ዮሓኒሴ 6

1

2

3

4

5

6

7

8

9

10

11

12

13

14

15

16

17

18

19

20

21

¹ዬካፓ ዬሱሴ ፂብራዶሴ ጌይንታ ጌሊላ ባዞ'' ሱኮ ፒንቄኔ።

²ሚርጌ ዓሳ ዬሱሴ ሃርጊንቴ ዓሶ ፖዒሴሢሮና ፆኦሲ ዎልቆና ማዺንታ ዓኮ ባኮ ማዼም ዛጌሢሮ ዒዛ ጊንፆ ሙኬኔ።

³ዬሱሴ ሌካ ዹኮ'' ኬስካዖ ዒኢካ ዒዛኮ ጊንፆ ሃንታዞንሢና ዎላ'' ዴዔኔ።

⁴ዒማ''ና ዓይሁዶ ዓሶኮ ዑሣ ዓኣዺፆ ቦንቾ ኬላ'' ዑኬኔ።

⁵ዬሱሴ ሚርጌ ዴሬ ዒዛ ባንሢ ሙካሢ ዼ'ግ ጌይ ዛጋዖ፥ ፒልጶሴ ኮራ፦ «ሓያ ቢያ ዓሶም ጊዳንዳ ሙኡዚ'' ዓንካፓ ኑ ሻንቃንዳይ?» ጌዔኔ።

⁶ዬሱሴ ዬያ ጌዔሢ ፒልጶሴ ዎዚ ጋዓቴያ ዋይዛኒ ማዓንዳኣፓዓቴም ዒ ማዻንዳ ባኮ ፔ ቶኦኪና ዔዔራያኬ።

⁷ፒልጶሴያ፦ «ፔቴ'' ፔቴ''ሢም ዻካ'' ዻካ'' ቡንፂሢታዖ ዒንጊንታንዳጉዲ ፔቴ'' ዓሲ ላምዖ ፄኤታ ኬሊ'' ማዼም ዒንጊንታንዳ ሚኢሼጉዴያና ካሣ ዔያቶም ሻንቆናቴያ ጊዳዓኬ» ጌይ ዒዛም ማሄኔ።

⁸ዒዛኮ ጊንፆ ሓንታ ናኣቶ''ይዳፓ ፔቴ''፥ ሲሞኦኔ ጌይንታ ጴፂሮሴኮ ጌርሲ፥ ዒንዲራሴ፦

⁹«ዶንጎ ዔልዓ ካሣና ላምዖ ሞሎና ዓኣ፥ ፔቴ'' ናይስኬይ ሃካ ዓኣኔ፤ ጋዓንቴ ዬንሢ ሃያ ቢያ ዴሮ''ም ዓይጎ ማዓንዳይ?» ጌዔኔ።

¹⁰ዬሱሴ፦ «ዓሶ ዴይሡዋቴ» ዔያቶም ጌዔኔ። ዬኖ ቤዛ ቡጬታሢሮ ዓሳ ዴዔኔ፤ ዒኢካ ዓኣ፥ ዓቲንቆ ዓሶኮ ፓይዳ'' ዶንጎ ሺያ ማዓያኬ።

¹¹ዬካፓ ዬሱሴ ካሦ ዔካዖ ጋላቲ፥ ዴዔ ዓሶም ዒንጋንዳጉዲ ፔኤኮ ጊንፆ ሃንታ ናኣቶ''ም ዒንጌኔ። ዬያጉዲ ሞላሢያ ሃሣ ዒዞ ጎይፆ ዒንጌም ቢያሢ ኮይሳሢጉዴያ ሙዔኔ።

