Hacutjin Casahmi Apóstol 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ngajan nandya Cesarea ne, cavéjña ngu xihin xi hmí rë Cornelio. Capitán má me tsëhë sindadu tsëhë nangui Italia.

²Me vëhë ne, jemu ndaja faharcun me Nina cojo yëjë xuta xi siu ndava me, hacuaha jemu sua me cjuandaja cojo xuta tjë rë Israel, hacuaha yëjë ni hora fehya rë me Nina cjuandaja rë me.

³Ngu nixtin jan sacuaha chuva rë fane jyan tsëhë nguinixtin ne, cavëëndaja me xi cafehe ngu ángel rë Nina cachja cojo rë me cuitjin: ―‍Cornelio. ―‍Cuatjin cachja.

⁴Hane xi cavutsejenndaja sa me ángel jan ne, jemu catsacjun me camá, sehe cachja me cuitjin: ―‍¿Mé jan, Tatá? ―‍Cuatjin cachja me. Ngajan xi ángel jan ne, cuitjin cafayangui: ―‍Ngatsë rë oración riji cojo ngatsë rë cjuandaja xi jemu tehe ne, Nina ne, hacuaha tsinguitsjen me ngaye.

⁵Quihndë ne, ningatji ngujo xihin ngajan Jope, chjindaye rë cha Simón, cha xi hacuaha hmí rë Pedru.

⁶Cha Simón vëhë ne, ngajan tacun cha ndava ngu cha vechjanchuxin, xi hacuaha hmí rë Simón, cha xi tacun ndava tiña ndachacun. ―‍Cuatjin cafayangui ángel jan.

⁷Hane xi cavatju cafe ángel xi cachja cojo rë me jan ne, sehe cajindaya me jo mosu hndixahan rë me cojo ngu sindadu xi sahmixa ndava me hacuaha faharcun rë Nina.

⁸Hane xi cafë casuacuenda me yëjë ni cjuacjintacun rë me ne, sehe catsingatju me cjue ngajan Jope.

⁹Hane xi camá nchujun xi ha jima tiña cha xi cuacun jan nandya Jope ne, sacuaha chuva rë nchisen ne, sehe camiji Pedru ngajan xcun ndihya xi sahmi me oración.

¹⁰Hya xi camá ne, camavojo rë me, meje sinë me hitsë tu mé ni xi sinë me. Hane jinguyëjë rë xi tisehenchjine xi sinë me ne, sacuaha xi canduva cachja ngu chini cojo rë me.

¹¹Tivutsejen me xi ngahnga ne, catuxaha, hane nduvajne sacuaha ngu tsjian jyë, quichahahñu rë catsiñuju yuju rë xi nduvajne nangui.

¹²Cahntsua tsjian jan ne, ngajan hincha yëjë xcusun chu xi tsujyihiya nangui cojo chu xi vitjen ngahnga xi tsavi xi sinë xuta nangui Israel.

¹³Hya xi camá ne, Pedru ne, cahndë me ngu cjua xi cachja cojo rë me cuitjin: ―‍Pedru, tisatjinhngue. Niquihin ngu chu ne, sehe xini chu. ―‍Cuatjin cachja cjua jan.

¹⁴Hane Pedru ne, cuitjin cachja me: ―‍Cumaji, Tatá, ta ngahan ne, cjëë camahani sínë ngu xcusun xi tsavi vë. ―‍Cuatjin cachja me.

¹⁵Peru xi ma jo ndiya ne, cuitjin cachja nga cjua jan cojo rë me: ―‍Xi ha Nina cachja me xi hacuiin tsavi ne, xi canujiin ngaye xi tsavi. ―‍Cuatjin cachja cjua jan.

¹⁶Jyan ndiya camá xcusun vëhë. Hya xi camá ne, ngutjen ni cavuya quiji nga tsjian jan ngahnga.

¹⁷Hane jinguyëjë rë xi titsingataha cacun Pedru mé vijne xcusun xi cavëë me jan ne, tivinenguise cha xi catsingatju Cornelio jan jani xi ndava Simón. Hane xi cafehe cha jan ne, caxinchacun ni cha tingotjo,

¹⁸sehe cafinenguise cha há ngajan tacun Simón xi hacuaha hmí rë Pedru.

