1 JUAN 5:13-21

¹³Tí nkehe mé kjinni kíxin jahará ó títekáonrá tí Xje̱en Dios, kíxin mé tso̱noaxínrá kíxin chaxín chontará kjuachón jnkochríxín.

¹⁴Tíhi mé chóxixínni Dios kíxin noheni kíxin ichrén nkehe tsjancheheni chꞌán éxí tjinkaon chꞌán la jehe chꞌán la tsinhin chꞌán.

¹⁵A̱ ntá tí xi̱kaha ó noheni kíxin Dios tjetinhin tí nkehe nixje̱he̱ni chꞌán, a̱ ntá kja̱xin ó noheni kíxin ó chóntani tí nkehe kjuancheheni chꞌán.

¹⁶A̱ ntá jnkojínrá tsꞌikonrá ijnko kíchuárá tjasin jie̱, a̱ ntá tí jehya ijnko jie̱ chrókꞌuenxín chꞌán, la chrókjuanchehérá Dios kíxin chrókjuinchexraxinkaon chꞌán kíxin kjuasin chꞌán jie̱, a̱ ntá Dios chrókjuanjon chꞌán kjuachón, tí chaxín jehya ijnko jie̱ chrókꞌuenxín chojni. A̱ ntá tí jie̱ chrókꞌuenxín chojni la ntáxrja̱n kíxin íchá jína chrókjuanchehyará Dios kíxin chrókjuinki̱tsa tí chꞌín a.

¹⁷Kaín nkehe jínahya la ijie̱ tíha. Kjánchó siín jie̱ tsꞌenxínhya chojni.

¹⁸Ó noheni kíxin tí nkexro tinkáchónki Itꞌéni Dios tjasinhya sín jie̱, kíxin tí Xje̱en Dios tjinki̱tsa tí jehe sín, a̱ ntá tí Jínahya tsjachahya tsjachroe tí jehe sín.

¹⁹Ó noheni kíxin Dios tꞌayakonhen tí jeheni, a̱ ntá tí Jínahya chónta kjuachaxin tꞌe̱tue̱nhen kuenté chjasintajni.

²⁰Ó noheni kja̱xin kíxin Xje̱en Dios kui, la ko kjuínki̱tsa chꞌán tí jeheni kíxin chrókónoheni nkexrí tjen Dios chaxín. A̱ ntá tjejókoni jnkoko̱á tí nkexro chaxín, tíha mé Jesucristo tí Xje̱en Dios. Tíha mé Dios chaxín, la tsochóntaxínni chꞌán kjuachón jnkochríxín.

²¹Éxí xja̱nna tꞌíkua̱n tí jahará, la ti̱to̱hérá tí dios tsíkjano̱ya. Amén. Ó tjen.