¹²ቢያሢ ሙይ ሚሽኬስካፓ ዬሱሴ ጊንፆ ሃንታዞንሢም፦ «ፔቴ''ታዖ ዲኢኒ ዓቱዋጉዲ ዶንቦ ቡኩሱዋቴ» ጌዔኔ።

¹³ዔያታኣ ዓሳ ሙዒ ሚሽኬ፥ ዶንጎ ካሦ ዶንቦ ቡኩሲ ታጶ ላምዖ ዼኤፒ ሌማቴ ኩንሤኔ።

¹⁴ዓሳ ዬሱሴ ፆኦሲ ዎልቄና ማዺንታ ዓኮ ባኮ ማዼሢ ዛጋዖ፦ «ጎኔና ሓይ፥ ዓጮ'' ሙካንዳኔ ጌይንቴ፥ ፆኦሲ ማሊፆ ኬኤዛሢኬ» ጌዔኔ።

¹⁵ዒማ''ና ዓሳ ዎልቄና ዓርቂ ዒዛ ካኣታሳኒ ማላሢ ዔራዖ ዬሱሴ ዓሶፓ ዱማዺ፥ ፔኤሮ ጌሜሪ ባንሢ ዓኣዼኔ።

¹⁶ሳዓ ዓማ''ዛ ዒዛኮ ጊንፆ ሓንታዞንሢ ጌሊላ ባዞ'' ባንሢ ኬዴ''ኔ፤

¹⁷ዬካፓ ዋኣፆና ፒንቆ ጎንጎ ቶጊ፥ ቂፒርናሆሜ ባንሢ ዓኣዺሢ ዓርቄኔ፤ ዬማና ሳዓ ዓሜ''ንቴ ዬሱሴ ሃጊ ዔያቶ ኮራ ሙኪባኣሴ።

¹⁸ዒማ''ና ዼኤፒ ጉዶ ዢባሬ ዢባርሻሢሮ ባዞ'' ዋኣፃ ዓጊፃኔ።

¹⁹ዬሱሴኮ ጊንፆ ሃንታ ናኣታ'' ዶንጎ ሃሣ ላሆ'' ሺያ ታኣኪሢ ማዓንዳያ ዋኣፆ ጊዶ'' ጎንጎ ዔኪ ዓኣዼስካፓ ዬሱሴ ባዞ'' ዑፆይዳ ቶኪና ሃንቲ ሃንቲ ዔያቶ ባንሢ ሙካሢ ዛጋዖ ዔያታ ዲቃቲ ዒጊጬኔ።

²⁰ዒዚ ጋዓንቴ፦ «ታናኬ! ዒጊጪፖቴ!» ጌዔኔ።

²¹ዔያታ ዎዛዺ፥ ዋኣፆና ፒንቆ ጎንጎ ጋሮ ዒዛ ዔኪ ጌልዛዛ ቤዞማና ዋኣፆና ፒንቆ ጎንጌላ ዔያታ ዓኣዻ ቤዞ ሄሌ''ኔ።

²²ዚሮ ጉቴ''ሎ ባዞ''ኮ ሶ ሱኮ''ይዳ ዓቴ'' ዓሳ ባዞ''ይዳ ፔቴ'' ዋኣፆና ፒንቆ ጎንጊ ዓኣንቴ ዛጌኔ፤ ዬሱሴኮ ጊንፆ ሃንታ ናኣታ'' ፔኤሮ ዴንዴሢና ዬሱሴ ዔያቶና ዎላ'' ዋኣፆና ፒንቆ ጎንጎ ጋሮ ጌሊባኣሢ ዔሬኔ።

²³ጋዓንቴ ሜሌ'' ዋኣሢና ፒንቆ ጎንጊ ፂብራዶሴፓ ዔቂ ዬሱሴ ፆኦሲ ጋላቲ ዴሮ'' ካሦ ሙኡዜ ቤዞ ሙኬኔ።

²⁴ዴራ'' ዬሱሴ ማዔቴያ ዒዛኮ ጊንፆ ሃንታዞንሢ ዒኢካ ባኣሢ ዛጋዖ ዬንሢ ዋኣፆና ፒንቆ ጎንጎንሢ ቶጊ ዬሱሴ ኮዒ፥ ቂፒርናሆሜ ዓኣዼኔ።

