Kawandila 4:2-9

²N bara a maɲɔxun, mixi faxaxi nan sɛɛwaxi dangife mixi baloxi ra.

³Mixi naxan mu barixi sinden, nee xa hɛɛri dangi mixi faxaxi nun mixi baloxi ra, barima e mu ɲaxankatɛ kolon naxan na rabafe yi duniɲa ma.

⁴N bara a to, mixi walima e xunnakeli fenma milɛ kui. Yi fan findixi fe fufafu nan na, alɔ birafe foye fɔxɔ ra.

⁵Xaxilitare a bɛlɛxɛe findigilinxi a ma, a mu walima, han a xun nakana.

⁶Bɔɲɛsa dondoronti fisa katɛ gbegbe bɛ. Na katɛ luxi nɛ alɔ mixi naxan birama foye fɔxɔ ra.

⁷N bara fe fufafu gbɛtɛ fan to yi duniɲa ma.

⁸Xɛmɛ nde nu na naxan nu na a kerenyi ma, mixi yo mu nu na a bɛ. A nu walima tɛmui birin, kɔnɔ a mu wasa a xa naafuli ra. A naxa a yɛtɛ maxɔrin, «N na walife tɔɔrɛ kui nde bɛ?» Yi mɔɔli fan findixi fe fufafu nan na.

⁹Mixi firin malanxi sɔɔnɛya dangife mixi ra naxan luma a keren. Na firinyie xa wali dangi na mixi kerenyi gbe ra.