Sam 55:1-10

¹Nabz ne Devet kx yrbzle mz kxrmailz ngr dzbe kxnzngrng, mz nzayrningr gita. Gct, xlrm nzkrka'-krbo bam. X bzkq drtqm satrp nzycmne-krbo bam.

²Lalztqm bange x ayzlum natqnge, Murde nabznge tropxpeu mz nztalvzo-krde.

³Enqmi rngeng nzrkatrpqng bange nzkxpungr, Mz nzxngitr-krnge nzycmne-kato-krdr, Mz nzrnzlvzo-krdr ninge, X nzobq-krmlr bange mz zngya.

⁴Nelznge vzdz-zlwzm, Murde ycpe pipz nzbz-krnge.

⁵Rnrcti-lzbqpenge mz zmwxlr, X nrkrdrtqnge esz'pe-ngrde.

⁶X rpix mz drtwrnge kx, “Nzmu nabxnge naycbzle, da kc tqwai bona, Nalvcx x nartangrx me namnc-zpwx-ngrne.

⁷Nalvctr-rlrux lzke, X namnc-lrpix esz'-krnge mrlcde.

⁸Na-anitxpwo nzrtangrti-krnge me narlakitrx Mz tewa x nounenq.”

⁹Kxetu, akipx kxdrka'-ngrng mz nzarlxlvrti-krbzme natqdr. Murde nzota-zvzng x nznani-lzbq-zvzng mz mztea.

¹⁰Mz nrlckxngrlx x nrlckxbq Mztea esz'tx-ngrpwz nzxpqbrlrngr lou x nzkxpungr.