GWAY GI IDAWUU’D 55:1-10

¹C̱iyi ’cem pini ki mon’thom pem, ayy Arumgimis. Dhali dhalki is pini ki ba’k mo ’peni tom pem jin doṯka/ ka di’b is mo.

²Ḵuthi is gom aha/ mo, dhali thoḵi aha/ gwo mo. Aha/ kumu ’twa/a ’cesh ki monṯo’c bwam pem mo.

³Dhali aha/ guskina du mo gom cuuwa/ gi ’kwani kun ta ’kup̱ mo, haali/ ’kwani kun ta thus ki thus mo tani uni siri’ckina siri’c ki sho’k mo. Haali/ uni ḵali mo jin ṯoju bwa ap̱o/ aha/ mo dhali ka nyor mo tani uni ki thip̱ mo ma dup̱e/ ap̱o/ aha/ mo.

⁴Dhali adum pem ’pe’di she/ e bwaman is pem mo, dhala pure/ gom mowu biṯki’da p̱o/ aha/ mo.

⁵Moŋḵo/ is dhali mondee is p̱u’dkina p̱o/ aha/ mo, dhali to jin ḵo/ki aha/ is mo tani uni kumki aha/ ’twa/a ’cesh mo.

⁶Dhali aha/ ona gwo mo ki: Ayy waḵki/ aha/ mina ’taki ta ga bi me’d gurko/ mo tani aha/ mina ’taki p̱e mo dhali si/ is mo be.

⁷Nye, aha/ mina ya si’dasi’d moyi Aha/ mina ya c̱a’b e mombwaasho moyi. Doshi ma dhali ’cunycuri yan mo.

⁸Aha/ mina lala ki jahanneyi dhali gama darha’dam pem ’peni mo ma bumburush ’tham mo dhali ’thama p̱unthar mo.

⁹’Ce’di tom buni jin thosona uni sho’k sho’k mo ma, ayy Tap̱a. C̱umbulki uni ale’d buni mo, haali/ aha/ hilkina mo jin bujura bujur mo dhali mo jin biruwa bir e ’peŋkuman bampa/ mo.

¹⁰Montee dhali mon’thiny uni iikin ka kul is e yana gaŋgaram piti mo, dhali mo jin tanuwa pibi dhali mo jin ṯoju bwa mo tani ’kon e uni mo.