¹⁹Hane jinguyëjë rë xi titsingataha cacun Pedru tsëhë xcusun xi cavëë me jan ne, cuitjin cachja Hasen rë Nina cojo rë me: ―‍Chutsijin ni. Hinchacun jo jyan cha xi tivanguise ri.

²⁰Tihinjni ne, tihin cojo cha. Xicamacjiin tacuin ta cha xi cuacun vë ne, ngahan catsingátju cha. ―‍Cuatjin cachja Hasen rë Nina.

²¹Hane xi quijijne Pedru hiscan hinchacun cha xi cuacun jan ne, cuitjin cachja me: ―‍Ngahan xi vinchunsun ná. ¿Mé xa canduvun? ―‍Cuatjin cachja Pedru.

²²Ngajan xi cha xi cuacun jan ne, cuitjin cachja cha: ―‍Ngu capitán xi hmí Cornelio catsingatju niji me xi canduvin nguehe. Me vëhë ne, ngu xihin ndaja me, hacuaha jemu faharcun me Nina. Yëjë ni xuta tjë rë Israel ne, ndaja chja me tsëhë Cornelio. Ngu ángel rë Nina cachja cojo rë me xi squindaya me ngayun xi cuangun ndava me cojo sa xi cuisiñuju me cjua xi cuinújun cojo rë me. ―‍Cuatjin cachja cha xi cuacun jan.

²³Hya xi camá ne, cachja me cojo cha xi cuisehen cha cahntsua ndihya, hacuaha casua me cahndë́ xi cuiyuju cha ngajan. Hane xi camá nchujun jan ne, cavetju me quiji me cojo cha, hacuaha cojo sa ngujo xuta ladu rë Jesús xi siu ngajan Jope quiji me cojo rë me.

²⁴Hane xi camá nchujun nga jan ne, cafehe me nandya Cesarea. Cornelio ne, ha casahmitangun me xuta rë me cojo amigu ndaja rë me, siuya me Pedru.

²⁵Hane xi ha cuisehen Pedru jan ne, cavechútaha Cornelio me. Cornelio ne, quiji cafañatsacjan me xcun Pedru xi cafaharcun me.

²⁶Peru Pedru ne, catsisatjenhnga me Cornelio, hacuaha cachja me cojo cuitjin: ―‍Tisatjunhngun ta ngahan ne, hacuaha ngu xuta ni ngahan. ―‍Cuatjin cachja me.

²⁷Hane taha visiajmi me cojo Cornelio ne, cavisehen me ndihya, ngajan cavëë me xi jemu cjín xuta tjin tangun me jan.

²⁸Sehe ngajan xi cachja Pedru cojo rë xuta jan cuitjin: ―‍Ngayun ne, ha ndaja hyun xi ngu xuta tjë rë Israel ne, sacuiin cahndë́ xi tsihñu me yojo rë me cojo xutaxín, hacuaha sacuiin cahndë́ xi cuisehen me ndava. Peru ngahan ne, casua Nina camachaya ná xi mijí rë xi cuichjá xi tsavi cojo ngu xcusun xuta.

²⁹Vëhë xi xi tu quiji chjahá ná ne, ngutjen canduvá ni, hisca ngu cjua cachjaan. Quihndë ne, meje ná cumachaya ná mé nihñu ná xi cachjindayun ná. ―‍Cuatjin cachja Pedru.

³⁰Ngajan xi Cornelio ne, cuitjin cachja me: ―‍Cuyatje fane jyan, sacuaha hora vihi ne, tisahme oración naha nguehe ndya naha. Hane ha tu ñahñu cahvë ngu xihin, secun xcun, yaja ngu tsjian xi jemu tu seti camahani,

³¹hane cuitjin cachja cojo ná: “Cornelio, Nina ne, cahndë me oración riji, hacuaha ngatsë rë cjuandaja xi jemu tehe ne, Nina ne, hacuaha tsinguitsjen me ngaye.

³²Quihndë ne, ningatji cjua ngajan Jope, hane chjindaye rë cha Simón, cha xi hacuaha hmí rë Pedru. Cha vëhë ne, tacun cha ndava cha Simón, ngu cha vechjanchuxin, xi tacun cha tiña ndachacun.” Cuatjin cachja xihin jan cojo ná.

