Kàdduy Waare 5:3-15

³Boo digook Yàlla, bu ko yeexe; Daray foontukat neexul, defal li nga dige.

⁴Baña digee gën dige loo deful.

⁵Bu la sa làmmiñ yóbbe bàkkaar, ba ngay lay ndawal Yàlla la, naan lii njuumte la woon. Ana lu jar Yàlla di la meree sa kàddu, bay neenal saw ñaq?

⁶Wax ju bare, caaxaani neen; mook gént yu baree yem. Kon, Yàlla, ragal ko.

⁷Boo gisee ñuy not néew-ji-doole, di jalgati dëgg ak yoon cib gox, bumu la jaaxal; kilifa gi, kilifaam a ko yiir; ñoom it seen kilifaa leen yiir.

⁸Xanaa ndax buur suqal mbey mi, ba ñépp jariñoo suuf si.

⁹Bëggkatu xaalis du doyal xaalis, bëggkatu alal du doyal tono, te loolu it, cóolóoli neen.

¹⁰Bu koom yokkoo, lekk-kat yi yokku. Ana lu muy jariñ boroom koom ga, xanaa di ko duufale bëtam?

¹¹Surga, lekkam néew, bare, mu nelaw, ba fàttey boram; boroom alal regg, du nopplu, du nelaw.

¹²Naqar wu réy laa gis fi kaw suuf: Alal ju boroom dajale ba loru,

¹³mbaa pexeem moy, mu sànkule; ba bu amee doom it, du ko wacce dara.

¹⁴Nga juddoo ci sa ndey loxoy neen, walbatiku dellu na nga dikke woon. Du dara loo ñaqoon ba yóbbaale ko.

¹⁵Dikke ni, delloo ni, loolu it tiis wu réy la. Doñ-doñi, ngelawal neen, ana jariñ la?