1 Joni 5:13-21

¹³Ro vua ige na isoe nijiavo jaka mukoreigia vierafero ja Godido Fari ijadufuo vame ma karivako ije jane abevaro ja ijiege vierafekiro na ijene isoe nijiave.

¹⁴Ro no ma vierafe no nidua fuone ijia baname isoena irere fu vierafema ije kuarakuva fuka fiena ifejuoke.

¹⁵Ro kuke no ma vierafero fu vua nuvuone boeje no kuaravo ije fune fiemoro no ijiege ma vierafekuva ije no vierafega fu ire boeje no kuaravo ije fu fiena vajuoke.

¹⁶Ro erare fu gaga e kai fuone be fu ise be rena fune vame miane naeno ijia vakoga fuka fuefuo baname isoeke. Fu ijiege isoega Godi fu ise fuone gana aregaro ifejaga fu una vame ma karivako ije abedufuo. Ro erare fu Godi Asoe nuvuone ije mukoreigia ijuegafana Jesu Kuraesido kavuane fu fuefuo usiaema ije dabe omise igege vierafenoeno ije funeka una vame ise miane naeno ijia vake. Ijadufuo fu e ijieki ije fube fuefuo baname isoemo.

¹⁷Ro e ije ise boeje binobino bu renoevo ije buka Godido akae ije kame tuaseve. Rove ise gue bu renoevo ije bu vame ise miane naeno ijia vako baki.

¹⁸Ro none vierafega erare fu una Godido fari remo ije fu maza boeje ise renoeno baki. Ijadufuo maeje e ije fune Godido Fari Jesure samuamo ijadufuo Setani fu e ije dabe vame ise ijia arafirimo baki.

¹⁹Ro noeje none vierafega no Godido anafa. Ro e ije bu ume igia ise renoejo ije fu Setanire samuagiame.

²⁰Ro fune Jesu Godido Fari ijare arina ume igia noena oenoekinu nijasuema ijadufuo no Godi ma vierafeve. Noeje no Godi ma ijiakiro Fari fuone Jesu Kuraesina karinoeve. Godi ije fu Godi ma ro fuje fu vame ma karivako ijene.

²¹Ijadufuo erafano igie nika koejo mukoreigia samuanamikinu karinoefo. Ro jade uri ume igadufuo ire bino kame oe jone ijia uruvana vierafenoegaro Godi maeje ja dabe una ikene nijavo.