Aposol nup meme 1:20-26

²⁰Pitönöŋ toroqeba kewö jiyök, “Sumbara (Sam) buk miaŋgöreŋ keu kun kewö ohoget ahöza, ‘Miriŋi mönö baloŋi gwamön kinma. Mi kunŋan toŋi qahö aka maliga miriyök kinma,’ aka keu kun kewö ahöza, ‘Kunöŋ ölöp yaŋgö salupŋe galöm nup memba kinma.’

²¹“Mewögöra aka nini azi kun möwölöhöba kuŋguinga nembuk jitŋe meme aka dangunu ewö kinda Jisösnöŋ kömupnöhök wahöröhi, miaŋgö Buŋaŋi naŋgöba jiba mali dop kölma. Jonöŋ Jisös o melun mem waŋgiiga Kembunöŋ nalö miaŋgöreŋök qenjaröknöŋ anda nupŋi könahiba memba neŋgö gölmenöŋ liliköba anda kaba mali Anutunöŋ sutnineyök waŋgita öŋgöyök. Azi nalö pakpak miaŋgöreŋ kambunine mohotŋe mala korini, mönö yeŋgöreŋök kun möwölöhöinga dop kölma.”

²³Pitönöŋ mewö jiiga azigö jaruba azi yahöt qetŋiri qetket. Kun qetŋi Josef, qetŋi alaŋi Barsabas aka qetŋi kun Jastus. Azi kungö qetŋi Matias.

²⁴Qetŋiri qeta kewö köuluköba jiget, “O Kembu, gi ambazip urunini körek pakpak möt kutuzan. Miaŋgöra gi azi kietköreŋök niŋia möwölöhözani, mi mönö kondel neŋgiman.

²⁵Judasnöŋ goŋgiba geŋmoŋ aka eta aposol nup mosöta bölöŋamŋaŋgö dop ayuhuba geyöhi, yaŋgö salupŋe azi kunöŋ mönö aposol aka kinda melaimelai azigö nup memba malma.”

²⁶Mewö jiba yetkö kiawen (kas, lot) algetka Matias asuhuyök. Asuhuiga aposol 11 yeŋgö sutŋine dum kun waŋgigetka kambuŋine toroqeyök. Mewö.