Polien 2:9-31

⁹Xir rabe ngan Partia, Midia, e Ilam; ngan Mesopotemia, Sudea e Kapadosia; ngan Pontas e Esia;

¹⁰ngan Frikea e Pampilia; ngan Isip e rin xil xa be Libia sangas visal Saerin. Rute e xir rabe Siu xil te hal Rom, e ngan tesav e xir labe te hal Rom xa labit xati tengan lihusil Hi e rae na Siu xil.

¹¹Rute sav mun labe ngan Krit e Arebia. !E tave ti neta xa ranggo ut sav xil holu xa mak, e xir vus di ralong xil di lasepin e sepinien nar xati xil usil holesok xil xa tellep pupu xa Hi di tepol ni!”

¹²Xil vus latemanin e lanem holu usili. Ma lasis pilei xil mun labit, “?Naha vari koute te holesok xil ak?”

¹³E rute xil lasep pepamen ni eloheoh xil labit, “!Moletin xil xai lamun tova tang e latalang ni!”

¹⁴Di, Pita misoh del eloheoh sav xil xa labe tei e le tei (11), e mikei nggeih ba mi vanut moletin xil ak bit, “Xir Siu xil, e xamim vus xa mudi e Serusalem e melele ak, muteong ni nou e nihit kil koute te holesok xil ak mi xamim.

¹⁵Moletin xil ak latamun ti vaxoni ngan xa di munemi. Taxeak be naen klok makoe tang.

¹⁶E‑e. Naha xa di mupusi nggoni ngan taxa Hi tehit lelen ni texo provet Soel tetiamu tehit,

¹⁷‘E melengien kor xil, inou nisa Ninin Eo navan mi moletin xil ngasen. Horamue e atuli namim xil lihit lelen sepinien navan xil. E horam maxoe xil ti lipus kil nenemien xuxus xil ixo Hi, e momatu xil lipus kil neta ixo metuveen xil.

¹⁸E melengien xil ak, inou niteh rat Ninin Eo navan ha ise xat moletin navan xil vus ituxoh tiramue e atou xil mun xa labe slev tang. Reitin, xil mun, ti lihit lelen sepinien navan xil.

¹⁹Inou nipol ni holesok xil xa tellep listal e tilang hat, e nipisen xeihen navan e ut etan. E ut etan, nipol ni holesok xil listal ixoni melele te vaeen: ra ileh, e upang e eas ituvan e ut ngasen.

²⁰E tilang hat, meteneai mei imaluxoluk, e aveti imei ipili ixoni ra. Melele xa moletin xil lipus holesok xil ak mei istal, lipus kila xa melengien xa eilep na Hi Suv sangas vastal xa mei ilepis rin na moletin xil vus.

²¹E melele nen ak, ngan xil vus xa likes nou ve tutouen, inou, Hi Suv, niteh meulien e xil.’”

²²Pita biteni mun mi xil bit, “!Tuxoli xil te hal Isrel, muteong ni sepinien xil ak! Melele xa Iesu te hal Nasaret teta tamu tetel xamim, Hi tepisen kila xa xi tehe Mesaea nan texo xeihen xa tesa ni mini tengan vapol ni merekel xil e holesok sav xil xa tellep pe valnaomim xa vasak ni mutemanin. Xamim vus mukil kuhi xa ngan ak be reitin.

²³E nggusil lingxatien nan, Hi xa mikil holesok xil vus xa di mistal teling Iesu pe hemim. E xamim, mutesa maten mini melele xa mutexeih xat ngan xil xa latahusil ti rae xil na Hi tengan liti xati e eivave.

²⁴E Hi tesak ni temea rilomun ra maten tengan nahur ti mun longpangasien teni. Vengan xa xeihen te maten misakras vahur xati.

²⁵Ngan ak nggoni ngan xa suv toto Deved tetiamu tehit lelen ni usil Iesu tehit, ‘Vehakut, napus Hi Suv de riuk metu. E uluk nakan ti vengan xa xi de visal nou.

²⁶Reitin, nabesi nou e nasa memesien ba mini. E naling nenesien navan en xa isikoe xol tenbeok.

²⁷Reitin, nakila xa namaen ninin navan ti nate von maten. E namaen ni ti tiei navan, moletin eo nan, tengan navolel e vul te tehinen.

²⁸Xi pisen suse te meulien minou. Nihesi nou vehakut vengan xa xi de visal nou.’”

²⁹Pita biteni mun mi vanut moletin xil bit, “Tuxoli xil te hal Isrel, inou nihiteni imal tang mi xamim usil Deved, avu nar. Xi temat, e latetihin ni. E von tehinen nan da tak duxoh xosali.

³⁰Rakila xa xi tehe provet tei. Xi tekila xa Hi tepol ni hitxatien te xeih tei mini xa isak ni tei e vatimol nan ihur voninen e mei ihe suv toto.

³¹Suv toto Deved tepus kil naha xa Hi ipol ni e melengien xil xa ti imei. Ma tesep usil mea rilomunen na Mesaea melele xa tehiteni tehit, ‘Hi namaen ninin navan ti nate von maten. E namaen ni ti tiei navan, moletin eo nan, tengan navolel e vul te tehinen.’