Exodus 20:12-20

¹²“Tehuza niw is amey niw wey iney niw, su para luǥeyazi kew te untung ne egkeuǥet is ked-ubpè niw zutun te tanà he ibeǥey ku keniyu.

¹³“Kenè kew mebunù.

¹⁴“Kenè kew mebpengumpadi.

¹⁵“Kenè kew mebpenakew.

¹⁶“Kenè kew medtarùtarù diyà te hukmanan te kedezaat te zuma niw he etew.

¹⁷“Kenè niw meimahi is baley te zuma niw, etawa esawa te zuma, menge suluǥuen, menge uyaǥen dan, wey minsan hengkey he ǥaked dan.”

¹⁸Ne hein nezineg duen te menge etew is beransì, wey zaǥing te vudyung, wey hein neehè dan is egkeserasab he kilat, wey evel zutun te vuntud, migkerker sikandan te kegkahandek dan, ne mibpekeziyù sikandan.

¹⁹Ne migkeǥiyan dan si Moises te, “Ebpemineg key minsan iyan ke zà ebpekidlalag kenami ne kenè nu en iyan ipepekidlalag kenami is Megbevayà su kela ke mebpemematey key.”

²⁰Ne migkeǥiyan sikandan ni Moises te, “Kenè kew mahandek su ibpeehè dà keniyu te Megbevayà is mekahandekhandek he ǥehem din su wey kew meteǥui te zekelà he kedtahud kandin, su para kenè kew mekesalà.”