²⁵ባዞ''ኮ ሱኮ''ይዳ ዒዛ ዔያታ ዴንቃዖ፦ «ዔርዛሢዮ! ሓይካ ኔ ዎዳኣ ዎዳ ሙኬይ?» ጌዔኔ።

²⁶ዬሱሴ ዔያቶም፦ «ጎኔ ታ ዒንሢም ጋዓኔ፤ ዒንሢ ታና ኮዓሢ ካሦ ሙይ ሚሽኬሢሮ ማዓንዳኣፓዓቴም ፆኦሲ ዎልቆና ማዺንቴ ዓኮ ባኮ ዛጌሢሮቱዋሴ።

²⁷ባይቃ ካሣም ማዺፖቴ፤ ባሼና ዓሲ ናዓሢ ዒንሢም ዒንጋ፥ ናንጊና ናንጊ ሼምፖም ማዓንዳ ካሦም ማዹዋቴ፤ ፆኦሲ፥ ዓዳሢ ፔኤኮ ናዓሢ' ዒዛሮ ማዔሢ ዔርዛ ማላቶ ዒዛይዳ ዓይሤኔ» ጌዔኔ።

²⁸ዓሳኣ፦ «ሂዳዖ ኑኡኒ ፆኦሲ ማዾ'' ማዻኒ ዓይጎ ማዻንዳያ ኑና ኮይሳይ» ጌዔኔ።

²⁹ዬሱሴ፦ «ዒንሢ ማዻንዳጉዲ ፆኦሲ ኮዓ ማዻ'' ዒዚ ዳኬሢ ጉሙርቂ ዔኪሢኬ» ጌይ ዔያቶም ማሄኔ።

³⁰ዔያታ ዒዛ ኮራ፦ «ኑኡኒ ዛጊ ኔና ጉሙርቂ ዔካንዳጉዲ ዓይጎ ፆኦሲ ዎልቄና ማዺንታ ዓኪ ባኣዚ'' ኔ ዻዋንዳይ? ሃሣ ዓይጎ ኔ ማዻንዳይ?

³¹‹ዔያታ ሙዓንዳጉዲ ጫሪንጫፓ ካሣ ዔያቶም ዒንጌ› ጌይንቲ ፃኣፒንቴሢጉዲ ኑኡኮ ዓዶንሢ ዓሲ ናንጉዋ ዳውሎ''ይዳ ማና'' ጌይንታ ካሦ ሙዔኔ» ጌዔኔ።

³²ዒማ''ና ዬሱሴ ዔያቶም፦ «ጎኔ ታ ዒንሢም ጋዓኔ፤ ጫሪንጫፓ ኬዴ'' ካሦ ዒንሢም ዒንጌሢ ሙሴቱዋሴ፤ ጎኑሞ ካሦ ጫሪንጫፓ ዒንሢም ዒንጋሢ ታኣኮ ዓዳሢኬ፤

