Hacutjin Casahmi Apóstol 9:6-40

⁶Tisatjinhngue ne, tisihin nandya Damasco, hane ngajan sacú ri cjua mé xi meje rë xi nihñi. ―‍Cuatjin cachja cjua jan.

⁷Ngajan xi xuta xi cjuicojo Saulo jan ne, caxinchacun lihmi ni me ngajan. Cahndë me cjua jan, peru tsajin yo xi cavëë me.

⁸Hya xi camá ne, cavisatjenhnga Saulo, hane xi cavuxaha me tuxcun me ne, matsijin camahani rë me. Sehe ngajan xi cavaha xuta jan tsja me ne, quijicojo me me hisca nandya Damasco.

⁹Jyan nixtin cavéjña me jan xi matsijin rë me, hacuaha tsajin mé cajinë me, tsajin mé cahvi me.

¹⁰Hane ngajan Damasco ne, ngajan tacun ngu xuta ladu rë Jesús xi hmí rë Ananías. Ha tu ñahñu cavëë me Nai naja ne, cachja cojo rë me cuitjin: ―‍¿Há nechin, Ananías? ―‍Cuatjin cachja Nai naja. Ngajan xi Ananías ne, cuitjin cafayangui me: ―‍Juun, tejña, Nai naha. ―‍Cuatjin cafayangui me.

¹¹Ngajan xi Nai naja ne, cuitjin cachja me cojo Ananías: ―‍Tihin ndiya xi hmí rë Taha Quixi. Hane ndava cha Judas ne, ngajan chjinenguise ngu cha Tarso xi hmí rë Saulo. Cha vëhë ne, tisahmi cha oración rë cha,

¹²hane sacuaha xi ngajñi nijñá rë cha ne, cavëë cha ngu xihin xi hmí rë Ananías xi cavisehen hiscan tacun cha, hane cavisanetsja rë cha xi cuma tsejen nga rë cha. ―‍Cuatjin cachja Nai naja.

¹³Ngajan xi Ananías ne, cuitjin cafayangui me: ―‍Ngayun Nai naha, jemu cjín xuta chja me hacutjin xi jemu choho casahmi cha xi cuajyihi vë cojo xuta ladu nuju ngajan Jerusalén.

¹⁴Quihndë ne, hacuaha hisca nahmi xi matitjun catsingatju rë cha nguehe xi cjuaha cha xuta xi fehya nuju me cjuandaja nuju. ―‍Cuatjin cafayangui me.

¹⁵Peru Nai naja ne, cuitjin cachja nga me cojo rë me: ―‍Tihin ta, cha xi cuajyihi vë ne, ngahan cavaxejen cha xi cjue sua cha cumachaya rë xutaxín, cojo xuta xi vitexa, cojo xuta tjë rë Israel, cuichja cha yo ngahan.

¹⁶Ngahan tsingácun rë cha há cjín cjuacjintacun xi meje rë xi cuatju cha cuma ngatsë naha. ―‍Cuatjin cachja Nai naja.

¹⁷Hya xi camá ne, cavetju Ananías quiji me ndava Judas. Hane xi cavisehen me ndava Judas ne, cavisanetsja me Saulo, cuitjin cachja me: ―‍Ngayun Saulo, Nai naja Jesús, me xi cahyun ndiya nduvun jan ne, catsingatju ná me, cojo sa xi ngayun ne, cuma tsejen nga nuju hacuaha tsë nuju cojo Hasen rë Nina. ―‍Cuatjin cachja me.

¹⁸Hane ha hora vëhë ni ne, cavixu tsëhë tuxcun Saulo ngu xcusun sacuaha tujún rë ti, hane camatsejen nga rë me. Hya xi camá ne, caxtenda me.

¹⁹Hane xi cajinë me niñu ne, casacuhñu rë me. Hya xi camá ne, cavéjña Saulo ngujo nixtin ngajan Damasco cojo xuta ladu rë Jesús.

²⁰Quiji me yëjë ni yungun, casua me camachaya rë xuta xi Jesús ne, hacui me xi Quihndi rë Nina, xi Mesías.

²¹Hane yëjë xuta xi cavisiñuju cjua jan ne, jemu quijircun rë me, cuitjin cachja me cojo xicjin me: ―‍¡Peru me vihi xi jemu casahmi cjuahngatacun cojo xuta xi veyanangui ñihi vëhë ngajan Jerusalén! ¡Hacuaha ha xa vëhë canduva me nguehe, xi cjuaha me xuta xi cuacun vë, cjuecojo me xcun nahmi xi matitjun! ―‍Cuatjin cachja xuta jan.

²²Peru Saulo ne, hitsë sa casacuhñu rë me xi tichja me cojo xuta, hisca quijircun rë xuta tjë rë Israel casahmi me ta, tsëhë xi tsejen xi cjuaquixi xi chja me xi Jesús ne, me vëhë jain xi catsingatju Nina.

²³Hane xi ha jemu cavatju nixtin jan ne, casahmichihin xuta tjë rë Israel cjua xi tsiquehen me Saulo.

