6තදා කම්පමානෝ විස්මයාපන්නශ්ච සෝවදත් හේ ප්‍රභෝ මයා කිං කර්ත්තව්‍යං? භවත ඉච්ඡා කා? තතඃ ප්‍රභුරාඥාපයද් උත්ථාය නගරං ගච්ඡ තත්‍ර ත්වයා යත් කර්ත්තව්‍යං තද් වදිෂ්‍යතේ|
7තස්‍ය සඞ්ගිනෝ ලෝකා අපි තං ශබ්දං ශ්‍රුතවන්තඃ කින්තු කමපි න දෘෂ්ට්වා ස්තබ්ධාඃ සන්තඃ ස්ථිතවන්තඃ|
8අනන්තරං ශෞලෝ භූමිත උත්ථාය චක්‍ෂුෂී උන්මීල්‍ය කමපි න දෘෂ්ටවාන්| තදා ලෝකාස්තස්‍ය හස්තෞ ධෘත්වා දම්මේෂක්නගරම් ආනයන්|
9තතඃ ස දිනත්‍රයං යාවද් අන්ධෝ භූත්වා න භුක්තවාන් පීතවාංශ්ච|
10තදනන්තරං ප්‍රභුස්තද්දම්මේෂක්නගරවාසින ඒකස්මෛ ශිෂ්‍යාය දර්ශනං දත්වා ආහූතවාන් හේ අනනිය| තතඃ ස ප්‍රත්‍යවාදීත්, හේ ප්‍රභෝ පශ්‍ය ශෘණෝමි|
11තදා ප්‍රභුස්තමාඥාපයත් ත්වමුත්ථාය සරලනාමානං මාර්ගං ගත්වා යිහූදානිවේශනේ තාර්ෂනගරීයං ශෞලනාමානං ජනං ගවේෂයන් පෘච්ඡ;
12පශ්‍ය ස ප්‍රාර්ථයතේ, තථා අනනියනාමක ඒකෝ ජනස්තස්‍ය සමීපම් ආගත්‍ය තස්‍ය ගාත්‍රේ හස්තාර්පණං කෘත්වා දෘෂ්ටිං දදාතීත්ථං ස්වප්නේ දෘෂ්ටවාන්|
13තස්මාද් අනනියඃ ප්‍රත්‍යවදත් හේ ප්‍රභෝ යිරූශාලමි පවිත්‍රලෝකාන් ප්‍රති සෝ(අ)නේකහිංසාං කෘතවාන්;
14අත්‍ර ස්ථානේ ච යේ ලෝකාස්තව නාම්නි ප්‍රාර්ථයන්ති තානපි බද්ධුං ස ප්‍රධානයාජකේභ්‍යඃ ශක්තිං ප්‍රාප්තවාන්, ඉමාං කථාම් අහම් අනේකේෂාං මුඛේභ්‍යඃ ශ්‍රුතවාන්|
15කින්තු ප්‍රභුරකථයත්, යාහි භින්නදේශීයලෝකානාං භූපතීනාම් ඉස්‍රායේල්ලෝකානාඤ්ච නිකටේ මම නාම ප්‍රචාරයිතුං ස ජනෝ මම මනෝනීතපාත්‍රමාස්තේ|
16මම නාමනිමිත්තඤ්ච තේන කියාන් මහාන් ක්ලේශෝ භෝක්තව්‍ය ඒතත් තං දර්ශයිෂ්‍යාමි|
17තතෝ (අ)නනියෝ ගත්වා ගෘහං ප්‍රවිශ්‍ය තස්‍ය ගාත්‍රේ හස්තාර්ප්‍රණං කෘත්වා කථිතවාන්, හේ භ්‍රාතඃ ශෞල ත්වං යථා දෘෂ්ටිං ප්‍රාප්නෝෂි පවිත්‍රේණාත්මනා පරිපූර්ණෝ භවසි ච, තදර්ථං තවාගමනකාලේ යඃ ප්‍රභුයීශුස්තුභ්‍යං දර්ශනම් අදදාත් ස මාං ප්‍රේෂිතවාන්|