³³ዒዚ ዒንጋ ካሣ ጫሪንጫፓ ኬዳ''ያ ሓሣ ዓጪም ሼምፖ ዒንጋያኬ» ጋዓዛ፥

³⁴ዓሳ፦ «ጎዳሢዮ! ዬያጉዴ ካሦ ቢያ ዎዴ ኑም ዒንጌ» ጌዔኔ።

³⁵ዬሱሴ ዔያቶም፦ «ሼምፖኮ ካሣ ታናኬ፤ ታ ኮራ ሙካሢ ፔቴ''ታዖ ናይዺንታዓኬ፤ ታና ጉሙርቂ ዔካሢያ ፔቴ''ታዖ ዼኤቢንታዓኬ፤

³⁶ዒንሢ ጋዓንቴ ታና ዛጌያታዖ ጉሙርቂ ዔኪባኣሢሮ ታ ዒንሢም ሃያ ጋዓኔ።

³⁷ዓዴ ታኣም ዒንጋሢ ቢያ ሃንጋ ታ ባንሢ ሙካንዳኔ፤ ሃንጋ ታ ባንሢ ሙካሢያ ሴካ ዙሎ'' ታ ኬሳ''ዓኬ።

³⁸ዓይጎሮ ጌዔቴ ታኣኒ ጫሪንጮይዳፓ ኬዴ''ሢ ታና ዳኬሢኮ ማሊፆ ኩንሣኒ ማዓንዳኣፓዓቴም ታ ማሊፆ ኩንሣኒቱዋሴ።

³⁹ታና ዳኬሢኮ ማሊፃ፦ ዒ ታኣም ዒንጌዞንሢዳፓ ቢያ ፔቴ''ታኣ ባይዙዋዖ ጋፒንፆ ኬሎ''ና ናንጊና ናንጊ ሼምፖ ዴንቃንዳጉዲ ሓይቢፓ ታ ዔያቶ ዔቂሳንዳኔ።

⁴⁰ሂዮ፤ ታ ዓዳሢኮ ማሊፃ ናዓሢ ዛጊ ዒዛ ጉሙርቂ ዔኬሢ ቢያ ናንጊና ናንጊ ሼምፖ ዴንቃንዳጉዲኬ፤ ታኣኒያ ጋፒንፆ ኬሎ''ና ዒዛ ናንጊና ናንጊ ሼምፖ ዴንቃንዳጉዲ ሓይቢፓ ዔቂሳንዳኔ» ጌዔኔ።

⁴¹ዬሱሴ፦ «ጫሪንጮይዳፓ ኬዴ'' ካሣ ታናኬ» ጌዔሢሮ ዓይሁዶ ዓሳ ዒዛ ዑፃ ጉንዱሚሢ ዓርቄኔ።

⁴²ዔያታ ዒዛ፦ «ሓይ ዮሴፔ ናዓሢ፥ ዬሱሴቱዋዓዳ? ዓዶና ዒንዶና ዒዛኮ ኑ ዔራዞንሢቱዋዓዳ? ሂዳዖ ሃሢ ዒዚ ‹ጫሪንካፓ ታ ኬዴ''ኔ› ዎይቲ ጋዓይ?» ጌዔኔ።

⁴³ዬሱሴ ዔያቶም ማሃዖ ታ ዛሎ'' ዎላ'' ጉንዱሚፖቴ፤

⁴⁴ታና ዳኬ፥ ዓዴ ዔኪ ሙኪባኣ ዓሲ ማዔቴ ታ ባንሢ ሙካኒ ዳንዳዓ ዓሲ ዖኦኒያ ባኣሴ፤ ሃንጋ ታ ባንሢ ሙካሢያ ጋፒንፆ ኬሎ''ና ናንጊና ናንጊ ዴንቃንዳጉዲ ሃይቢዳፓ ታ ዔቂሳንዳኔ።

⁴⁵ፆኦሲ ማሊፆ ኬኤዛ ዓሶ ማፃኣፖይዳ፦ «ዓሳ ቢያ ፆኦሲዳፓ ዔሬያ ማዓንዳኔ» ጌይንቲ ፃኣፒንቴኔ፤ ዬያሮ ዓዶይዳፓ ዋይዚ ዔሬሢ ቢያ ሃንጋ ታ ባንሢ ሙካንዳኔ።

