Apostolo 9:6-40

⁶Ḡa iḡunoꞌi, ebu Damaseko neḡa onamoꞌi! Ḡaeꞌa haḡaiꞌuma gauḡa eꞌeabuꞌu ḡeꞌuma.”

⁷Saulo teite onamiroteꞌe azaḡaꞌe edau radiuꞌenaꞌa mene ḡoeriro, mazaḡa ze ago igiro rehano, vazeḡa mene horoniro.

⁸Sauloꞌe rahaonoꞌo iḡunadu ubumaḡa raꞌanirotemo, ḡau ꞌahoga mene horoniro. Eꞌanoꞌo ze Saulo ꞌevoꞌano abinadu, Damaseko neḡa diuḡiꞌ onamiro.

⁹Sauloꞌe mada uḡidu ehamanoga mene idararo, ebu vu gagoga zu oganoga mene idararo.

¹⁰Damaseko neḡanoꞌe Zuhiꞌa Boro tahiꞌa ꞌahoganiꞌa radiunu. Niḡaꞌe Anania. Zuhiꞌa Boroꞌa iḡuna teige ane mazao fureranadu ḡoreniro. “Anania!” Aneꞌa naenaeninaꞌa, “Zuhiꞌa Boro, e ꞌada.” reiro.

¹¹Zuhiꞌa Boroꞌa ninaꞌa, “Iḡunadu, ibi duduḡa raꞌeteꞌe ibiḡano onamoꞌi, ebu vaze niḡa Iuda, ane ne onamoꞌi! Ebu Taso vazeḡa ꞌahoga, niḡa Saulo, ani veize eꞌea ḡadimanoꞌi, mazaḡa ani Badiꞌa mazao kurauꞌohe.

¹²U Saulo ani iḡunuꞌeteꞌe teigeꞌeteꞌea, eḡeꞌa vaze ꞌahoga mae fureno hanadu horoniro. Niḡa Anania. Ani diuḡadu, Saulo rana ꞌevoꞌa tiro, ane bare ehamanoga veize.”

¹³Ananiaꞌa naenaeninaꞌa, “Zuhiꞌa Boro! Vaze ḡehaḡaniꞌa ani hari meꞌodoga igiro. Zu aneꞌa Ierusalema neḡano Badiꞌa mone azaḡa sausauzidoteꞌe haḡaiḡa niduꞌa igiro.

¹⁴Ebu Damaseko neḡano zuni dibuꞌo hauꞌeteꞌe boroboroꞌa tuḡunadu onaeha, ḡae ni rae kurauꞌeteꞌe azaḡa niduꞌa oboze touga veize.”

¹⁵Rehano Zuhiꞌa Boroꞌa ninaꞌa, “Onamoꞌi! Vaze ꞌadiꞌe gauhe haḡaoga veize eḡeꞌa mae tiro, Iuda mene azaḡa zu zeḡe kini azaḡa, zu Isaraela azaḡa mazao eḡe ni rae furenoga veize.

¹⁶Ebu eḡe ni uꞌano aduga boro hiditeꞌe ihoniꞌuma.”

¹⁷Eꞌanoꞌo Anania ani onamadu Iuda ne diuḡiro, ebu ꞌevoꞌa Saulo rana teadu, ꞌahige reiro, raenaꞌa, “Saulo nego! Zuhiꞌa Boro Iesu, ḡaeꞌa ꞌadi onaeꞌegano ibio hidiroteꞌe Zuhiꞌaḡa, aneꞌa tuḡuhadu onaeha, ḡae bare ehamanoga veize, zu Vine Zaḡoḡaniꞌa ḡae zamao irivaꞌoga veize.

¹⁸Ebu ḡozone eḡoḡa heuḡaniꞌa ubumaḡa ꞌuiroteꞌeꞌa tabara fitire buaro, ebu ani bare ehamaro. ꞌOugadu ani iḡunadu bapatizo meiro,

¹⁹ebu ogomu nu anadu, ahiꞌaniꞌa bare inariro. Saulo ani Damaseko neḡano mada nu Zuhiꞌa Boro tahiꞌa tahiꞌa teite radiro.

²⁰Ebu zogone Iuda azaḡa kuru neḡa neḡa onamadu, “Iesuꞌe Badiꞌa Ubuga” rae haramiro.

²¹Iuda azaḡaniꞌa eꞌe igirotene, zeḡe niduꞌa zaguzagaro, ebu raenaꞌa, “Vaze ꞌadiꞌe Ierusalema neḡano Iesu ni rae kurauꞌeteꞌe azaḡa sausauziroteꞌe vazeḡa. ꞌAdao zuni eꞌe azaḡa oboze teadu, dibuꞌo hauꞌeteꞌe boroboro vaḡe tutuze onamoga radu onaeha.”

²²Rehano Saulo ani inare huneꞌenaꞌa harame onaminu, ebu Iesuꞌe hubehune Keriso rae doḡoꞌanirotene, Iuda azaḡa, Damaseko neḡano radiuꞌeteꞌeꞌa naenaenouga mene idararo.

