1 Juan 5:13-21

¹³Dan me se a̱j cachronj nana̱ nihánj naya̱a̱ nij soj, cheꞌé rej queneꞌe̱n soj se vaa ca̱yáán soj ga̱ Diose̱ nu̱ꞌ cavii nu̱ꞌ caꞌanj, cheꞌé rej me soj síí amán rá niꞌya̱j man taꞌníí Diose̱ ei.

¹⁴Ne̱ cuano̱ nihánj me se a̱ doj ne chuꞌviꞌ níꞌ cachi̱nj niꞌya̱j níꞌ ꞌo̱ rasu̱u̱n rihaan Diose̱ a̱ maꞌ. ꞌO̱ se a̱j neꞌen ya̱ níꞌ se vaa sese caꞌve̱j rá soꞌ ni̱caj níꞌ rasu̱u̱n cachíín niꞌya̱j níꞌ rihaan soꞌ, ne̱ rque̱ soꞌ ado̱nj.

¹⁵Ne̱ cheꞌé se neꞌen níꞌ se vaa cuno̱ soꞌ me maꞌa̱n nana̱ cachi̱nj niꞌya̱j níꞌ rihaan soꞌ, cheꞌé dan neꞌen níꞌ se vaa quiꞌya̱j soꞌ nda̱a vaa cachi̱nj niꞌya̱j níꞌ rihaan soꞌ ei.

¹⁶Dan me se sese neꞌen níꞌ tinúú níꞌ ꞌyaj soꞌ me maꞌa̱n cacunꞌ, ne̱ cachi̱nj niꞌya̱j níꞌ cheꞌé soꞌ rihaan Diose̱, ne̱ Diose̱ me síí cara̱a̱ xꞌnaa cheꞌé cacunꞌ quiꞌyaj soꞌ ado̱nj. Tza̱j ne̱ sese neꞌen níꞌ man tinúú níꞌ ꞌyaj soꞌ cacunꞌ noco̱o ndoꞌo cacunꞌ quiꞌya̱j cavi̱ꞌ nu̱ꞌ soꞌ rihaan Diose̱, ne̱ taj cheꞌé cachi̱nj niꞌya̱j níꞌ rihaan Diose̱ cheꞌé soꞌ a̱ maꞌ. Dan me se vaa cacunꞌ u̱u̱n, ne̱ vaa cacunꞌ noco̱o ndoꞌo quiꞌya̱j cavi̱ꞌ nu̱ꞌ níꞌ rihaan Diose̱ ado̱nj. Tza̱j ne̱ cheꞌé cacunꞌ noco̱o yoꞌ me se se̱ cachíín niꞌya̱j soj mei.

¹⁷Dan me se me maꞌa̱n se nij ꞌyaj níꞌ me cacunꞌ chugua̱nj. Tza̱j ne̱ se̱ caviꞌ nu̱ꞌ níꞌ rihaan Diose̱ quiꞌya̱j me maꞌa̱n cacunꞌ yoꞌ maꞌ. ꞌO̱ se caꞌve̱e tinavi̱j Diose̱ cacunꞌ yoꞌ ei.

¹⁸Dan me se neꞌen níꞌ se vaa nu̱ꞌ nij síí caꞌngaa nimán quiꞌyaj Diose̱ roꞌ, daj chiha̱a̱ míj ne chéé nij soꞌ xrej síí chre̱e maꞌ. ꞌO̱ se tumé taꞌníí Diose̱ man nij soꞌ, ne̱ se̱ caꞌvee quiꞌya̱j chiꞌi̱i̱ síí chre̱e man nij soꞌ a.

¹⁹Ne̱ neꞌen níꞌ se vaa síí noco̱ꞌ man Diose̱ me níꞌ ado̱nj. Tza̱j ne̱ cunuda̱nj nij yuvii̱ ma̱n rihaan chumii̱ nihánj nocoꞌ man síí chre̱e ei.

²⁰Ne̱ neꞌen níꞌ se vaa a̱j caꞌnaꞌ taꞌníí Diose̱, ne̱ quiꞌyaj suun soꞌ cheꞌé níꞌ, cheꞌé rej caꞌve̱e xca̱j níꞌ cuentá cheꞌé Diose̱ ya̱, ne̱ neꞌen níꞌ se vaa me níꞌ síí noco̱ꞌ man maꞌa̱n ya̱ taꞌníí soꞌ Jesucristó, ne̱ Jesucristó roꞌ, me maꞌa̱n ya̱ Diose̱, ne̱ soꞌ me síí quiꞌya̱j ca̱yáán níꞌ ga̱ Diose̱ nu̱ꞌ cavii nu̱ꞌ caꞌanj ado̱nj.

²¹Ase vaa taꞌníj vaa nij soj rihanj, tinu̱j, nocoj. Dan me se cata̱j ꞌu̱nj rihaan soj, ne̱ cu̱tumé ndoꞌo soj man soj rihaan yaꞌanj acój yuvii̱ ma̱n rihaan chumii̱ nihánj ei. Ne̱ se̱ guun gu̱un rá soj ni̱ꞌyaj soj a̱ ꞌó rasu̱u̱n vaa da̱nj maꞌ.