⁴⁶ዬይ ያዺ ማዓዛ ዓዶ ዛጌ ዓሲ ዓኣኔ ጌይሢቱዋሴ። ዓዶ ዛጌሢ ፆኦሲ ኮራፓ ሙኬሢ ሌሊኬ።

⁴⁷ጎኔ ታ ዒንሢም ጋዓኔ፤ ታና ጉሙርቂ ዔካሢኮ ናንጊና ናንጊ ዓኣኔ።

⁴⁸ታኣኒ ሼምፖኮ ካሣኬ፤

⁴⁹ዒንሢኮ ዓዶንሢ ዓሲ ናንጉዋ ዳውሎ''ይዳ ማና'' ጌይንታ ካፆ ሙዔኔ፤ ጋዓንቴ ዔያታ ሃይቄኔ፤

⁵⁰ጫሪንጮይዳፓ ኬዴ'' ካሣ ሓያታሢሮ፥ ሓያ ካሦ ሙዓሢ ፔቴ''ታዖ ሃይቃዓኬ።

⁵¹ጫሪንጫፓ ኬዴ''፥ ናንጊና ባይቁዋ ካሣ ታናኬ፤ ሃኖ' ካሦይዳፓ ሙዓሢ ቢያ ናንጊና ናንጋንዳኔ፤ ዓጮ''ም ሼምፖ ማዓንዳጉዲ ታኣኒ ዒንጋ ካሣ ታናኬ ጌዔኔ።

⁵²ዬማና ዓይሁዶ ዓሳ፦ «ሓይ ዓሢ ዒዛ ኑ ሙዓንዳጉዲ ዎዲ'' ኑም ፔና ዒንጋኒ ዳንዳዓይ?» ጌይሢና ዎላ'' ማርሜኔ።

⁵³ዬያሮ ዬሱሴ ዔያቶም፦ «ጎኔ ታ ዒንሢም ጋዓኔ፤ ዓሲ ናዓሢ ዒንሢ ሙዒባኣቴ ሃሣ ሱጉፆዋ ዒንሢ ዒዛኮ ዑሽኪባኣቶ ዒንሢኮ ናንጊ ሼምፓ ባኣሴ።

⁵⁴ታና ሙዓሢና ሱጉፆዋ ታኣኮ ዑሽካሢኮ ቢያ ናንጊና ናንጊ ሼምፓ ዓኣኔ፤ ታኣኒያ ጋፒንፆ ኬሎ''ና ዒዛ ናንጊና ናንጊ ዴንቃንዳጉዲ ሓይቢዳፓ ዔቂሳንዳኔ።

⁵⁵ዓይጎሮ ጌዔቴ ታኣኒ ጎኔ ሙኡዚ''፤ ሱጉፃኣ ታኣኮ ጎኔ ዑሺኬ።

⁵⁶ታና ሙዓሢና ሱጉፆዋ ታኣኮ ዑሽካሢ ቢያ ታኣና ናንጋንዳኔ፤ ታኣኒያ ዒዛና ናንጋንዳኔ።

⁵⁷ናንጊና ባይቁዋ፥ ዓዴ ታና ዳኬም ታኣኒያ ዒዛና ናንጊና ባይቁዋያ ማዒ ናንጋሢጉዲ ታና ሙዓሢያ ቢያ ታኣና ናንጊና ባይቁዋያ ማዒ ናንጋንዳኔ።

⁵⁸ዓካሪ ጫሪንጮይዳፓ ኬዴ'' ካሣ ሓያኬ፤ ዬይያ፦ ዒንሢኮ ዓዶንሢ ሙዔሢ ጉዴያቱዋሴ፤ ዓይጎሮ ጌዔቴ ዬኖ ካሦ ሙዔ ዓሳ ሃይቄኔ፤ ሃኖ ካሦ ሙዓሢ ጋዓንቴ ናንጊና ናንጋንዳኔ» ጌዔኔ።

⁵⁹ዬሱሴ ዬያ ኬኤዜሢ ቂፒርናሆሜይዳ፥ ዓይሁዶ ዓሶኮ ቡኪንቶ ቤዛ ዔርዚቤቃኬ።

⁶⁰ዒዛ ዔሪ፥ ዒዛ ዓሲ ማዔ ዓሶይዳፓ ሚርጌዞንሢ ዬያ ዋይዛዖ፦ «ሓይ ዴኤሢ ጌኤሲኬ፤ ዖኦኒ ጎኔኬ ጌይ ዔካኒ ዳንዳዓንዳይ?» ጌዔኔ።

⁶¹ዔያታ ዬኖ ባኮ ዛሎ'' ጉንዱማሢ ፔ ዓያኖና ዬሱሴ ዔራዖ፦ «ሓይ፥ ዒንሢ ዻቢሳ ባኣዚ''ዳ?