³³Vëhë xi marcu macjain catsingátju cjua nuju, hane jemu ndatjin canihñu xi canduvun. Vëhë xi quihndë ne, ha tjin tangun ngayin ngayijin ni nguehe xcun Nina xi cuisiñiji yëjë cjua xi casua nuju Nina xi cuinújun cojo niji. ―‍Cuatjin cachja Cornelio.

³⁴Ngajan xi Pedru ne, cuitjin cachja me: ―‍Ngahan vutsején ne, Nina ne, hatuxa quixi jain me cojo cjuatacun rë me xi tsichuva me yëjë ni xuta cojo cjuatacun rë ta

³⁵yëjë ni nación ne, tu jarë ni xuta xi faharcun me Nina hacuaha sahmi me cjuandaja ne, jemu chuya rë Nina tsëhë me.

³⁶Nina ne, catsingatju me cjuandajyihi rë me tsijin, ngayin xuta tjë rë Israel; casua me camachaya niji xi ngatsë rë Jesucristu ne, sacú niji cjuandaja cjuajeya. Me vëhë xi Nai rë yëjë ni xuta.

³⁷Ngayun ne, ha machaya nuju tsëhë xcusun xi camá jingujyë ni nación Judea. Cavetsihin hisca distritu Galilea, hya xi cavatju cachja nima Juan xi meje rë xi xtenda xuta.

³⁸Hacuaha ha hyun xi Jesús, xuta Nasaret ne, Nina ne, catsinguitsë rë me cojo Hasen rë me hacuaha cojo ngahñu rë me. Jesús vë ne, catsujyihiya casahmi me cjuandaja hacuaha casahmi me xi camandaja yëjë xuta xi jemu tisuaxti Satanás. Cuatjin casahmi me ta, tsëhë xi Nina ne, hacuaha tacun cojo rë me.

³⁹Ngayin tihín machaya rë xuta tsëhë yëjë xcusun xi cahyin xi casahmi me ngajan Jerusalén, cojo jingujyë ni nación Judea. Xi cavetaha xuta tjë rë Israel jan me xcun ngu cru ne, catsiquehen xuta jan me.

⁴⁰Me vëhë ne, Nina catsicuya rë me cjuahñu xi ma jyan nixtin, hacuaha casua Nina cahndë́ xi cavuya camatsejen nga me.

⁴¹Peru hacuiin ngajñi rë yëjë xuta camatsejen me ta suvá ni ngajñi rë me xi Nina cavaxijin rë cojo tjun sa, cuma cuinújan ne, ngajñi niji ngayin, xi cachini cahyin tangun cojo rë me hya xi cavatju cavuya me cjuahñu.

⁴²Hacuaha me vëhë cavitexa niji me xi tihín cumachaya rë xuta xi me vëhë xi casuaxa Nina me xi tsichuva me xuta cojo cjuatacun rë, sa siu quicun me o sa cahme me.

⁴³Yëjë ni profeta ne, cachja me ta yëjë ni xuta xi cumangu cacun cojo Jesús ne, sacú rë me cjuaninchataha tsëhë jyë́ rë me, xi cuatjin mangucacun me. ―‍Cuatjin cachja Pedru.

⁴⁴Hora xi tichja cuaha Pedru cjua vëhë ne, canduva Hasen rë Nina cavisehen xahasen rë yëjë xuta xi tivisiñuju cjua xi tichja Pedru jan.

⁴⁵Hane xuta ladu rë Jesús xi tjë rë Israel xi cojo me canduva me cojo Pedru ne, jemu quijircun rë me xi cojo xutaxín casua Nina Hasen rë me xi cuma rë me.

⁴⁶Cuatjin quijircun rë me ta, tsëhë xi cahndë me xi xutaxín jan ne, tichja me ngujo hne xi hisca hvíin xutaxín vë xi tisahmi jyë tisahmi hnga me Nina.

⁴⁷Ngajan xi Pedru ne, cuitjin cachja me: ―‍Cumaji nichoon ngayaan nandá xi xtenda xuta, ta me xi cuicun vi ne, hacuaha casacu rë Hasen rë Nina sacuatjin casacu naja ngayaan. ―‍Cuatjin cachja Pedru.

⁴⁸Sehe cavitexa me xi caxtenda xuta xi cuacun vë xi cavisehen me ladu rë Jesucristu. Ngajan xi xuta jan ne, cafehya sa rë me Pedru xi cuejña sa me ngujo nixtin cojo rë me.