Erubasa 19:10-29

¹⁰Kenà dait is tulebung he etew he ebpengungubpaan he zekelà is ketiǥeyunan din, ne tuwas pa he kenà dait is uripen he ebayàbayà te menge edumala.

¹¹Tenged te ketau te etew, egkehimu sikandin he mepelevayen. Ne igkelipey zin is kebpesaylu zin te nekesalà diyà te kandin.

¹²Emun egkepauk is hadì ne iring haazà te edhiniǥer he erimaung, iyan, is tavang din igkepetug-iring daan te zehemug he ebpekepetuvù te pinemula.

¹³Is tulebung he anak, ebpekezezaat te amey zin, ne is bahi he peretebek te esawa zin, ne iring te edtiǥisan he atep.

¹⁴Is baley wey zuma pa he menge azen, egkepengevilin diyà te ginikanan, iyan, Nengazen mulà is ebpekeveǥey te uluwanen he esawa.

¹⁵Emun ebpepepeǥul ka wey edtulung ke zà edlipezeng ne siguradu ebitilen ka.

¹⁶Is kebpezumazuma te etew te menge suǥù te Megbevayà, iyan egkehimu he ibmeluǥayad te ked-ubpè din, piru is kenà edtuman ne meǥaan dà egkeumuri.

¹⁷Emun ebeǥey ki ziyà te menge pubri, ne iring te impesambey nu is Nengazen, su iyan is Nengazen ebayad kenikew.

¹⁸Mensuwa nu is menge anak nu zutun te zuen pa timpu. Emun kenè nu sikandan ebmensuwen, iring te mid-uǥup ka he edhimatey kandan.

¹⁹Beleǥaza nu is etew he uuringeren te ked-etuvang te neveelan din, su emun ed-uǥupan nu sikandin, ne egkelayam ne edsublien din is mibeelan din.

²⁰Pemineǥa nu is idsambag kenikew ne zewata nu is ibpenurù kenikew ne emun egkeuǥet egkehimu ka he uluwanen.

²¹Mahabet is pelanu te etew piru iyan gihapun egkeulaula is egkesuatan te Nengazen.

²²Iyan egkesuatan te etew is; kenà sikandin engkezi te ebmahal. Deyzey pa is egkeey-eyuwan kenà is teruen.

²³Is etew he edtahud te Nengazen, edluǥeyazan te untung, melipayen wey ebpekelikey te kesamuk.

²⁴Duen menge etew he utew tepulan minsan is keenen ne kenè din pa igkesungit.

²⁵Kinahanglan he edsilutan is menge sumpalit para is iring dan he kenà memetau ne egkehimu sikandan he uluwanen. Is uluwanen he etew ne ed-iseg pa is kedsavut din emun edewayen sikandin.

²⁶Mekeeled eled wey ebpesudìsudì he anak is edsukul te amey zin wey edsegseg te iney zin.

²⁷Mama, emun kenè nu ebpemineǥen is menge penurù ku kenikew, ne idselikwey nu is menge penurù he ebpekeveǥey te ketau.

²⁸Is teruen he tistiǥus, edsumpeliten din is hustu he ketezengan, wey is menge etew he lalung, iyan egkesuatan dan is kelelalung.

²⁹Ebmultahan is etew he sumpalit ne ebuǥelen is egkeengey-engey.