⁶²ዓሲኮ ናዓሢ ዎንዴ ዓኣ ቤዞ ማዒ ኬስካሢ ዒንሢ ዛጋዖ ዎዚ ጋዓኒዳይ?

⁶³ሼምፖ ዒንጋሢ ፆኦሲ ዓያናኬ፤ ዓሲኮ ዎልቄ ጋዓንቴ ዓይጎዋ ማኣዱዋሴ፤ ታኣኒ ዒንሢም ኬኤዛ ቃኣላ'' ሼምፖ ዒንጋ ዓያናኬ፤

⁶⁴ጋዓንቴ ዒንሢ ባኣኮ''ይዳፓ ፔቴ'' ፔቴ'' ዬያ ጉሙርቁዋ ዓሲ ዓኣኔ» ጌዔኔ። ዬሱሴ ዬያ ጌዔሢ ቤርታፓ ዓርቃዖ ዒዛ ጉሙርቁዋኣሢና ዒዛ ዓኣሢ ዒንጋንዳሢ ዖናታቶዋ ዔራሢሮኬ።

⁶⁵ሄሊ''ሳዖ ዬሱሴ፦ «ዓዴ ዓይሤያ ማዒባኣያታቶ ታ ባንሢ ሙካኒ ዳንዳዓይ ባኣሴ ታ ዒንሢም ጌዔሢ ዬያሮኬ» ጌዔኔ።

⁶⁶ዬያይዳፓ ዔቄያና ዒዛ ዔሪ፥ ዒዛ ዓሲ ማዔ ዓሶይዳፓ ሚርጌሢ ጊንሢም ማዔኔ፤ ዬማፓ ዓርቃዖ ዔያታ ዒዛ ጊንፆ ሃንቲፆ ሃሼ''ኔ።

⁶⁷ዬያሮ ዬሱሴ ታጶ ላምዖንሢ ኮራ፦ «ዒንሢያ ሓሺ'' ዓኣዻኒ ኮዓ?» ጌዔኔ።

⁶⁸ዬማና ሲሞኦኔ ጌይንታ ጴፂሮሴ ማሃዖ፦ «ጎዳሢዮ! ኑኡኒ ዖ ባንሢ ዓኣዻንዳይ? ኔኤኮ ናንጊና ናንጊ ሼምፖ ቃኣላ ዓኣኔ።

⁶⁹ኑኡኒ ኔና ጉሙርቂ ዔኬኔ፤ ፆኦሲም ዱማዼያ ዒዛኮ ናዓሢ ኔና ማዔሢያ ኑ ዔሬኔ» ጌዔኔ።

⁷⁰ዬሱሴያ፦ «ታናቱዋይ ዒንሢ፥ ታጶ ላምዖንሢ ዶኦሬሢ? ጋዓንቴ ዒንሢዳፓ ፔቴ''ሢ ፃላሄኬ» ዔያቶም ጌዔኔ።

⁷¹ዬያ ዒ ጌዔሢ ሲሞኦኔ ናኣዚ''፥ ዓስቆሮንቶ ዓጮ'' ዓሢ፥ ዪሁዳ ዛሎ''ሮኬ፤ ዓይጎሮ ጌዔቴ ዪሁዳ ዎዚ ታጶ ላምዖንሢዳፓ ፔቴ''ሢ ማዔቴያ ዬሱሴ ዓኣሢ ዒንጋሢ ዒዛ ማዔሢሮኬ።