Fes Jon 5:13-21

¹³Wal aibin raidimbat dijan leda langa yumob pipul hu bilib langa Jisas Krais det San blanga God, en aibin raidimbat dijan leda blanga meigim yumob sabi brabliwei yumob garram det olagijawan laif.

¹⁴En wi gin jandap strongbala lida langa God, dumaji wi sabi im oldei irrim wi wen wi askim im blanga enijing weya im wandim wi blanga abum.

¹⁵En wi sabi im garra gibit wi det ting weya wi askim im, dumaji wi sabi im oldei irrim wi wen wi askim im.

¹⁶Wal if yumob luk eni braja o sista blanga yumob dumbat nogudbala ting weya kaan meigim im dai, wal yumob garra prei langa God blanga im, en God garra larramgo im fri en meigim im kipgon jidan laibala. Lagijat na yumob garra prei blanga det braja o sista blanga yumob hu dumbat nogudbala ting weya kaan meigim im dai. Bat wanbala nogudbala ting deya garra meigim im dai. En ai nomo dalim yumob blanga prei langa God blanga tharran nogudbala ting.

¹⁷Ebri nogudbala ting weya wi dum im nogud. Bat sambala nogudbala ting nomo meigim wi dai.

¹⁸Wal wi sabi enibodi hu jidan biginini blanga God kaan oldei kipgon dumbat nogudbala ting, dumaji det San blanga God im oldei seibum wi, en det boswan dibuldibul kaan ardim wi.

¹⁹En wi sabi nomeda det boswan dibuldibul jidan bos blanga dijan wel, bat stil im nomo bos blanga wi, dumaji wi jidan biginini blanga God.

²⁰En wi sabi det San blanga God bin kaman, en imbin meigim wi sabi wulijim wi garra sabi det trubala God. En wi jidan joinap garram det trubala God. Yumob sabi na? Wi jidan joinap garram Jisas Krais det San blanga God. Im na det trubala God. En im det olagijawan laif du.

²¹Wal main biginini olabat, yumob garra wotjim miselp en nomo larram eni drimin deigidawei yumob. Binij na.