Iliga꞉felo꞉ 24:13-20

¹³A꞉la꞉fo꞉ko꞉lo꞉ ililo꞉ nemo꞉lo꞉ diga꞉lilakilo꞉ mo꞉walilab we, nilo꞉ dimido꞉wo꞉ we hendele a꞉la꞉bo꞉, iliyo꞉ mo꞉fanda walama꞉ib.

¹⁴Ko꞉sega nelo꞉ golo꞉wo꞉ imilig nowo꞉ gemo꞉wo꞉ fanda sa꞉ma꞉nigo꞉l. Kalu i wema꞉yo꞉ Alana꞉ Mando꞉ kudu ha꞉nab a꞉no꞉ hala kudu ha꞉nab a꞉la꞉sio꞉. A꞉la꞉fo꞉ ko꞉sega, niyo꞉ nili ma꞉muwa꞉ Gode a꞉no꞉ ko꞉lo꞉ wabudakiyo꞉, Alana꞉ man a꞉no꞉ kuduha꞉na꞉sen. Mosesa꞉ ele sa꞉sa꞉lo꞉ o꞉lia꞉ dinali sa꞉lan kaluwa꞉lo꞉ to sa꞉sa꞉lifa꞉ a꞉no꞉ tambo ne tilidabu. Yuwa꞉ man a꞉no꞉ ko꞉lo꞉ kudu ane.

¹⁵A꞉la꞉ta꞉ga꞉ digalo꞉ kalu sowo꞉wo꞉lo꞉, mogago꞉lo꞉ dimidan kalu sowo꞉wo꞉lo꞉ Godeya꞉lo꞉ a꞉ma꞉la꞉ a꞉dasi alifa꞉ib a꞉no꞉ ne hendele tilida꞉daki, yasilo꞉l. Tilida꞉da꞉sa꞉ga꞉lo꞉ nilo꞉ yasilo꞉l aumb, kalu i wema꞉lo꞉ yasilab.

¹⁶A꞉la꞉fo꞉ko꞉lo꞉ niyo꞉ mo꞉keleasuluma꞉kiyo꞉, Gode o꞉lia꞉ kaluka꞉isale o꞉lia꞉ma꞉ siwa꞉l amio꞉, ho꞉leno꞉ tambo niyo꞉ digalo꞉ man dimida꞉sen.

¹⁷Dona nolo꞉ ta꞉ta꞉sa꞉ga꞉yo꞉, ne a꞉ma꞉la꞉ Ya꞉lusalem ya꞉ga꞉, niasi kaluka꞉isale usamilo꞉ wa꞉feyo꞉ kalu o꞉mo꞉wo꞉ moleyo꞉ boba dimiaki, Godemo꞉wo꞉ boba so꞉mia꞉ni mio꞉.

¹⁸Niyo꞉ Godeya꞉ siwa꞉la malilo꞉ dowan man a꞉no꞉ kudu ane ko꞉lo꞉, Godeya꞉ Malilo꞉ a us a꞉na ne ti ane amio꞉, kalu i wema꞉yo꞉ ne a꞉na ba꞉ba꞉. Ko꞉sega kaluka꞉isaleyo꞉ nelo꞉amio꞉ mo꞉kegeo꞉ a꞉la꞉ta꞉ga꞉ kaluka꞉isale egelebo꞉ gadima꞉kilo꞉ digini mian man a꞉no꞉ aundo꞉ma elen.

¹⁹Ho꞉len a꞉namio꞉, Yu kalu nolo꞉ Asia hen a꞉la꞉ta꞉ga꞉ mio꞉ a꞉no꞉ a꞉na sen ko꞉lo꞉ i a꞉ma꞉yo꞉ nemo꞉wo꞉ diga꞉li sa꞉lakilo꞉ mo꞉walilima꞉no꞉wo꞉ dowo꞉lalega, kalu i a꞉no꞉ gi siwa꞉la kagafo꞉liki ne a꞉na mo꞉walilima꞉no꞉ o꞉li.

²⁰Kalu i a꞉no꞉ wilo꞉malalega, kalu o꞉go꞉do꞉ sab wema꞉yo꞉, kanisol inido꞉wo꞉ Ya꞉lusalem kegeakilo꞉ ne mo꞉walilo꞉ a꞉namio꞉, nilo꞉ hala dimido꞉ ba꞉ba꞉ a꞉no꞉ gemo꞉wo꞉ sama꞉ki, giyo꞉ imo꞉wo꞉ dabu bo꞉ba.