Aposel 2:9-31

⁹Makia mapek koropá yakápnámp arop nomo apár Patia fi mekamp, Midia fi mekamp, Elam fi mekamp, distrik Mesopotemia mekamp, distrik Judia mekamp, provins Kapadosia mekamp, provins Pontus ntia Esia mekamp,

¹⁰distrik Frigia ntia Pamfilia mekamp, tá Isip fi mekamp, distrik Libia ankwapmwaek kɨrɨkɨri Sairini taun wonae fikamp arop, tá nomo Rom fi mekamp arop mapek koropea yakáp námp.

¹¹Tá nomo Judaoia maok, tá nomo arop ankwap fi Juda lotu i konap nɨnɨkaok lotu i konámp arop, nomo apár amor ke Krit, tá distrik Arebia, nomo ponankor am fárákapao Kwaromp kárákáre kor tére konap kar nomp kar fek sérarap wa námpon.”

¹²Aeria maok, ponankor kokorokoria nɨnɨka waeria maok, námoku kok támao arakrá sérarria téréménkrá maok, “Máte apae fi korono?”

¹³Aeapo maok, ankwap fárákapao aposel fákáreran wouroumprá sérarrá, “Táte wain ént wourékam fária mánmánrá paokop napono.”

¹⁴Tá Pita mom-sámpramp aposel fákárerént yakria maok, kar kárákáre fek séria maok, am koumteouráp aropan arakrá sér, “Juda yumo, tá Jerusalem meknámp koropnap arop fákáre yumo te ono sénamp kar má fwapia woupwi pátea wawia maok, yumo am ankank fi nke nap má mérenke.

¹⁵Yumo te, mámá arop fákáre máte mánmán napon yonkwae rape? Mono. Oukoumwan koumounek fépér mo nap fek sárakok ke mwar ara, arop mánmán mwanap pourou mono.

¹⁶Mámá ankank oukoumwan korop námp te wokwaek profet Joelo sérimp niampon. Mao arakrá sér,

¹⁷‘Kwaro sérrá, “Pwarnámp yae fek te, ono onomp Spirit fek koumteouráp aropamp pourouk oupoupourrá kák nanampono. Tá yiráp poumou-tárápu tá yiráp yupu-tárápuao kor profet kar fek onomp kar farákáp mwanapon. Tá ono yiráp tár-ménkiran nkwakwe make yém nke nap niamp yénkép nanko nke, tá mér aropao kor yémén nke mwanapon.

¹⁸Tá am ke fek táman, onomp tére konap arop ntia tére konap koumteouamp pourouk onomp Spirit oupoupour nánko, am fárákap onomp kar profet kar fek farákáp mwanapon.

¹⁹Tá yámar mek te momwar pourouráp ankank yororia, tá apárok kárákáre yororo nanamp te yɨri, yaomwi tokwae, yaomwi souri má apár má oupouroup yak naenámp te, am yae korop naenámp ke fek námpon.

²⁰Am ke fek ono yámar sámpea arákár nanko kɨrɨkɨp korop, yunk sámpea arákár nanko yunk noumouriria yɨri niamp naenámpon. Nánkár wakmwaek te, Kwaro náráp Yae Tokwae fek náráp kárákáre ntia wae tokwae má apár ponankor yénkép naenámpon.

²¹Am ke fek ponankor koumteouráp arop Tokwae Karan ‘Námwan yaewourae’ ria wumwi napo, mao am fárákapan warko éréképeanánko, yae-párák yakáp mwanapon.” ’ Joelo profet kar fek makrá farákápámpon.”

²²Pita warko ankwap kar sérrá, “Israel fi mekamp arop yumo te woupwi pátea onomp kar wawenke. Ono yumwan Nasaret mekamp Jisasoi námpan sénae rae: Yumo te nkwakwe make tére kárákáre Kwaro maomp yaek yumo ou mek yororo nánko nkea méri napon. Mao takimp te yumwan, námoku sámp-kérép nanko éknámp aroprá mérenkria ninámpon.

²³Kwaro wokwaek kar tak mwanaponorá nɨnɨki tari námpan maok, am aropan yiráp yaek pwar námpon. Aenánko yumo támao kwatae nɨnɨkráp aropamp yaek sánk napo, yaopwae porokopramp fek man pukupia, sumpwi pap napon.

²⁴Aenapan maok, Kwaro warko man fárámpea papria, mao warko, am sumpwi sámpnámp touwe kwatae mek taki yakanori pwar moi námpon. Am te apae riteanápe, sumpwi te man sámp-fákeyak naenámp pourou mono.

²⁵Devito kor man takrá sérimp, ‘Ono nke nanko Tokwae Karao kumur méntép onomp wonae fik kar yak námpon. Mao wonae fik yakriaka onan kárákáre sáp námpara, onan ankwap ankank te apápia kour me woukoupá pap mono.

²⁶Aenámpan onomp nɨnɨk te kwapwe kare nánko, ono mámá kar warákárria sénampon. Ono te sumpwi nanamp aropao maok, Kwaro onan kwapwe kare ankank sáp naenámpan yépékrá yak nampon.

²⁷Am te apae riteanápe, amo onan, waempomp némpouk yakaeria pwar mono. Tá amoku nánapinap arop te, numwar apár me mek mákáreanoria pwar mono.

²⁸Amo onan yiki yak nanamp mwae wokwae yénkép napono. Tá amo te onont yak napo maok, am fek táman warákár tokwae nanampon!’ Mámá kar te Devito wokwaek makrá farákápámpon.”

²⁹Pita warko ankwap kar sér, “Kémpiyae tárápu, ono yumwan érik sénampon: Nomp ounáp Devit mao te wae sumpwi nánko maok, apár me mek papapono. Am man papap apár me te, nomo ou mek yakrá koropea, oukoumwan kor yak námpon.

³⁰Aeno Devit te profetara, mao te wae mér, Kwaro kare kar narek séria arakrá sér, ‘Nánkár wakmwaek te, ono waráp ounápén nánapitenanko, mao te amo King yak napnámp taknámp yak naenámpon.’

³¹Wokwaek kar te, Devito Kwaro tére naenámp ankank wae nkeanámpan, Kraiso warko fárámp naenámpan sérimpon. Mao sérrá, ‘Kwar te man, waempomp némpouk yakaeria pwar mo, tá maomp pourouao kor mákáre mono’rá sérimpon.’