Leevi 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Ɠɔoɠɔ GALAGI ɓɔɛni Moize ʋɔ ta Aalɔn, é ɠɛ ti ma:

²«À ɓɔɛ Izelayɛle nuiti pɔ, wo ɠɛ ti ma: Suaiti kpein saama, niiti ti eteai zu, wɛlɛ niiti ka wa zoo wo ti mi.

³Wa zoo wo suai ma zii pɛ mi, nii polokagi ɠaaʋaliai, é miizu, é ɗa tɛ ʋolu.

⁴Kɛlɛ niiti wo la ti mia, anɛɛ ni ti-ʋolokagi ɠaaʋaliʋɛ, ɓaa ti miizu, ti ɗa tɛ ʋolu, naati ta ga niiti: ɲɔmɛi, anɛɛ ni toɠa miizu, é ɗa tɛ ʋolu, kɛlɛ polokagi ɠaa la ʋalini. Wa deve ga kɔzɔʋɛ.

⁵Fasa wolii ɓalaa, a miizu, é ɗa tɛ ʋolu, kɛlɛ polokagi ɠaa la ʋalini, wa deve ga kɔzɔʋɛ.

⁶Zaɓei ɓalaa, a miizu, é ɗa tɛ ʋolu, kɛlɛ polokagi ɠaa la ʋalini, wa deve ga kɔzɔʋɛ.

⁷Boigi ɓalaa, polokagi ɠaaʋaliʋɛ, kɛlɛ é la miizu, é ʋa ɗa tɛ ʋolu, wa deve ga kɔzɔʋɛ.

⁸À mina ti-ma zuai ta mi, wo mina vɔɔɠu ti-ma ʋoomai ta ʋa. Wa ti leve ga ti ɠɔzɔʋɛ.

⁹«Ziɛ wu zuaiti kpein su, wɛlɛ niiti ka wa zoo wo ti mi: niiti ma woekegi ti ʋa, ta maaɠalai ti ma, ti ziɛiti bu, é ɠɛni ga kpoloɗɛiti ɓaa ziɛ wolaiti.

¹⁰Kɛlɛ wa naati deve ga ti ɠɔzɔʋɛ, niiti kpein ma woeke ge la ti ʋa, ɓaa maaɠala la ti ma, ti kpein saama, ti yɛnvuzu ziɛi wu, é ɠɛni ga kpoloɗɛiti ɓaa ziɛ wolaiti.

¹¹Wa ti leve ga ti ɠɔzɔʋɛ. À mina ti-ma zuai ta mi, wa ti-ma ʋoomai leve ga ti ɠɔzɔʋɛ.

¹²Wa naati kpein deve ga ti ɠɔzɔʋɛ wo ɠaazu, niiti ti ziɛiti bu, ma woeke ge la ti ʋa, maaɠala la ti ma.

¹³«Wɔniiti saama, wɛlɛ niiti ka wa ti leve ga ti ɠɔzɔʋɛ, nu la ti mia: ɗuai ma zii pɛ, koɠɛi ma zii pɛ,

¹⁴seeʋei ma zii pɛ,

¹⁵kalawɔnii ma zii pɛ,

¹⁶sizigoi ma zii pɛ, buungi ma zii pɛ,

¹⁷kpoloɗɛ laaʋɛ wɔnii ma zii tanigaa,

¹⁸ziɛ wɔnii ma zii tanigaa,

¹⁹ta zɛgbɛlutugi, ta dɛvɛi.

²⁰«Fuluani goi kpein koʋegi ba, é ɗa ziɛ ɠɔɠɔiti ga, wa naati deve ga ti ɠɔzɔʋɛ wo ɠaazu.

²¹Kɛlɛ fuluaniiti kpein saama, ti ɠoʋesu, ti ɗa ziɛ ɠɔɠɔiti ga, wa zoo wo naati mi, niiti ti-ɓeɠaiti ti ti-ɠɔɠɔzapalagiti maazuʋɛ, ti ɗa ʋili zooi ma.

²²Pɛtɛ nii wa zoo wo mi: kotogi ta kpazinɛgi, ta ti-ma ziiti.

²³Wa fuluani zɔiti deve ga ti ɠɔzɔʋɛ, niiti ti ɠoʋesu, ta kɔɠɔi ti ʋa.

²⁴«Suai tanigaa ta ná, ta zoo ti wo ɠɔzɔ, nu-o-nu a vɔɔɠu ti-ma ʋoomai ta ʋa, naa ɠa ɠɔzɔ eyɛsu kpɔkɔi zeeli.

²⁵Nu-o-nu a ti-ma ʋoomai ta zeɠe, kɛni é ná-seɠeiti gba. Kɔzɔai ɠa yɛ de, eyɛsu kpɔkɔi.

²⁶Wa suai naa kpein deve ga kɔzɔʋɛ, nii polokagi ba kɛlɛ kɔɠɔi ɠaa la ʋalini, ɓaa é la miizu, é ʋa ɗa tɛ. Nu-o-nu a vɔɔɠu ta ʋa, toɠa ɠɔzɔ.

²⁷Wa naati kpein deve ga ti ɠɔzɔʋɛ, niiti ti-ɠɔɠɔi naani, ti ziɛzu ti-ɠɔɠɔzapalagiti ga. Nu-o-nu a vɔɔɠu ti-ma ʋoomai ta ʋa, toɠa ɠɔzɔ eyɛsu kpɔkɔi zeeli.

