1 JONI 5:13-21

¹³Omaimidana ipaladamu eli elewole i-minabo wewenalitaya elewole lepa mutiwaya alo le-minune liki data lowe kamiki wehe liki elitae loko ga maya luhuwa jeko lo noliboe.

¹⁴Lemokahoya Omaimidana omudalaloya ololo amoko sa-loko elekaka noune: Omailokaya saina makomu wako letudawoya, eimolakaho letiboto molatiboto nedeko maya ele lemekolaiye.

¹⁵Ito yatoka matoka nesamu wako lokuniyokoma, lemekolaiye loko lata lowe kamoko ele wehe lo-minudawo nenako, saina makomamu wako loetatudawoya enemane oko aya nesa maya le ladeu molokaka noune loko elekaka noune.

¹⁶Wewena mako wewenalalimo lahelamibo nesa lolo okadeko mudakoko jomidana epa nesala lolo okakamidana minamideko mudakoko aya wewenalalamuye loko Omailoka letibo ne. Sa-loko lokadeko Omailimoya elewole anulo ilime molatiye. Ito lahelamibo nesamidana nalawaya jomidana nalawa lamitabo nesamu noloe. Lahelamibo nesa makomidana nalalaya jomidana nalala ne. Yamidana nesamuya Omailoka likaka yowanu litae loko lamoe.

¹⁷Lahelamibo nesahena mukiya lihima lekaka nesamidana neboya, lahelamibo nesa malokaya jomidana nalala elewoleu lilime molokakalawaya ma minamiye.

¹⁸Lemokahoya sa-loko elekaka noune: Omailokati soto pebo wewenasiya lahelametibo nesaya lolo-halo iki minamikilae. Omaimidana ipalakaho ujapa obetokadeko lahelamibo nesa aholakahoya ma dupaloka lamekolaiye.

¹⁹Ito lemo Omailokati soto pudawo ne loko ito muki monokanipo minamibo wewena lahelamibo nesa aholada ilaukaya udikaka niae loko ele-minune.

²⁰Ito makoya sa-lokoki ele-minune: Omaimidana ipalakahoya maya mikauka lemekadanaki ele wehe lokaka nesateya le soto mololetokaibo nenako, Omai wehe loko yotoko weya ele wehe loko elekaka noune, ito Omai yotoko weloka kolokudawoya, ipala Kalaestida ilaukaya minoko leko okaka noune. Emoya Omai wehe loko yotoko we elewole oko minokakamidana aholaya ne.

²¹Oluhone yuhase, edimoya omai luweha laweha nesamu ujapa lalo iki minalo.