Joshua 8:12-28

¹²Me fek Joshua nap’an 5,000 e pumo’on nge ta’rad ni ngar mithgad u ba’ ni ngal ko fare binaw, u thilin yu Ai ngu Bethel.

¹³Ma aram e fapi salthaw e ra yarmiyedyad ko mael ni tin yo’or e salthaw e rpired ko lel’och ko fare binaw ma tin kabay e ra pired ko ngal. Me par Joshua e re nep’ nem u loway.

¹⁴Ma nap’an ni guy e pilung nu Ai e salthaw rok Joshua, me burtel. Ni aram e ir nge salthaw rok ni gubin e ranod i yan ko Loway nu Jordan ni ngar chamgad ngak yu Israel ni ku aram gil’ e yay ni som’on, ma de yib ngan’ ni bay ni cham ngak u keru’.

¹⁵Joshua nge salthaw rok e yad be dake sulsul nga tomur, mirmilgad i yan nga dap’eted.

¹⁶Ma gubin e pumo’on ko re binaw nem nni piningrad nga ta’bang ni ngar lekedrad, ma nap’an e yad be lol’oeged Joshua i yan, ma aram e yad be palog ko fare binaw nga orel.

¹⁷Gubin e pumo’on nu Ai e ra leked piyu Israel, ma fare binaw e ra digeyed ni kab mab e garog riy, ndariy be’ ni par ni nge matnagiy.

¹⁸Me ga’ar SOMOL ngak Joshua, “Mu pulweg e sarey rom nga Ai; ya nggu pi’ nga pa’am.” Me rin’ Joshua nrogon ni kanog ngak,

¹⁹ma, t’afnepug pa’ ngalang, ma fapi pumo’on ni yad be mith e ra sak’iygad ni machreg, mar milgad nga langgin fare binaw ngar koled. Mar gur nigedyad ngar urfiyed fare binaw.

²⁰Ma nap’an ni sap fapi pumo’on nu Ai nga tomur, miyad guy e ath ko nifiy nike yan ngalang. Ma dakuriy kanowo’en miyad thay, ya fa picha’ nu Israel ni fa’an kar milgad i yan nga dap’eted e kar sulod i yib ni ngar chamgad ngorad.

²¹Nap’an e guy Joshua nge fapi salthaw rok fa picha’ ni kar koled fare binaw kar yip’ed e nifiy ngay, miyad cheal ngar tababgad i li’ e pumo’on nu Ai.

²²Tin ba’aram yu Israel ni yad bay u langgin fare binaw e go’ rabad nga pe’ning ngar uned ngorad ko mael. Ma aram e pir’eg fapi pumo’on nu Ai nike cholongbiyrad piyu Israel, min li’rad ngarm’ad ni yad gubin.

²³Dariy bagyad ni yag ni thay, ma dariy bagyad ni par nib fos u fithik’ e mael kemus ni go’ pilung nu Ai. Min kol ngan fek i yan ngak Joshua.

²⁴Ke li’ yu Israel gubin e to’ogor rorad u d’apeted ko fa gin lol’ograd i yan ngay. Me’ere kur chalgad ngar sulod nga Ai ngar li’ed gubin e girdi’ ni bay u rom.

²⁵Gubin e pumo’on nge ppin nni li’ e rofen nem e 12,000, ni aram urngin e girdi’ nu Ai.

²⁶I Joshua e yigi tay pa’ ni bay e sarey riy nike pulweg nga Ai, nge taw nga nap’an ni kan thang owchen urngin e girdi’ nma par u Ai.

²⁷Piyu Israel e ra ted e gamanman nge tin nra feked u tan e mael u langgin fare binaw nge milfan ngorad ni bod ni yog SOMOL ngak Joshua.

²⁸I Joshua e urfiy yu Ai nge pag nike mgothgoth. Ni ku aram rogon ni bay e daba’.