18ඉත්‍යුක්තමාත්‍රේ තස්‍ය චක්‍ෂුර්භ්‍යාම් මීනශල්කවද් වස්තුනි නිර්ගතේ තත්ක්‍ෂණාත් ස ප්‍රසන්නචක්‍ෂු ර්භූත්වා ප්‍රෝත්ථාය මජ්ජිතෝ(අ)භවත් භුක්ත්වා පීත්වා සබලෝභවච්ච|
19තතඃ පරං ශෞලඃ ශිෂ්‍යෛඃ සහ කතිපයදිවසාන් තස්මින් දම්මේෂකනගරේ ස්ථිත්වා(අ)විලම්බං
20සර්ව්වභජනභවනානි ගත්වා යීශුරීශ්වරස්‍ය පුත්‍ර ඉමාං කථාං ප්‍රාචාරයත්|
21තස්මාත් සර්ව්වේ ශ්‍රෝතාරශ්චමත්කෘත්‍ය කථිතවන්තෝ යෝ යිරූශාලම්නගර ඒතන්නාම්නා ප්‍රාර්ථයිතෘලෝකාන් විනාශිතවාන් ඒවම් ඒතාදෘශලෝකාන් බද්ධ්වා ප්‍රධානයාජකනිකටං නයතීත්‍යාශයා ඒතත්ස්ථානමප්‍යාගච්ඡත් සඒව කිමයං න භවති?
22කින්තු ශෞලඃ ක්‍රමශ උත්සාහවාන් භූත්වා යීශුරීශ්වරේණාභිෂික්තෝ ජන ඒතස්මින් ප්‍රමාණං දත්වා දම්මේෂක්-නිවාසියිහූදීයලෝකාන් නිරුත්තරාන් අකරෝත්|
23ඉත්ථං බහුතිථේ කාලේ ගතේ යිහූදීයලෝකාස්තං හන්තුං මන්ත්‍රයාමාසුඃ
24කින්තු ශෞලස්තේෂාමේතස්‍යා මන්ත්‍රණායා වාර්ත්තාං ප්‍රාප්තවාන්| තේ තං හන්තුං තු දිවානිශං ගුප්තාඃ සන්තෝ නගරස්‍ය ද්වාරේ(අ)තිෂ්ඨන්;
25තස්මාත් ශිෂ්‍යාස්තං නීත්වා රාත්‍රෞ පිටකේ නිධාය ප්‍රාචීරේණාවාරෝහයන්|
26තතඃ පරං ශෞලෝ යිරූශාලමං ගත්වා ශිෂ්‍යගණේන සාර්ද්ධං ස්ථාතුම් ඓහත්, කින්තු සර්ව්වේ තස්මාදබිභයුඃ ස ශිෂ්‍ය ඉති ච න ප්‍රත්‍යයන්|
27ඒතස්මාද් බර්ණබ්බාස්තං ගෘහීත්වා ප්‍රේරිතානාං සමීපමානීය මාර්ගමධ්‍යේ ප්‍රභුඃ කථං තස්මෛ දර්ශනං දත්තවාන් යාඃ කථාශ්ච කථිතවාන් ස ච යථාක්‍ෂෝභඃ සන් දම්මේෂක්නගරේ යීශෝ ර්නාම ප්‍රාචාරයත් ඒතාන් සර්ව්වවෘත්තාන්තාන් තාන් ඥාපිතවාන්|
28තතඃ ශෞලස්තෛඃ සහ යිරූශාලමි කාලං යාපයන් නිර්භයං ප්‍රභෝ ර‍්‍යීශෝ ර්නාම ප්‍රාචාරයත්|
29තස්මාද් අන්‍යදේශීයලෝකෛඃ සාර්ද්ධං විවාදස්‍යෝපස්ථිතත්වාත් තේ තං හන්තුම් අචේෂ්ටන්ත|
30කින්තු භ්‍රාතෘගණස්තජ්ඥාත්වා තං කෛසරියානගරං නීත්වා තාර්ෂනගරං ප්‍රේෂිතවාන්|
