Leviticus 19:7-13

⁷Emun egkeenen niw heini te iketelu he andew ne kenè ku heini edewaten su utew mezaat heini.

⁸Is minsan hentei he egkaan kayi ne zuen din televaken su ebpendezeisayen din is para kediey, umbe haazà he etew kenè niw en isipa he zuma niw.

⁹Emun edraǥun kew ne kenè niw emina te edraǥun is diyà te kilid te pemuleey niw, ne kenè niw en likui pekirerawa is nengesamà.

¹⁰Iring ded dutun is beeli niw ziyà te pemuleey niw te paras, kenè niw en likui wey kuwaa is nengeulug. Teǥaka niw en heeyan para te menge pubri wey te menge lumelengyawà. Iyan a kes Nengazen he Megbevayè niw.

¹¹Kenè kew mebpenakew, medtarùtarù, etawa medlimbung te iring niw he etew.

¹²Kenè kew penangdù te tarù he egemiten niw is ngazan ku, su emun ebeelan niw heeyan ne ebpeel-elezan a keniyu. Iyan a kes Nengazen.

¹³Kenè niw limbungi wey tekawi is iring niw he etew. Kenè niw lenglengani te edsuhul is etew he impeterebahu niw.