Maaron Igham Mulin Yes Israela 20:12-20

¹²“Matam loŋloŋaiŋa pa tamam ve tinam, ve utandag padi. Leso uneep mala izi taan to you Yoova, Maaron tiom, pale nagham payom.

¹³“Urab tamtoghon imaat malep.

¹⁴“Ughur maat malep.

¹⁵“Uyub malep.

¹⁶“Upariaaŋ saveeŋ kaarom pa uwaghamun itam ite malep.

¹⁷“Lolom igham pa nditam ruum todi malep. “Ve lolom igham pa ndizwadi, mbesooŋa, ŋgai, ma mbeb todi ite paam malep.”

¹⁸Yes Israela tilooŋ lalaav avolutu, ve tighita ndug milia, ve tilooŋ mbeb to itaŋtaŋ inimale tavuur, ve tighita yab mbuasa asosooŋa ikau lolooz, le timatughez ve tinidi irur. Tovenen tiyoon saguan pa lolooz pughu,

¹⁹ve tisaav pa Mose tighaze: “Yom irau ugham Maaron avo, ve upaesia aliŋa payei. Pasa, yei nimatughez. Ighaze ye tau isavsaav toman ghei, nene pale nisob nimatmaat!”

²⁰Mose isaav padi ighaze: “Amatughez malep. Aazne, Maaron izi inim itaghon ataam tonene, pa ipatooŋ tapiri payam, leso awatag katini ve amatughez pani, ve agham sosor muul sob.”