Hechos 2:9-31

⁹Nu nzhi lo re be xaa nze re yizhyo ne: Partia, Media, Elam, Mesopotamia, Judea, Capadocia, Ponto, Asia,

¹⁰Frigia, Panfilia, Egipto nu Libia kwaan nak gax Cirene. Noka nzhi lo be xaa Roma. Tub naz be nak xaa Israel axta ngol be, lee stub naz be nzhak xaa Israel.

¹¹Noka nzhi lo re be, xaa yizhyo Creta nu Arabia. Nu rese be nzhon kawdizh re xaa mer xtizh be, re kwaan gro doo mle Dios.

¹²Rese xaa nzhi ndedyall, nixa nanet xaa cho kwaan le xaa xgab, nu nabdizh xaa lo wechxinn xaa, nzhé xaa: —¿Cho kwaan re kwaane?

¹³Per lee stub naz xaa nxizhno xaa nu mbezh xaa: —¡Kan nel nzuzh xaa!

¹⁴Zee lee Pér kwaan re xchiibtub xaa mkayaa yalnabeyy lo Jesús mzoli. Zee ngunii Pér nye, nu nzhé xaa: —Xaabyi, xaa lazh na, kenzha rese gu kwaan nii na. Rese xaa nzho naz Jerusalén nu rese be nze nee, nzhaal ne re gu kwaan nii na lo gu nal.

¹⁵Nanzuzht re nu kwentaxa nle re gu xgab, nel pensa nak las nueve, garziil doo.

¹⁶Re kwaan ngok nak kwaan mzaa Joél kwent, tub xaa mzaa kwent kwaan nzhé Dios lo lee xaa, leezha nzhé xaa:

¹⁷Dios nzhé: “Re mbizh gwluzh, lee na xaal Mbi Naban cheen na lo rese myet lo yizhyo. Nu lee re xgann gu nu re xchap gu, zaa kwent kwaan yé na lo lee xaa, le na luu tub kwaan lo re xaa mad, nu lee re xaa gox chaa lextoo.

¹⁸Lo re xmos na xaabyi nu ngwnaa, xaal na Mbi Naban cheen na re mbizh zee, nu wdizh xaa re kwaan luu na lo xaa.

¹⁹Le na re kwaan gro doo naz leen yiba nu lo yizhyo, nu luu ren, nu ki, nu xkaw zhen.

²⁰Lee mbizh gak yalnakaw, nu lee mbee na mod ren, gorna zeeraka zhin mbizh gro doo cheen Xaa Nabeyy.

²¹Per rese xaa naab lo Xaa Nabeyy, zaa Xaa Nabeyy yalnaban kwaan tira lo xaa.” Joél 2:28-32

²²’Kwaanzee kenzha re gu, xaabyi sawlazh be, kwaan nii na lo gu nal. Gu ne wen, Dios mxaal Jesús, xaa yezh Nazaret lo re gu. Nu xaa ne mle zyen doo kwaan naro, nu kwaan re gu mdedyall ngune. Sbaa mlu Dios lee Dios mxaal xaa.

²³Axta yilo mlela Dios xgab nen cho kwaan le gu Jesús. Re gu mzen xaa nu mzaa gu xaa lo re xaa mbit xaa, mkee xaa xaa lo krus.

²⁴Per Dios mseban xaa, namlaat Dios xaa lo re xaa ngut, nel nyent mod le yalgut gan lo xaa.

²⁵Nel rey David leezha ngunii xaa kwent cheen Jesús, nzhé xaa: Tubka nzo Xaa Nabeyy kwaan na, lee xaa nzo lad li lo na, zee tubka nye nzo na.

²⁶Kwaanzee nyak doo lextoo na, nu nzholl na kwaan roo na. Kwaanzee nela na nyent cho kwaan gak na gorna yet na,

²⁷nel nalaat lu na leen Hades, pa nzho re xaa ngut, nu nixa nalaat lu lux kwerp cheen na, kwerp cheen xmos lu, Xaa Nali nak.

²⁸Mlu lu naz cheen yalnaban lo na, nu nyakdoola na nzo lu lo na. Sal. 16:8-11

²⁹’Wech na, kwaane klar doo nak, lee xey be David ngut, nu ngubyo xaa, nu lee baa cheen xaa nzoka axta nal.

³⁰Per David ngok tub xaa mzaa kwent kwaan nzhé Dios lo lee xaa yilo, nu ne wen xaa lee Dios nzhé lo xaa, telisa tub dii cheen xaa nabeyy mod mnabeyy lee xaa.

³¹Snee ngunii David, mod tub xaa mzeen kwaan ded, ngunii xaa cheen yalmroban cheen Xaa Xaal Dios Nabeyy, nu ngunii xaa lee xaa nalaket leen Hades, pa nzho re xaa ngut, nu nixa naluxt kwerp cheen xaa.