1Ina hereva na Iehova ena amo Ieremia enai e kau:
2Iehova ena dubu ikoukouna ai ba gini, unuseni ai hereva ba gwauraia, baoto, Iehova ena hereva ba kamonai, umui Iuda taumui, Iehova itomadiho-henina totona ini ikoukou lalodiai o raka vareaimu taumui iboumui ai.
3Iehova Sabaota, Israel Diravana, na ini e gwau tomamu: Emui dala bona emui kara ba hamaoromaorodia, bena ina gabu ai do baina hanohomui.
4Ini hedibagani herevadia basio abidadama herlidia: “Ina na Iehova ena dubu, Iehova ena dubu, Iehova ena dubu”.
5Badina be emui dala bona emui kara boma hamaoromaorodia vaitani, bona boma hahemaoro heheni mai maoromaoromui ida,
6idau tauna eiava ihareha eiava vabu basioma hahisihisidia, eiava asi ena kerere tauna rarana basioma hahebubua irla gabu ai, bona dirava idaudia igavadia ai sibomui basioma hahehisi,
7bena lau ese ina gabu ai do baina hanohomui, nega gunadia ai senemui na henidia vaitani tanona lalonai.
8A itaia, umui ese hedibaḡani herevadia o abidadama henidiamu na asi anina.
9Ba henao, ba roroma, ba heuda hanai, ba gwauhamata koikoi, muramura mai bonana ba gabua Baal enai, bona asio dibadia guna diravadia ba ḡavadia;
10bena baoma, lau vairagu ai ba gini, ina lau ladagu e henemailaia dubuna lalonai, baoto “Ai na vada a roho mauri”; bena unu kara dika-rohorohodia ma ba kara lou a?
11Ina lau ladagu e henemailaia dubuna na emui ita-ita ai dadidadi taudia edia kohua ai vada ela a? Iehova na e tomu, Lau sibogu ese vada na itaia.
12Egu gabu Silo ai, lau ladagu na hamialaia guna gabuna, baola; ba itaia, ede na karaia toma, egu bese Israel taudia edia kara dika daidiai.
13Iehova ma e tomu Harihari, unu ḡau iboudiai vada o karadia, bona igwau-henimui di asina hesiku lo asio kamonai, bona na boirimui to asio haere, dainai
14lau ese ina dubu, lau ladagu vada e henemailaia bona o abidadama heniamu dubuna, bona ina gabu, umui bona senemui na henimui gabuna, baina kara henidia, Silo na kara henia heḡereḡerena.
15Bona lau vairagu amo baina negemui daure, varavaramui, Efraim garana, iboudiai na negedia daure heḡereḡerena.
16Oi na ina bese taudia daidiai basio noinoi, eiava idia daidiai basio taitai eiava basio ḡuriḡuri eiava egu ai heraua basio tahua, badina be asina kamonai henimumu.
17Iuda hanuadia ai bona Ierusalem ariaradia ai e karamu karadia na so itamu a?
18Memero bona kekeni ese au rakuraku e haboumu, tamadia ese lahi e ha-aramu, bona hahine ese flaoa e kuiamu, guba pavapavana hahinena ena ataga bae gabu totona; bona inuinu bouboudia e bubudiamu, dirava idaudia ediai. Unu amo e habadugumu.
19Iehova na e tomu, Lau e haraivagumu eiava sibodia e haheraivamu bena hemarai na latadiai e kaumu a?
20Taunabunai Ḡaubada Iehova na ini e gwau tomamu: A itaia, egu badu, egu badu ḡaraḡara, na ina gabu latanai baina bubua dobi, taunimanima bona ubu-ubu ḡaudia, bona imea audia bona uma anidia danu, latadiai; ia na baine ara, basine bodo.
21Iehova Sabaota, Israel Diravana, na ini e gwau tomamu: Emui kara helaḡadia ba kara negadia ai, emui ḡole-oho boubou ḡaudia danu ba hahelaḡadia, bena vamudia bavani.
22Badina be Aigupto amo na hakaudia lasi dinana amo ema, lau ese senemui asina hereva henidia, bona asina haḡanidia idia ese ḡole-oho bouboudia bona kara helaḡadia bae kara.
23To ina haheḡani na henidia, nato, Lau gadogu ba kamonai, bena lau na emui Dirava ai bainala, bona umui na egu bese ai baola; bona na haḡanilaimuimu dalana idoinai lalonai ba raka, bena ba namo.
24A idia na asie kamonaiva, taiadia asie hakalava, to sibodia edia hahealo ai bona sibodia edia lalo-hadai dikadia bona aukadia lalodiai e rakava, e raka duava, asie raka vairava.
25Senemui na Aigupto tanona amo e raka lasi dinana amo ema bona ina dina, lau ese peroveta taudia, egu hesiai taudia, iboudiai na dina ta ta ai idia dekedia na siaidiava, asina hesiku;
26ḡau tamona, idia na asie kamonai heniguva bona taiadia asie hakalava, a aiodia e ha-aukadiava. Edia kara dika ese tamadia edia kara dika e hereadiava.
27Taunabunai, ini hereva iboudiai na ba hamaorolaidia, to basie kamonai henimu. Ba boi henidia, to basie haere henimu.
28Bena ba hamaorodia, baoto, Ina na Iehova, edia Dirava, gadona asie kamonai bona mata-hakani asie abia dae besena. Hereva momokani vada e boio vaitani, bona idia bibinadia amo vada e ore.
29Huimu ba utu nege, ororo nemuka-nemukadia ai ba rohe ahu; badina be Iehova ese e badu heniamu uruna na vada e dadaraia bona vada e rakatania.
30Iehova na e tomu: Badina be Iuda taudia na lau vairagu ai vada e kara dika; edia ḡau dika-rohorohodia na lau ladagu vada e henemailaia dubuna lalonai vada e atodia, unu amo vada e hamiroa.
31Tofete ai, Hinom natuna ena koura ai, idia ese atai gabuna helaḡana ta vada e hadaia, natudia mamaruanedia bona hahinedia na lahi ai bae haḡoledia oho helaoreana; lau ese unu asina haḡanidia toma, bona unu asina laloa toma.
32Taunabunai, Iehova na e tomu, negana vada be maimu “Tofete” bona “Hinom natuna ena koura” basie gwauraia, a ladana bae hatoa “Ala-ala Kourana”; mase taudia na Tofete ai bae guridia, badina be idau gabu ai na asi gabudia.
33Bena ina bese taudia tau-anidia na atai manudia bona uda boromadia ese bae anidia; ta ese basine luludia oho.
34Bena Iuda hanuadia bona Ierusalem ariaradia lalodiai lau ese kiri bona moale reḡedia baina hadokodia, bona headava matamata tauna bona hahinena gadodia danu; badina be tano na baine mia ḡaḡae.