²⁴Peru cjua vëhë ne, casacu camachaya rë Saulo. Xuta xi cuacun jan ne, nixtin nixten jemu casahmi me cuidadu tingotjo hnchua rë nandya jan cojo sa xi cuma tsiquehen me Saulo.

²⁵Peru xuta ladu rë Saulo ne, nguixun quiji catsitujne me Saulo taha ngaxtun hnchua cojo nahñu jiya me cahntsua ngu nisinya. Cuatjin camá, sehe cavetjutje me.

²⁶Hya xi camá ne, xi cafehe Saulo ngajan Jerusalén ne, meje cjue sahmitangun me cojo xuta ladu rë Jesús. Peru yëjë ni xuta xi cuacun jan ne, jemu tsacjun me Saulo. Macjaain rë me xi hacuaha xuta ladu rë Jesús camá me.

²⁷Ngajan xi Bernabé ne, quijicojo me Saulo xcun apóstol, hane ngajan casuacuenda me hacutjin xi ngajan ndiya ne, cavëë Saulo Nai naja, hacuaha cachja Nai naja cojo rë me. Hacuaha casuacuenda Bernabé apóstol jan hacutjin tsacjuiin Saulo xi cachja me tsëhë Jesús.

²⁸Cuatjin camá xi cjui nduva me catsujyihiya tangun me ngajan Jerusalén cojo xuta ladu rë Jesús. Hatuxa tsacjuiin me chja me tsëhë Jesús.

²⁹Hacuaha jercu cavisiajmi me cojo xuta xi visiajmi hne griego. Peru xuta xi cuacun jan ne, casahmi me ngujyë xi tsiquehen me Saulo.

³⁰Peru hya xi camachaya rë xuta ladu rë Jesús cjua vëhë ne, quijicojo me Saulo nandya Cesarea, hane ngajan catsingatju me me quiji me nandya Tarso.

³¹Cuatjin camá xi yëjë xuta ladu rë Jesús ngajan estadu Judea, cojo Galilea cojo Samaria ne, cafë rë me cjuacjintacun hacuaha camajyë sa cjuandaja rë Nina ngajñi rë me. Hane xi cuatjin quijinduju me cafaharcun me Nai naja hacuaha xi cuatjin cavisecoo rë me Hasen rë Nina ne, camacjín sa xuta ladu rë Jesús.

³²Pedru ne, catsujyihiya me jingu ni ladu. Hya xi camá ne, quiji cavusehenya me xuta ladu rë Nina xi siu ngajan Lida.

³³Hane ngajan cavechútaha me ngu xihin xi hmí rë Eneas, xi ha tjin rë jyin nu xi jiña xi cahme yojo rë.

³⁴Ngajan xi Pedru ne, cuitjin cachja me cojo xihin jan: ―‍Ngayun Eneas, Jesucristu tisahmi me xi cumandaja ngayun. Tisatjunhngun, chjayun nijña nuju vë. ―‍Cuatjin cachja Pedru. Hane ngutjen ni cavisatjenhnga xihin jan.

³⁵Hane yëjë ni xuta xi siu ngajan Lida cojo xuta xi siu ngajan Sarón cavëë me Eneas hane hacuaha cavisehen me ladu rë Nai naja.

³⁶Ngajan nandya Jope ne, cavéjña ngu chjuun ladu rë Jesús xi hmí rë Tabita. Hane xi hne griego ne, Dorcas hmí rë me. Chjuun vëhë ne, jemu sahmi me cjuandaja, hacuaha jemu visecoo me xuta xi tjin rë cjuachaja.

³⁷Hya xi camá ne, nixtin xi quitahá Pedru ngajan nandya Lida ne, chjuun vëhë ne, camahmu rë me, hane cahme me. Hane xuta jan ne, catsinduya me nima. Hane xi cafë catsinduya me ne, sehe quiji catsijaña me cahntsua ndihya ngahnga.

³⁸Vëhë ta nandya Lida ne, tiña tacun tsëhë nandya Jope. Hane hya xi camachaya rë xuta ladu rë Jesús ngajan Jope xi Pedru ne, quitahá me ngajan Lida ne, catsingatju me jo xihin quijijaha rë Pedru, cuitjin cachja me: ―‍Nihñu cjuandaja ne, cuanguen cojo niji ngajan Jope marcu macjain.

³⁹Ngajan xi Pedru ne, cavetju me quiji me cojo xihin jan. Xi tu cafehe me ngajan ndava nima ne, quijicojo me me ndihya ngahnga hiscan jiña nima. Hane jemu cjín yachjin cahan ne, quiji caxinchacun me xcun Pedru, hisca chja hisca jihnda me titsingacun me tsjian xi casahmi nima Dorcas hya xi tacun nima cjuahñu.

⁴⁰Ngajan xi Pedru ne, cachja me cojo yëjë xuta xi cuetju xuta candatsen. Hane xi cafë xuta cavetju me candatsen ne, sehe cavixcuhnchi Pedru, casahmi me oración rë me. Hane xi cavuya cavutsejen me nima ne, sehe cachja me cuitjin: ―‍Tabita, tisatjunhngun. ―‍Cuatjin cachja me. Hane chjuun jan ne, cavuxaha tuxcun. Hane xi cavëë rë Pedru ne, cavisatjenhnga cavéjña.