²⁸Nu-o-nu a ti-ma ʋoomai ta zeɠe, kɛni é ná-seɠeiti gba. Kɔzɔai ɠa yɛ de, eyɛsu kpɔkɔi. Wa ti leve ga ti ɠɔzɔʋɛ.

²⁹«Pɛtɛ, sua goiti saama, ti ɓokposu zooi ma, niiti wa ti leve ga ti ɠɔzɔʋɛ, naati ta ga: inɛgi ma zii pɛ,

³⁰ta zeegoi, ta kooloi ma zii pɛ.

³¹Wa ti leve ga ti ɠɔzɔʋɛ, sua goiti saama. Nu-o-nu a vɔɔɠu ti-ma ʋoomai ta ʋa, toɠa ɠɔzɔ eyɛsu kpɔkɔi zeeli.

³²Sɔɔla kpein, ti-ma ʋoomai ta a vɔɔɠu ba, naa ɠa ɠɔzɔ: gulu aniɲakai, ɓaa seɠei, ɓaa kɔlɔ, ɓaa ɓɔlɔ, ɓaa aniɲaka kpein nu a ɓɛdɛ ɠula su. Kɛni é gba ga ziɛi, kɛlɛ kɔzɔai ɠa yɛ de eyɛsu kpɔkɔi zeeli, naa ʋolu toɠa ɲade niina.

³³Ni ti-ma ʋoomai a loona pɔlɔ liɠii zu, su anii ɠa ɠɔzɔ, wa aniɲakai naa wolo.

³⁴Daamiani kpein a ɠɛ ga nu mi, ni pɔlɔ liɠii naa zu ɗɛi ta a ʋuuna ma, naa ɠa ɠɔzɔ. Ni ti-ma ʋoomai a loona aniɲakai nɔpɛ su, kpɔɔle ani kpein, nii a ɠɛ su, naa ɠa ɠɔzɔ.

³⁵Sɔɔla kpein, ti-ma ʋoomai ta a vɔɔɠu ba, naa ɠa ɠɔzɔ. Ni a ɠɛna ga fuului ɓaa abu laazuʋɛti, wa ti ɠoloɠolo. Ti ɠɔzɔʋɛ, wa ti leve ga ti ɠɔzɔʋɛ.

³⁶Ni a ɠɛna ga ziɛungi ɓaa ziɛ makɛsuʋɛti, naati ti la ɠɔzɔa, ti ɲadegai ɠa yɛ de, kɛlɛ zɔi nɔpɛ a vɔɔɠu ti-ma ʋoomai ta ʋa, naa ɠa ɠɔzɔ.

³⁷Ti-ma ʋoomai ta a loona ani zuwu ma, nii é vazasu, naa ɲadegai ɠa yɛ de.

³⁸Kɛlɛ ni nu a ziɛi ʋuuna ani zuwui ma, ta ti-ma ʋoomai ta loo ani zuwui naa ma, wa deve ga kɔzɔʋɛ.

³⁹«Suaiti ti ɠɛɛzu wo ʋɛ ga daamianigi, naa ta a zaana, zɔi a vɔɔɠu ma ʋoomai ʋa, toɠa ɠɔzɔ eyɛsu kpɔkɔi zeeli.

⁴⁰Zɔi a ma zua ʋoomai ta mi, kɛni é ná-seɠeiti gba. Kɔzɔai ɠa yɛ de, eyɛsu kpɔkɔi. Zɔi a ma ʋoomai zeɠe, kɛni é ná-seɠeiti gba. Kɔzɔai ɠa yɛ de, eyɛsu kpɔkɔi.

⁴¹«Wa sua goi naati kpein deve ga ti ɠɔzɔʋɛ, niiti ti ɓokposu zooi ma. Nu mina ta mi ɲɛgɛlɛin.

⁴²À mina sua goi naa tanɔpɛ mi ɲɛgɛlɛin, niiti ti ɓokposu zooi ma, anɛɛ niiti ti ɓokposu ɠogi ma, anɛɛ niiti ti ziɛzu ɠɔɠɔ naanigɔiti ga, ɓaa ɠɔɠɔ mɔinmɔingiti ga, mazɔlɔɔ wa ti leve ga ti ɠɔzɔʋɛ.

⁴³À mina ɓɔɠɔ ɠɔzɔ ga naama zuaiti ti ɓokposu. À mina ɓɔɠɔ ɠɛ ga ɲadetala nu ga ti maaʋele.

⁴⁴Mazɔlɔɔ nà ga Ɠɔoɠɔ GALAGI, wa-ƓALAGI. À ɓɔɠɔ ɲade, wa ɲade, mazɔlɔɔ nɔ̀un ɲadegɛ. À mina ɓɔɠɔ ɠɔzɔ ga naama zua goiti, ti ɓokposu zooi ma.

⁴⁵Mazɔlɔɔ nà ga Ɠɔoɠɔ GALAGI, nii é wo ɠula Ezipete yooi ʋa, ga gè ɠɛ ga wa-ƓALAGI. À ɲade, mazɔlɔɔ nɔ̀un ɲadegɛ.»

⁴⁶Tɔgi ɠana, é ʋilɛ suaiti ta-vai ʋa, ta wɔniiti, ta fuluaniiti kpein ti vulua, ti yɛnvuzu ziɛiti bu, ta fuluaniiti ti ɓokposu zooi ma,

⁴⁷naa ɠa a kɛ wo zɔɠɔzu ɠwɛɛ ani ɲadegaiti ba, ta niiti ti ɠɔzɔai, suai nu a mi, ta suai nu la mia.