Josua 18:5-16

⁵Repwe ineti ewe fanü lon fisu kinikin. Iwe, chon ewe ainangen Juta repwe chök nom lon fanüer me ör, nge chon ewe ainangen Josef repwe nom lon fanüer me efeng.

⁶Nge ämi oupwe alapalapa ewe fanü lon fisu kinikin o uwato ewe alapalap rei ikei. Mürin üpwe ütti üttiemi me fän mesen ewe Samol mi Lapalap ach we Kot.

⁷Nge esap wor kinikinin fanüen chon ewe ainangen Lefi me leimi, pun ewe wisen souasor ngeni ewe Samol mi Lapalap iei wiser. Nge chon ekewe ainangen Kat me Rupen pwal esopun ewe ainangen Manasa ra fen angei fanüer me peliötiuen ewe chanpupu Jortan, Moses nöün ewe Samol mi Lapalap chon angang a ngeniir.”

⁸Iwe, lupwen ekewe mwän ra popuetä ar sai pwe repwe makei tichikin lapalapen ewe fanü, Josua a öüröüreer o üreniir, “Oupwe fetalfeil lon ewe fanü o makei tichikin lapalapan. Mürin oupwe liwinto rei. Iwe, üpwe ütti üttiemi me fän mesen ewe Samol mi Lapalap ikei lon Silo.”

⁹Iei mine ekewe mwän ra feila o fetalfeil lon ewe fanü. Ra makeelong lon eu puk lapalapen ewe fanü pwal eu me eu kewe telinimw lon ekewe fisu kinikin. Mürin ra liwinto ren Josua lon Silo ewe ia ra nom ie.

¹⁰Nge Josua a ütti üttier fanü me fän mesen ewe Samol mi Lapalap lon Silo. Mürin a aineti ewe fanü o ngeni eu me eu kewe lusun ainangen Israel inetin.

¹¹Iwe, aeuin kinikinin ewe fanü a ainet ngeni chon ewe ainangen Peniamin a aükük ngeni ükükün ar kewe famili. Kinikinin fanüer a nom lefilen fanüen chon ekewe ainangen Juta me Josef.

¹²Iwe, kiännin fanüer me peliefeng a popuetä ren ewe chanpupu Jortan. Mürin a feitä won ewe chukuchukutä peliefengin Jeriko, a pwal feitä o pwerela ngeni lotou won ewe fanü mi chukuchukutä o müchütiu lon ewe fanüapön Pet-awen.

¹³Nge seni ikenan ewe kiä a pwerela ngeni ör wenewen ngeni Lus tori won chukuchukutän Lus, iei Petel. Mürin, ewe kiä a feitiu won ewe chuk mi nom peliörün Pet-horon-fan tori Atarot-atar.

¹⁴Nge lepelian me lotou ewe kiä a pwelitiu ngeni ör seni ewe chuk mi nom ör sasape ngeni Pet-horon, nge a müchütiu me Kiriat-paal, iei Kiriat-jearim, eu telinimwen chon ewe ainangen Juta. Iei kiännin me pelilotou.

¹⁵Iwe, kiännin me peliör a popueta me lesopun Kiriat-jearim mi nom lotou o pwerela tori ekewe koluk mi puächetä me lon Neftoa.

¹⁶Mürin, ewe kiä a feitiu fäsonun ewe chuk mi sapechöchö ngeni ewe lemolun Hinnom mi nom peliefengin müchütiuen ewe lemolun Refaim. A pwal fitätiu ewe lemolun Hinnom peliörün ekewe chukun chon Jepus o feitiu tori En-rokel.