Kɛɛwotiiti 2:9-31

⁹Adɛi de ga, Paate nuiti, ta Mɛde, Elame, Meezɔpɔtami, Zudee, Kapadɔse, Pɔn, Azi ɠoʋii,

¹⁰Filizi, Panfili, Ezipete, naa ʋɛɛ Silɛne lugi zu ʋa Liɓi yooi zu, ta zɔiti ti zeɠeai Wɔlɔme,

¹¹Kelɛte ta Aalaɓi: Zuifuiti be-o ɓaa wɛɛinti be-o, niiti ti ʋilɛgai Zuifuiti ta-ƓALA pelei ma. Ade pɛ, ada ti woomɛnisu ade ɓɔɠɔ wooiti su, ti ɗa GALA ná-kɛɛwoti wolaiti bo.»

¹²Ti pɛ ti laavɔɔni, tanigaa ti ɠɛ unga wuulee, ti ɗa ɠɛ ɓɔɠɔ ma: «Niima vai ʋoluʋɛ ɠa ga lee?»

¹³Taɠiligaa ti ɠɛni ɠɛɛzu ma: «Dɔɔ nɛɛnɛgi ɠa é ti zogai!»

¹⁴Piyɛlɛ wuzeɠeni é lo, keela puugɔ maazu ɠilagi (11) zɔiti saama, é wooɠulani, é ɠɛ ma: «À woilo ma-o! Zudee nuiti ta wɔigi wo ɲii wosu Zeeluzalɛme, wo niima vaiti gaaɠa, niiti ti ɠɛɛzu.

¹⁵Dɔ lɛi é ʋa ɠɛ niima nuiti ba, eɠɛʋelei wo ɠisiɛzu la, folo liegi kpaazuʋɛ nɔ ɠa dɛ ade su.

¹⁶Kɛlɛ nii GALA goo wo nui Zowɛle boni, naa ɠa é ɠɛɛzu ɠani. É ɠɛni ma:

¹⁷‹GALA ge ɠɛ ma: Folo ɠaaɓelagiti su, nà nà-Zɛnvui yeizu nuɓusɛi pɛ ma. Wo-loun zunuiti ta wo-loun anzanuiti ta GALA gooiti bo, wa-wuzeɠe niinɛgiti ta kulakɛlɛmaiti ka, wa-ɠɛwola ʋɔlɔiti ta segiti bo.

¹⁸Ungo, naama voloiti su, nà nà-Zɛnvui yei nà-botiɠɛ zunuiti ta nà-botiɠɛ anzanuiti ma, ti ɗa GALA gooi wo.

¹⁹Nà maaɓɛlɛ vaiti kɛ geeɠɔlɔgi zu, ta poogiti zooi ma, ɲamai ta abui ɠa ɠɛ ná, naa ʋɛɛ abu luului ma lonaɓiingi ʋa.

²⁰Foloi ɠa ʋote ga kpidii, alugi ɓɔi eɠɛ ɲamai, aisa Ɠɔoɠɔ GALAGI ná-foloi ʋa zeeli, folo wolai, nii maayikiai.

²¹Naazu zɔi nɔpɛ a wooɠula Maliɠii ma, GALA ka kizo.›

²²À woilo niima wooiti ma, wɔi wo ga Izelayɛle nuiti, wa ɓɔɠɔi wo kwɛɛni ga GALA ge yeezeini Yesu Nazalɛte nui wu wo ɠaazu, mazɔlɔɔ GALA ge ɠɛni laavɔɔ vaiti, maaɓɛlɛ vaiti ta laavɔɔ ʋoogiti kɛɛzu ga tɔun maaʋele wo zaama.

²³Zunui naa ɠwɛɛni wo ma, é zoloo GALA ná-devei ta ná-seikpasui ma, nii é kɛɛni ma yeeluɠɔ kaite, wo paaʋɛ siɛgi zu wo zɛga la tɔ koloɠolo nuiti zea, ti kpadɔ saa wului ma.

²⁴GALA ge buzeɠeʋɛ ʋolu, é kula saai ma zoolɛiti su, mazɔlɔɔ naa la ɠɛni zolooga ga saai ʋa makɛ ba ná-zobogi wu.

²⁵Davide niima wooi woni, é ʋilɛ Yesu ʋa, é ɠɛ ma: ‹Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ, nii a kɛ gè mina ɲiikpi eyɛsu pɛ.

²⁶Naa ɠa é ba, zìi ɠaanɛa, gòoiti daavegɛ ga koozunɛɛi, kpùsɛi ɓɔɠɔi ɠa looɠosu, makɛgai kitogi zu.

²⁷Mazɔlɔɔ è la ɠɛlɛa bà, gè ʋa yɛ gɔvɛalaazu, è la vaa bu nɛ̀i gè ga ɗa-wotii ɠɛ nui, gè ga wooɠɛɠila nu, gè ʋa luula kabayeɠei zu.

²⁸È zɛnvu ʋelei lɛa ga ze, ɗa nɔ̀un daave ga koozunɛɛi è ɠɛɛ vai zu kòba.›

²⁹Kɛ̀ɛlointi, zobogi veeʋɛ bɛ̀ ga gè ɠɛ wo ma: Ade-mɛmɛwola Davide zaaʋɛ, maaɠulu, ná-kabai ɓalaa ka ade zaama zaaɠaza.

³⁰Kɛlɛ é ɠɛni ga GALA goo wo nui, ta é ɠɛni kwɛɛni ga GALA ge minazeɠeni bɛ, é ɠona ga mavofodai ta ɠa zei ná-masa kpɔkpɔgi ɠa.

³¹Kilista wuzeɠe vai, é ɠula saai ya, naa ɠa Davide kaani ma yeeluɠɔ, naama wooi ɠa é boni ga: ‹GALA ge la ɠɛlɛa bà, gè ʋa yɛ gɔvɛalaazu, é la vaa bu, kpùsɛi ʋa luula kabayeɠei zu.›