Joshua 18:5-16

⁵Ma fare nam e bay ni f’oth u dakenrad ni medlip yang; ganong rok Judah e bayi par u lane gin tafen e binaw u lane yimuch, ma ganong rok Josef e bayi par u lane gin ni tafen e binaw u lane lel’och.

⁶Mu yoloyed rogon ya’an e mathil ko medlip yang i binaw ney ngam feked i yib ngog. Ma aram e bay gu girengiy e pow nggu fith’ laniyan’ SOMOL ni Got rodad ni fan ngomed.

⁷Machane ganong rok Levi e dariy e f’oth rorad ko binaw u lan fare nam ni bod gimed, ni bochan e f’oth rorad e pigpig ni ngu’ur ted ni yad e pi prist rok SOMOL. Ma gimed manang faram ni pi ganong rok Gad, nge Ruben, nge ba’ ni ngek e Manasseh e kan mu’ i pi’ taferad binaw u ba’ ni ngek e Jordan, ni Moses ni tapigpig rok SOMOL e pi’ ngorad.”

⁸Me yan fapi pumo’on ni aram e ngar yaliyed ngar yoloyed ya’an e re nam nem u but’ u tomuren nike yog Joshua ngorad e tin ni ngar rin’ed ni ga’ar: “Mmarod u daken e re nam ney ni ga’ngin ngam yoloyed rogon ya’an u but’, mi gimed sul ngog. Ma aram u roy u Shiloh e bay gu fith lanyan’ SOMOL riy ni fan ngomed ko pow ni ngan girengiy.”

⁹Ma aram me yan fapi pumo’on u daken fare nam ni ga’ngin ngar yoloyed nga but’ rogon ni kar ted e f’oth ko fare nam ke yan ni aw ni medlip yang u but’, miyad yoloy nga but’ fithingan gubin e pi yuchi binaw ni bay riy. Ma aram miyad sul ngak Joshua ngalan fa gin ni yad be par riy u Shiloh.

¹⁰I Joshua e girengiy e pow ni fan ngorad u lan yu Shiloh u p’eowchen SOMOL, ma tin kabay e ganong nu Israel e ra reb me pi’ bang e binaw u lan fare nam ngak.

¹¹Fa gi binaw nib milfan ko pi tabnaw ko ganong rok Benjamin e ir e nni duwgiliy nsom’on. Re gi binaw rorad nem e bay u thilin fa gal ganong rok Judah nge Josef.

¹²Mathil rorad ko lel’och e tabab ko Jordan me yan nga talang ko fare gi tafarthag ni bay nga lel’och u Jeriko, me yan u rom ko ngal nge yan u daken fare binaw ni go’ burey nge yan i mada’ nga daken e ted u Bethaven.

¹³Me yan fare mathil u rom u thartharen e ba’ ni yimuch u Luz (ni ku yima yog yu Bethel ngay), me log nga Ataroth Addar nga daken fare burey ni bay ko yimuch u Lower Beth Horon.

¹⁴Me sor fare mathil u rom nga yug bang, me cheal u rom ko yimuch u ba’ ni ngal ko re burey ney nge mada’ nga Kiriath Baal (ara Kiriath Jearim), ntafen e ganong rok Judah. Irera’ e mathil ko ngal.

¹⁵Ma mathil ko yimuch e tabab ko gin ni mus yu Kiriath Jearim riy me yan u rom ko fapi Alublub nu Neftoah.

¹⁶Ma aram me yan e mathil u rom nga pe’ning nga enggin fare burey ni yira changar riy min guy fare Loway ni Hinnom, ni bay u ley ni lel’och ko fare Loway ni Refaim. Ma aram me sor ko yimuch nge th’ab e Loway ni Hinnom, ko yimuch u p’ebgul e burey ko pi Jebus, me yan riy nga Enrogel.