²³Mada ḡehaḡa hauḡiroteꞌe enogano, Iuda azaḡaꞌe Saulo matihi radu neneḡaniro,

²⁴rehano Saulo ani ederiro. Iuda azaḡaꞌe ohere zu madai Damaseko ḡabiꞌa ibihetaḡano Saulo matihi radu ganato haunu.

²⁵Rehano ane tahiꞌa tahiꞌaꞌa Saulo ohere zamahanadu, foraꞌa boro zamaḡano ohonadu, ne ḡabiꞌa bohaꞌanonoꞌo mini hina dabane buniro.

²⁶Ebu Saulo ani Ierusalema neḡa onamadu, Zuhiꞌa Boro tahiꞌa tahiꞌa teite ꞌauḡihi reiro, rehano zeḡe niduꞌa Saulo rihoniro, mazaḡa ze ꞌane, aniꞌe mene Zuhiꞌa Boro tahiꞌa, rae zamariro.

²⁷Rehano Banabasiꞌa Saulo zamahanadu, apostolo azaḡa vaḡe tutune onamiro, ebu Sauloꞌa Damaseko ibiḡano Zuhiꞌa Boro horoniroteꞌe zu, Zuhiꞌa Boroꞌa ḡoreniroteꞌe zu, Damaseko neḡano Iesu niḡano inare haramiroteꞌe, meꞌodo ziniro.

²⁸Eꞌe enogano, Saulo ani apostolo azaḡa teite Ierusalema neḡano reꞌoreꞌe oname onainu, zu Zuhiꞌa Boro niḡano inare haraminu.

²⁹Ebu Saulo ani Iuda azaḡa, Giriki ḡoeꞌano ḡoereꞌeteꞌe teite taꞌiro titiro, ebu ze Saulo maꞌuma ibiḡa vaḡiro.

³⁰Rehano Zuhiꞌa Boro mone azaḡaniꞌa eꞌe ederirotene, Kaisarea neḡa tutune ovoiro, ebu Taso neḡano tuḡuniro.

³¹Ebu Iudea habaꞌa, Galilea habaꞌa zu Samaria habaꞌa niduꞌa zamaḡano ekalesia azaḡaniꞌe uniho manoḡa madu inarinu, zu Zuhiꞌa Boro gubaninu. Ebu Vine Zaḡoḡa zuni danazeꞌenaꞌa nabudizeꞌa ḡeharu onaminu.

³²U Petero ani haba ꞌahoga ꞌahoga onaminuteꞌea, ne niḡa Lidao Zuhiꞌa Boro mone azaḡa ḡiaziꞌ onamiro.

³³Ebu vaze ꞌahoga, niḡa Ainea hidiro. Aniꞌe ahiꞌa mene haganinu, ebu muri fuꞌo zu uḡidu fare (8) baze daꞌo radiunu.

³⁴Ebu Peteroꞌa ninaꞌa, “Ainea, Iesu Kerisoꞌa faiꞌeꞌohe. Iḡunoꞌi, ebu evaneḡo hegoꞌi!” Ebu ani zogone iḡuniro.

³⁵Ebu Lida neḡa zu Saroni habaꞌa azaḡa niduꞌa, aneꞌa edau ragavoga horonirotene, zamaze ḡihunadu Zuhiꞌa Boro mazao fiiro.

³⁶U Iopa neḡanoꞌe roḡae ꞌahoga, niḡa Tabitaꞌa radiunu. Aniꞌe Zuhiꞌa Boro mone roḡaeḡa ꞌahoga. Tabitaꞌe Heberu ḡoeꞌa, u Giriki ḡoeꞌanoꞌe Doreka. Aniꞌe iḡaiḡa haḡai manoḡa haḡaido, zu ḡauze oꞌoꞌa azaḡa danazido.

³⁷Peteroꞌa Lida neḡano radiunuteꞌe zamaḡano Tabita ani uginadu rudaro. Eꞌanoꞌo ani viro hanadu hitaga neḡano bazune tiro.

³⁸U Lida neḡaꞌe Iopa neḡa uhiḡano. Eꞌanoꞌo Zuhiꞌa boro tahiꞌa tahiꞌaꞌa Peteroꞌe Iopa neḡano radiuꞌeteꞌe igirotene, vaze aheu ane vaḡe tuḡuziro. Ebu ze Petero uminiro raenaꞌa, “Ḡa emeḡe teite ḡarihe aroꞌi!”

³⁹Ebu Petero ani zeḡe teite onamiro. Ebu feurirotene, hitaga neḡa tutune itiro. Eꞌea ḡozoba niduꞌa Petero edau varahiro, ebu niauꞌenaꞌa dabuaze zu nahune ꞌueꞌeteꞌe koutiḡa ihoniro. Aꞌe Dorekaꞌa ḡabogano turino ziniroteꞌe.

⁴⁰Ebu Petero ani zeḡe niduꞌa tuḡuze buziro, ebu obenaḡa hina tuḡadu, Badiꞌa mazao kuraro. Ebu rune roḡaeḡa moneni ḡianadu niro, raenaꞌa, “Tabita, iḡunoꞌi!” Ebu ani ubumaḡa raꞌaro, ebu Petero horonadu, iḡune ehoriro.