Iritigankaneegi Jeso 2:9-31

⁹aroegi poniageigankicharira parikotipageku Paretoku, Meroku, Irameku, Mesopotamiaku, Joreaku, Kaparoshiaku, Pontoku, Ashiaku,

¹⁰Pirijiaku, Pampiriaku, Egipitoku, aikiro okaragetanakera Irivia oatakara Shireneku ontiri aikiro Iromaku.

¹¹Aiñoegi jorioegisanorira intiegiri aikiro pashini giatakoigiririra. Aikiro aiñoegi poniaigankicharira Keretaku ontiri Araviaku. ¡Maganiro aroegi akemaigavakeri iniantaiganakarora anianeegi ikamantakoigakerora yovetsikagetakerira Tasorintsi yogikoneatakerora iragaveane!

¹²Itsarogavageiganake yogavageiganake kavako ikantavakagantaigakarira: —¡Ejee! ¿Tatatyo oitara oka?

¹³Kantankicha ikonogagarantaigaka onti isamatsanaigakeri ikantaiganakera: —¡Onti niakagaigakeri ishinkiro!

¹⁴Yaratinkamatanaketyo Perero itentaiganakarira maganiro iritigankaneegi Jeso inianakera imaraenkarikatyo kara ikanti: “Atsi kemisantaigavakena nonkamantaigakempira maganiro viroegi Joreakunirira intiegiri timaigatsirira aka Jerosarenku.

¹⁵Maika pineaigakena ontinirikatyo noshinkiigaka, kantankicha teratyo ario noshinkiigempa, ikyaenkatari gaenokapaacha poreatsiri.

¹⁶Ontityo otsataganakara ikamantakotanakerira pairani kamantantatsirira Joere ikantakera:

¹⁷‘Ikantake Tsorintsi: Impogini panikyara ontsatagagetanakempa magatiro nosariagetakarira pairani nontigankimoigakeri Nosure intimasurentaigakerira maganiro matsigenkaegi. Yogari ananekiegi noniakagaigakeri inkamantakoiganakenara. Yogari ikyaenkarira gaenokageiganankichane noneakagaigakeri posante, kantankicha onti onkañotimoigakempari igisanireku. Yogari gatavageiganaacharira onti noniaigakeri igisanireku.

¹⁸Ario nonkañotagaigakeri nomperaneegi, surariegi ontiri tsinaneegi, nontigankimoigakeri Nosure intimasurentaigakerira iriniakagaigakerira inkamantakoigakenara.

¹⁹Antari enoku inkiteku nogikoneagematero terira oneimagetenkani, aikiro nogikoneagematerotyo nagaveane aka kipatsiku oneanakenkanira iraatsi, aikiro omorekagematanaketyo tsitsi, ontiri aikiro tsitsienka ontinkamisekantavagetanake.

²⁰Antari nontsatagagetanakerora magatiro nosariagetakarira pairani intsivakanake poreatsiri. Yogari kashiri inkiraamentatanake inkañotanakemparo iraatsi. Irorotari pairorira avisake onkoveenkatakera kutagiteri nogikoneatantakemparorira nagaveane.

²¹Kantankicha nogavisaakoigakeri maganiro kantaigakenanerira: Notinkami, gavisaakotena.’

²²“Maikari maika, viroegi iseraereegi, kemisantasanoigena nonkamantaigakempira. Inti nonkamantakotake Jeso Nasarekunirira. Yagaveakagagetakeri Tasorintsi yovetsikagetakerora terira oneimagetenkani, pogoigaketari yogikoneatimoigakempirora iragaveane.

²³Kantankicha igantaga yogotakera Tasorintsi tyara inkantakenkani Jeso, irirotari kantankitsi okyasanokyara iragakagantakenkanira irogakagantakenkanira. Nerotyo pagakagantantaigakaririra pogakagantaigakerira pikantaigakera inkentakoigakerira kañovageigacharira terira iriroegi jorioegi.

²⁴Kantankicha yoganiairi Tasorintsi ganiri ikonoitumatari igamaga, teranika agaveimateri kamagantsi.

²⁵Yogari koveenkari Iravi ikamantakotanakerira Jeso ikanti: ‘Ikantakani itentakena Notinkami, omirinkatari inake nonampinaku kameti ishintsitagakenaniri ganiri tatoita nopinkumati,

²⁶irorotari noshinevagetantanakarira nosureku, aikiro noniakerira nokantakeri: Noshineventavagetakempityo kara, nogotaketari nonkamakerika nontinaanae,

²⁷gatanika povashigantaro nosure ontentakemparora isureegi kamaigankitsirira, teranika pinkoge oveseganakempara novatsa, nantitari pomperane terira inkañovagetumatempa.

²⁸Pogotagakena tyara nonkantakempa nonkantakanira nontimake viroku. Pinkantakani pintentakena pogishineasanotakenara.’

²⁹“Maika, napigematsaegine, agotasanoigake tera ikiiro niakotachane Iravi yashikiiganakairira, ikamaketari pairani impo ikitataagani, ariotari onakeri ikitatantaarira aka.

³⁰Irirori inti kamantantatsirira. Yogari Tasorintsi iniakeri ikantiri: ‘Impogini intimake piyashikitanakerira pegankichanerira igoveenkariegite maganiro iseraereegi inkañotaempira viro. Garatyo namatavitimpi, nantitari Tasorintsi.’

³¹Irorotari yogotasanovagetantakarira Iravi pairani iranianaera Ikogakagakerira Tasorintsi intigankakerira impegakempara Igoveenkariegite iseraereegi, nerotyo ikamantakotantakaririra ikantakera gara ovashigantagani isure ontentakemparora isureegi kamaigankitsirira, ario onkañotake ivatsa irorori gara ovesegumata.