Josue 18:5-16

⁵Kinahanglan he ebehinen haazà is tanà te pitu he vahin. Kenà idragkes is tanà te tribu ni Juda ziyà te zivavà wey is tanà te menge tribu ni Jose ziyà te zizaya.

⁶Isurat niw is menge zulunà duen te pitu he vahin he tanà, ne uwita niw kayi te kediey, su edripahan ku heini ziyà te etuvangan te Nengazen he Megbevayè tew.

⁷Piru kenè mulà ebehinan te tanà is menge Levihanen su iyan kandan he vahin is kebpenilbi te Nengazen pinaaǥi te kegkememumuhat dan. Is menge tribu ni Gad, ni Reuben, wey ketengà he tribu ni Manase nekezawat en te kandan he vahin diyà te tanà he zapit te edsilaan te Jordan, he imbeǥey kandan ni Moises te suluǥuen te Nengazen.”

⁸Ne hein egenat en sikan is nepilì he menge etew, migkaǥi si Josue ziyà te kandan te, “Susiya niw is tanà ne vaal kew te mapa zin. Ne likù kew zini te kediey kayi te Shilo, su edripahan ku heini ziyà te etuvangan te Nengazen ke hentei ki tribu is egkevehinan te kada vahin dutun te tanà.”

⁹Umbe, migenat haazà is menge etew te kedsusi zuen te tanà. Ne mibaal zan te mapa kayi he ebpaahà he pitu he vahin haazà is tanà. Ne inlista zan is dezekelà wey malù dezekelà he menge inged he nesakup te kada senge vahin. Ne kegkepasad dutun midlikù dan diyà te ki Josue ziyà te Shilo.

¹⁰Ne pinaaǥi te kedripa mibeǥayan ni Josue te kandan he vahin is menge tribu te Israel he wazè pa kandan he tanà.

¹¹Is nehuna he neveǥayan pinaaǥi te kedripaha zuen te tanà iyan is tribu ni Benjamin. Is kandan he vahin nekepetug-elang te vahin te tribu ni Juda wey te menge tribu ni Jose.

¹²Is dulunà kayi ziyà te zizaya ne puun te Wahig he Jordan, ne mibpehendiyè te zizaya he vahin te Jerico, pehendiyà en te menge vuvungan diyà te edsenlepan taman te sibsivayan te Bet Aven.

¹³Ne puun dutun ebpehendiyà heini te zivavà he kelendiǥan te Luz (he iyan is Betel), ne mibpetupang heini ziyà te Atarot Adar, diyà te vuntud he ziyà te zivavà he vahin te alug he Bet Horon.

¹⁴Puun dutun, ebpehendiyà heini te zapit te edsenlepan te vuntud he ebpekesinaru te Bet Horon diyà te zivavà. Midsangkù heini ziyà te Kiriat Baal (he iyan is Kiriat Jearim), he sevaha he zekelà he inged te tribu ni Juda. Iyan heini zulunà diyà te edsenlepan.

¹⁵Is dulunà diyà te zivavà ne puun te zulunà te Kiriat Jearim. Puun dutun ebpehendiyà heini te edsenlepan diyà te menge teheb diyà te Neftoa.

¹⁶Mibpetupang heini ziyà te lugtenaan te vuntud he zehipag te Suǥud-suǥud he Ben Hinom he ziyà te zizaya he vahin te Suǥud he Refaim. Midlaus heini ziyà te Suǥud-suǥud he Ben Hinom, nekeikul te zivavà he kelendiǥan te inged te menge Jebusihanen, pelaus diyà te En Rogel.