbe taye Tool Mai Yesu tapa a tala be taman nga.

²²Le takamata di tooltool yo taye di tayepe ye kene yo Yowan ipamaditi urata ke rriungu di tooltool ye i, in le ise ye lal yo Maro ikaua Yesu a iyegidi inbe imulu a ilo pang ye malala ki i. Ngan ole tatara tool yo nen i, ngan la be ole isu idi inbe taye taraia bingi dook mata pang di tooltool ye maditingi ke Yesu nga.”

²³Ngan Pita iwete pang di nen a imot, motong la tipootoo di tooltool ru edi. Ngan atu in Yosep yo tikiuu ye Basabas, inbe tiwete ene san ye Yastus i, inbe tool san in ene la Matias i.

²⁴Motong la di tooltool tina tipatarau pang Maro nen, “Tool Mai, ong in lom galanga yam am tooltool nga le imot lomam. Le di tooltool ru nga nangai kupootoo i, in kupaposi pam

²⁵a be nen ngan iyei aposol a ikolo Yuta, yesoo iyege urata ki ke aposol, inbe ikoo a la iyepe so ye malala dook tiap ki yo be la iyepe ye i.”

²⁶Motong la tikatte madamada be tikamata, ngan le madamada ipaposo Matias. Le nga titaru be ikaua urata tani in a ila iseke di aposol tina yo sangaul be atu nga.