Jeremías 51:36-61

³⁶A-ulale, Bab-Jehová weyob soged: “Israel-dulemar, be-ibmar-imaksadgi an bemar-bendakoed, ani an bemarga buged-mai imakoed. Ani an Babilonia-demar odinguoed, e-dii-sailagan-ariomamaid ani an dinnaa saoed.

³⁷Babilonia-neggwebur akwamar-dunnumake-bukwadga gudoed, achu-sapur-uaya-gannagan-negga gudoed. Neg-dobed-dummadga gudoed, egi dodolegega gudoed. Nega-dulesulidga, gudoed.

³⁸Babilonia-dulemar bulale achumigur-uurmakebayobi uurmakdemaloed, achumigur-bipiganabayobi akigindemaloed.”

³⁹Bab-Jehová soged: “Neg-diopisur-itoarmalale, ani an ega gobed dakoed. Wergumalaga an omumsaoed, suitii gabemai-saegala, geg atake an imakoed.

⁴⁰Igi sibad-wawaad-senigana e-oburgwileged-negse seleddae, debayobi, an sedoed. Igi sibad-machergana, degi, sibad-wawaad-machergana, e-oburgwileged-negse seleddae, debayobi an sedoed.

⁴¹”¡Be dakena! Babilonia-neggwebur napneg-naidgi-nuga-nika-siidi, igi bergus-sii be dake. Igi dule-baiganse sabsuli-sules be dake. Be dake, igi Babilonia-yala, dulemar-baiganga dobed-yalaga-gude be dake.

⁴²E-isdarmaladi Babiloniaʼgi demaryobi mulusad. Demar-weleganyobi egi arwisad.

⁴³Babilonia-neggweburmar bela olloo nagusad. Nega-dinnaregedyobi-dakle nagusad, nega-dulesulidyob-dakle nagusad. Dulemar bar egi bukwasulid, a-yalagi dulemar gwen bar iirmakbuksulid.

⁴⁴Babiloniaʼgine an bab-dummad-Bel sabsuli-odurdakoed. Ibmar-dosadi gannar agega an imakoed. Dulemar-baigan bar ese dagosurmalad, degine, Babilonia-galu-matusulid-akwabiid bela ayaroed.

⁴⁵”¡Mimmigan, Babiloniaʼgi be ainimar! Na be wala-walagwengi Bab-Dummad-urwedgi be san bendakmalo.

⁴⁶Neggweburgine, dulemar-sunmakedgi, melle dobgumalo, melle gegegwa be itomalo. Birga-ilibali gayaburbamar baid-baid ainimai guoed. Babilonia-yalagi galagwensuli-neg-gued-gaya ainimai guoed, Dummagan-negsemaladi na muchub-muchub yolenanai gumaloed.

⁴⁷Babilonia-bab-dummagan-obelogoed-ibagan bato omosad. Bela Babilonia-yala bingegunai guoed, muimarbi yala-enosa naguoed.”

⁴⁸Bab-Jehová soged: “Babilonia-galakuoedga, nibnega, napnega, degi, bela egi ibmarmar-bukwadi, weligwaledba binnasuli namakmaloed. Ar e-isdarmaladi dad-nakwed-argan-sapiledsiki Babiloniaʼgi danimaloed.

⁴⁹”Babilonia-dulemala, Israel-dulemar-oburgwisadbali, oburgwilemarmogargebed. Degine, bukidar dulemar-baigan-oburgwisbalidbali, Babilonia-dulemar oburgwilemarmogargebed.

⁵⁰Israel-dulemar, be es-suidgi-burgwissurmaladi, gwae be wakitemala. Ar bemar dikasuli be bukwamalale, Bab-Jehová-nug be odummomalo. Melle Jerusalén-neggwebur be iemarbalo.”

⁵¹Bemar sogmalad: “Anmargi dulemar isdar-sunmake-itogedba anmar bingedar itoye. Anmar-mesagwar-imaklegedi anmar-wagar-gisii imakye. Ar dule-bamaladi bese-goled-negse dogsamalad-ulale, anmar bingedar itoye.”

⁵²A-ulale, Bab-Jehová soged: “Ibagan danikid, a-ibagi, an Babilonia-bab-dummagan obelogoed. Babilonia-yalagine dulemar-naibigumaloedi bukidara akigitemaloed.”

⁵³Bab-Jehová soged: “Ar Babilonia amba e-galu-matusulid-akwabiidi nibnegse imakye-sogele, degi, nibali e-bubawarmar ogwisye-sogele, amba an e-obelogega e-isdarmaladi an egi barmidoed.

⁵⁴”Babilonia-yala-akale, binnasuli e-dulemar-sabsurgunaidba-bobukwadi magar itoleged.

⁵⁵Bab-Jehová Babilonia-yala bela obelonaid, dulemar-oimakbukwad bela obelonaid. Babilonia-e-isdarmaladi demar-mullugan-uurmakmaiyobi, e-dolewar binnasuli uurmakbukwad.

⁵⁶Babilonia-e-isdarmaladi Babilonia-yala-obelogega, egi gwichigudanimalad. Babilonia-sordamar-bulegan bela galemaloed, e-sigumala bela ei bibisgelegoed. Ar Bab-Dummad-Jehová dulemar na e-odurdaklemaloedbali ega ibmar imaked.”

⁵⁷Ani an Rey-guedi, Bab-Jehová-Bela-Gangued-Nikadi weyob soged: “Babilonia-e-dummagan, degi, e-binsaed-ibegan, an omumsaoed. Ega-negsemamaid, an omumsaoed. E-sordamar-dummagan, degi, e-sorda-bila-onomaladi an omumsabaloed. We-dulemar degisadegu gabidmaloed, bali gannale atakosurmalad.”

⁵⁸Bab-Jehová-Bela-Gangued-Nikadi weyob soged: “Babilonia-galu-matusulid-akwabiid e-mata-dummad, bela nagase babatoed. Degi, e-yawagak-matusurmaladi ogumaklegoed. Dulemar binsarsunna alamaksamalad, degine, binsarsunna gar-itosmalad, unnila sooga alamaksamalad.”

⁵⁹Weyobi Bab-Dummad-gayaburba-barsoged-Jeremías, Nerías-machi-Seraíasʼga igar uksad. Deunni, Sedequías birgabakegus-negsemaidgined. Seraías, Judá-rey-Sedequíasʼbo Babiloniaʼse nadmalad. Agine Seraías dulemar-idumai gusad. Seraíasʼde Maasías-wagwad.

⁶⁰Jeremías bela Babiloniaʼgi boni-dummagan-danikoedi garda-suid-bipirmakaledgi narmaksagusad. Wegisundo, Babilonia-yalagi ibmarmar-gumaloedi bela narmaklesad.

⁶¹Jeremías, Seraíasʼga weyob sogsad: “Babiloniaʼse be modapile, bela we-gardagi ibmarmar-sognaid be absogo.