Josue 8:12-28

¹²Duen en impehuna ni Josue he 5,000 he menge sundaru te kedsurung dutun te inged. Diyè dan mebpelastar te zapit te edsenlepan dutun te inged, diyà te tengàtengà te Ai wey Betel.

¹³Umbe, iyan heini kebpekepelastar te menge sundaru: is duma he menge sundaru, ne ziyà te zivavà dutun te inged, ne is duma pa, diyà dapit te edsenlepan kayi. Ne zutun he kezukileman midhendutun ensì Josue te suǥud.

¹⁴Ne hein naahà sikandan duen te hadì diyà te Ai, ne migaanggaan sikandin megawas dutun te inged duma te menge etew zin te utew pa meselem, ne midhendiyè dan te lugar he egkesineruwan te Suǥud te Jordan su ebpekidtebek dan te menge Israilihanen. Wazè dan metueni he zuen bes edsurung kandan he ebpuun diyà te egkeiniyuǥan dutun te inged.

¹⁵Ne si Josue wey is menge etew zin ne uvag kun nezaag sikandan, ne mibpelaǥuy zan pehendiyà te sibsivayan.

¹⁶Ne midal-as kandan is langun he menge maama ziyà te Ai taman te neziyuan dan en haazà is inged.

¹⁷Is langun he menge maama ziyà te Ai wey ziyà te Betel midal-as dan is menge Israilihanen, umbe wazà nesamà he ebpekidtebek para kenà maaǥew haazà is inged.

¹⁸Ne migkeǥiyan si Josue te Nengazen te, “Bentanga nu is bangkew nu ziyà te Ai su ibeǥey ku kenikew is Ai.” Umbe mibantang ni Josue is bangkew zin diyà te Ai.

¹⁹Ne segugunà nenggawas sikan is menge etew zin puun te mid-elesan dan. Midseled dan dutun te inged ne migègaanan dan heini binsuli.

²⁰Ne kedlilingey te menge tig-Ai, neehè dan is evel he ebpuun dutun te inged. Wazè dan en egkepeleǥuyan su mid-etuvang en man sikandan duen te menge Israilihanen he edel-asen dan pehendiyà te sibsivayan.

²¹Su hein naahà ni Josue wey te menge etew zin he nekeseled en duen te inged is menge zuma zan ne mibinsulan dan en heini, midlikù sikandan is ed-etaki te menge tig-Ai.

²²Ne mid-etaki zaan is menge Israilihanen he midseled dutun te inged, umbe nelingutan is menge tig-Ai. Mibpenhimetayan eni Josue sikandan is langun; wazà nekepelaǥuy kandan ne wazà neuyag kandan,

²³gawas duen te hadì dan. Mibihag dan heini ne mid-uwit dan diyà te ki Josue.

²⁴Hein naamin dan en te edhimatey is langun he menge tig-Ai he midal-as kandan diyà te menge pemuleey wey ziyà te sibsivayan, midlikuan dan sikan is inged ne mibpenhimetayan dan is langun he nesamà dutun.

²⁵Dutun he andew mibpatey is langun he meǥinged diyà te Ai–12,000 langun he menge maama wey menge vahi.

²⁶Wazà engkezi ni Josue is kebantang duen te vangkew zin diyà te Ai taman te naamin mebpatey is langun he meǥinged dutun.

²⁷Mibpenguwa te menge Israilihanen is menge uyaǥen wey menge azen dutun te inged, sumalà is migkaǥi te Nengazen diyà te ki Josue.

²⁸Ne kegkepasad dutun, mibpevinsulan ni Josue is tivuuk he Ai ne wazè en heini meuman mevangun. Ne taman en guntaan wazè en meǥinǥed kayi.