31ඉත්ථං සති යිහූදියාගාලීල්ශෝමිරෝණදේශීයාඃ සර්ව්වා මණ්ඩල්‍යෝ විශ්‍රාමං ප්‍රාප්තාස්තතස්තාසාං නිෂ්ඨාභවත් ප්‍රභෝ ර්භියා පවිත්‍රස්‍යාත්මනඃ සාන්ත්වනයා ච කාලං ක්‍ෂේපයිත්වා බහුසංඛ්‍යා අභවන්|
32තතඃ පරං පිතරඃ ස්ථානේ ස්ථානේ භ්‍රමිත්වා ශේෂේ ලෝද්නගරනිවාසිපවිත්‍රලෝකානාං සමීපේ ස්ථිතවාන්|
33තදා තත්‍ර පක්‍ෂාඝාතව්‍යාධිනාෂ්ටෞ වත්සරාන් ශය්‍යාගතම් ඓනේයනාමානං මනුෂ්‍යං සාක්‍ෂත් ප්‍රාප්‍ය තමවදත්,
34හේ ඓනේය යීශුඛ්‍රීෂ්ටස්ත්වාං ස්වස්ථම් අකාර්ෂීත්, ත්වමුත්ථාය ස්වශය්‍යාං නික්‍ෂිප, ඉත්‍යුක්තමාත්‍රේ ස උදතිෂ්ඨත්|
35ඒතාදෘශං දෘෂ්ට්වා ලෝද්ශාරෝණනිවාසිනෝ ලෝකාඃ ප්‍රභුං ප්‍රති පරාවර්ත්තන්ත|
36අපරඤ්ච භික්‍ෂාදානාදිෂු නානක්‍රියාසු නිත්‍යං ප්‍රවෘත්තා යා යාඵෝනගරනිවාසිනී ටාබිථානාමා ශිෂ්‍යා යාං දර්ක්කාං අර්ථාද් හරිණීමයුක්ත්වා ආහ්වයන් සා නාරී
37තස්මින් සමයේ රුග්නා සතී ප්‍රාණාන් අත්‍යජත්, තතෝ ලෝකාස්තාං ප්‍රක්‍ෂාල්‍යෝපරිස්ථප්‍රකෝෂ්ඨේ ශායයිත්වාස්ථාපයන්|
38ලෝද්නගරං යාඵෝනගරස්‍ය සමීපස්ථං තස්මාත්තත්‍ර පිතර ආස්තේ, ඉති වාර්ත්තාං ශ්‍රුත්වා තූර්ණං තස්‍යාගමනාර්ථං තස්මින් විනයමුක්ත්වා ශිෂ්‍යගණෝ ද්වෞ මනුජෞ ප්‍රේෂිතවාන්|
39තස්මාත් පිතර උත්ථාය තාභ්‍යාං සාර්ද්ධම් ආගච්ඡත්, තත්‍ර තස්මින් උපස්ථිත උපරිස්ථප්‍රකෝෂ්ඨං සමානීතේ ච විධවාඃ ස්වාභිඃ සහ ස්ථිතිකාලේ දර්ක්කයා කෘතානි යාන්‍යුත්තරීයාණි පරිධේයානි ච තානි සර්ව්වාණි තං දර්ශයිත්වා රුදත්‍යශ්චතසෘෂු දික්‍ෂ්වතිෂ්ඨන්|
40කින්තු පිතරස්තාඃ සර්ව්වා බහිඃ කෘත්වා ජානුනී පාතයිත්වා ප්‍රාර්ථිතවාන්; පශ්චාත් ශවං ප්‍රති දෘෂ්ටිං කෘත්වා කථිතවාන්, හේ ටාබීථේ ත්වමුත්තිෂ්ඨ, ඉති වාක්‍ය උක්තේ සා ස්ත්‍රී චක්‍ෂුෂී ප්‍රෝන්මීල්‍ය පිතරම් අවලෝක්‍යෝත්ථායෝපාවිශත්|
ප්‍රේරිතාඃ 9
ප්‍රේරිතාඃ 9:6-40