Aposel 9:6-40

⁶Onone ur tur pa ur hanot tumo e Damaskus, pa dir atai u ana sa ning ur toli.”

⁷Pa a taraila ning la armuri, la kulkulan pa la matmataut pa bel la warwara, anasa la longor a elngena mainla, ika bel la oroi.

⁸E Sol i kamtur miting lapiu, pa ning i palpalas matana, bel i oroi sot ta utna. Pa la beni ana kuna utumo e Damaskus.

⁹Pa i kes tingia natola pukakiar, a matana i kut, bel i hangan pa bel i gang.

¹⁰Ning a barsan tagun a tarai a asasaerla, a risana e Ananias, i kes tumo e Damaskus. A Leklek i kabah i ana tatatai mange, “Ananias!” Pa e Ananias i kelesi mange, “Leklek, iau ot ne.”

¹¹Pa a Leklek i atai i mange, “Ur tur, pa ur han sur a rumai ane Judas, ana ngas ning di atongi a Tostos a Ngas. Pa ur kabah sur e Sol, a te Taso, kanumo i nunung.

¹²Ana tatatai, e Sol i oroi ning a barsan, a risana e Ananias, i kas teteki, pa i suah naur a kuna saot onoi sur ir tai ulak.”

¹³Pa e Ananias i kelesi mang, “Leklek, ia ka longor a galis a warwara ana barsan ning, pa a toltol laulau ning i toli ona anuma tarai saot e Jerusalem.

¹⁴Pa a leklek a tena artabarla tetek e God la malmaling seni sur ir dat la rop ning la lotu ana risam. Pa i hanot te e Damaskus.”

¹⁵Ika a Leklek i atai i mange, “Ur han ka, anasa ia ka aslang tari sur i anuka tena titol, ir warwara talapor ana risak tetek a taraila ning bel a tarai Israel, tetek a kingla, pa tetek a tarai Israel otleng.

¹⁶Pa ar asangani mang ir kilang a galis a kankan ana risak.”

¹⁷Lamur e Ananias i han, pa i kas ting na rumai ning e Sol i kes ia. I suah naur a kuna saot onoi, pa i atai i mange, “Tasiklik e Sol, a Leklek e Iesu, i ning i tur ot tetek u ting na ngas ning u han ute, i sune iau ute sur ur tai ulak, pa ur bukus ana Talngan Tabu.”

¹⁸Pa ning a utna i arlar ana palakotoi a sis i punga purum kakat kusun naur a kalso matana, pa i tai ulak. I tur pa di baptaisi.

¹⁹Ning i hangan pas, a palaona i rakrakai ulak. E Sol i kes ulak pas tetek a tarai a asasaerla tumo e Damaskus.

²⁰Pa i turpas a warawai kakat ana rumai lotula anuna tarai Juda, mang e Iesu a Nat e God.

²¹Pa la rop ning la longori, la kulkulan onoi pa la atongi mang, “A barsan kaning, i umkol la ning la lotu tetek e Iesu saot e Jerusalem. Pa ne i hanot ute sur ir dat pas a tarai a lotu o e Iesu, tetek a leklek a tena artabarla tetek e God.”

²²Ika a warawai ane Sol i rakrakai pa i atong a ututnala ning i amomol pasi mang e Iesu ot a Karisito. Pa a tarai Juda ning la kes tumo e Damaskus la nuknuk kol ana nuna na warwara, pa bel la kelesi.

²³Ning a galis a pukakiar ka rop, a tarai Juda la warwara taum sur lar umkol e Sol.

²⁴Ika e Sol ka tasmani mang la warwara taum suri. Ana moromla pa a kabakiarla a matanla i makas sur a tamanla ana hanua sur e Sol, sur lar umkoli.

²⁵Ika anuna kakak a asaer lar ben pasi ana morom, pa la alorong purumi ana rat ting na ris a woroh ning di tol alar a hanua ono.

²⁶Ning e Sol i hanot saot e Jerusalem, i tohoi sur ir kes taum ana tarai a asasaerla, ika la rop la matatani, anasa bel la tortorot ono i mang i otleng ning tagun a tarai a asasaer.

²⁷Ika e Barnabas i ben pasi, pa dia armuri tetek a aposella, pa i atai la mang, “E Sol ka oroi tar a Leklek, pa a Leklek i warwara teteki ana nuna tinan utumo e Damaskus. Pa ning i kes tumo e Damaskus, i warawai ana risana e Iesu pa bel i matmataut.”

²⁸Pa e Sol i kes taum ana tarai a lotu saot e Jerusalem, i han taltal, pa i warwara ana risana Leklek, pa bel i matmataut.

²⁹I warwara pa i keles a kabahla anuna Judala ning la warwara Grik, ika la mang sur lar umkoli.

³⁰Ning na tastasnala ana tortorot la longori, la beni utumo e Sisaria, pa lamur la sune seni utumo e Taso.

³¹Lamur a tarai a lotula ting na hananuala rop ana natol a papar Judia, e Galili pa e Samaria, la kes ana bal molmol. Pa a lotu i rakrakai, pa la kes na hanrawai tetek a Leklek, a Talngan Tabu i wunan la, pa a wawas ana tarai a lotula i han kas.

³²Ning e Pita i han amon ana hananuala, i geren alar a tarai ane God otleng tumo e Lida.

³³Tingia, i pastetek ning a barsan, a risana e Aineas, a palaona i mat. Ka arlar ana siwal a rau, i borbor ka ting na logo ngasna.

³⁴Pa e Pita i atai i mange, “Aineas, e Iesu Karisito i alangolango u. Ur tur, pa ur in a logo ngasim.” Pa i tur kakat.

³⁵La rop ning la kes ana hanua e Lida pa e Saron, la oroi a barsan ning, pa la lingir a nuknukinla tetek a Leklek.

³⁶Ning a hane tagun a tarai a asasaer i kes tumo e Jopa, a risana e Tabita, ana warwara Grik mang e Dokas. A hane ne, ka tol tar a galis a wakak a titol, pa a tena artabar tetek a kapan na taraila.

³⁷Ana pukakiarla ning e Pita i titol tumo e Lida, e Dokas i kurah, pa i mat. Ning la ka pukur tari, la aborbor tari ona ning a tuka rumai saot.

³⁸E Lida i kes milau e Jopa, pa ning a tarai a asasaer miting e Jopa la longori mang e Pita kanumo e Lida, la sune naur a barsan teteki pa dia angongosi mang, “Maris mila, ur lamut kapit tetek mila.”

³⁹E Pita i han taum on diau. Ning i hanot, la beni usaot ana tuka rumai. Pa a laola rop la tur talilisi pa la domos. Pa la asangan a kolosla taum ana kaenla, ning e Dokas i suk tar la ning kaning ot i laun.

⁴⁰E Pita i sune purum la rop miting na tuka rumai ning, pa i kes ana bokona hana, pa i nunung. I talingir tetek a hane ning i mat, i atongi mang, “Tabita, ur tur.” Pa e Tabita i palpalas matana, pa ning i oroi e Pita, i kes kakat.